從奧迪 Grandsphere 概念車可見，國際大車廠傾向盡量討好用家而設計新車。

未來汽車，就好似模特兒在fashion show演繹嘅最新時裝一樣，以概念及物料吸引目光。而外形似一架GT跑車嘅奧迪 Grandsphere 概念車，其實係一架長達5.35 米長嘅長陣轎車，在全自動駕駛模式下，軚盤及操控腳踏會縮入儀表板及地台隱藏間隔中，令乘客嘅伸展空間更加自由自在，換言之，Grandsphere 係一架專為討好乘客而設計嘅豪華長陣轎車。

至於電池性能，廠方宣稱只需約10分鐘就能為電池充夠行駛300公里路程嘅電力，又可以在少於25分鐘就能為120kWh嘅電池由5%電量充電至80%，而最長續航距離可達到750公里。呢個續航力雖然仲未突破1000公里，但已比起耗油量特別高嘅傳統入汽油嘅長陣轎車，莫講話一缸油行唔到1000公里，就算行 750公里都要最少入兩次汽油；加上充夠行駛300公里路程嘅充電速度與傳統引擎車入一缸油時間相若，就明顯更加適合長途行程，最重要係充電比入油平得多。

對熱愛駕駛嘅消費者又會否失望呢？如果只係需要快，0-100km/h加速，只需4秒零，以長陣轎車來講算唔錯。至於操控，奧迪表示用咗氣壓懸掛，能在毫秒之內調節個別車輪升高或降低，前懸掛又採用專為電動車而改良嘅五連桿結構，而後輪係多連桿式結構，而且全由鋁合金製成；而可轉向嘅後輪則可為長軸距車身提供更靈活嘅操控效果。

概念還概念，Grandsphere 仲肩負埋開發奧迪下一代全電動平台責任，同時亦被視為下一代A8嘅設計及技術預覽，即係下一代A8不但會有長陣版，仲好有機會有埋純電動版。