進入第8代的ES車系，除了超長的續航距離及大幅增長的軸距之外，仲有一項首創的獨門技術  。 以北美豪華車巿場為目標的凌志ES車系，可能歴代所採用的底盤都跟Camry有直接或間接關係，所以一直被認為是豪華版Camry。以Elegance in Motion作為設計核心理念的第八代ES，車身經過大幅擴充，外形亦參考了LF-ZC 概念車，無論體積或外觀都是煥然一新。而為了配合豐田以Multi-Pathway作為環保車的發展方針，今代同時提供HEV油電混合及BEV純電動型號，包括ES350h、ES350e及ES500e。 今次測試的ES350h，採用了第六代THS油電混合系統，2.5公升直四VVT-i引擎配全新一體式eAxle電動摩打，總輸出247ps，0-100km/h加速7.7秒，性能不算強，但每百公里的綜合耗油量只需3.8-5.7L，油電續航力高達962-1,446km。 採用經重新調校的TNGA-K底盤，除了集低重心、高剛性與輕量化於一身之外，更間接增大了車廂空間，因此車身無論長、闊、高，都比上一代分別增加165mm、55mm及110mm，軸距亦延長80mm，體形已達中大型房車的級數。 設計靈感來自2023年發表的純電概念車LF-ZC，雖然新一代ES的線條不及 LF-ZC 那種浮誇，但亦隱約保留了一點Provocative Simplicity的設計理念；Spindle Body車頭配上Fastback車尾，風阻系數0.26Cd，形態有如一輛四門 Coupé。車廂空間可謂歴代最寬敞，設計亦是歴代最激進；以科技築建成的 Minimalism，  促成了全球首創的Hidden Switches感應式隱藏按鈕的出現，當手部靠近中控台或軚盤按鈕時，才會出現功能圖案，這項設計一方面帶來了整體視覺上的簡約，另一方面又能兼顧到實體按鍵的實際需要。前座椅的剪裁以Omotenashi作為設計核心，特別針對肩胛骨及背部的支撐性；比正常稍為單薄的椅背唔是偷工減料，而係不影響舒適度的前提下，為後排乘客提供更寬裕的膝部空間。 標準配備觸感細膩的NuLuxe環保合成皮革，細緻的針孔設計配合三段式冷熱通風系統，可在不同季節為前座駕乘人提供合適的座椅溫度。全新ES車系均配備14吋觸控展幕、六種選擇顯示模式的12.3吋數碼儀表板、HU投射式儀表及Mark Levinson音響組合。整體空間與配置已直逼旗艦LS 車系的水平。 全新開發的2.5公升直四Hybrid引擎，配E-CVT無段變速波箱，駕駛模式有Eco、Normal、Sport及Custom，充飽電可用EV純電模式行車。加速力以絲滑線性主導，Sport mode地板油式加速，可帶來短暫的心跳加速、血壓上升、瞳孔放大、血糖飆升。雖然懸掛以房車舒適濾震為核心，但跑山劈彎都有少少轎跑味，全車低重心設定，亦消化了部分S彎產生的物理傾側現象，是一輛具有高預知性，人車溝通感十足的行政級房車。 Lexus ES350h 規格表引擎形式：L4 VVT-i汽缸容積：2,487c.c.最大馬力：186hp@6,000rpm峰值扭力：235Nm@4,200-5,000rpm電動摩打：恆式同步摩打最大馬力：160hp峰值扭力：272Nm(摩打)混合動力總馬力輸出：244hp傳動形式：前置引擎‧前輪驅動傳動系統：E-CVT 電子無段變速配軚盤+/-轉檔懸掛系統：(前)麥花臣/ (後)多連桿制動系統：(前/後)通風碟輪圈：19吋合金輪胎：(前/後) 235/ 55 R19 Michelin Primacy5 energy長x闊x高：5,145 x 1,920 x 1,555mm軸距：2,950mm車重：1,810kg0-100km/h：7.7秒極速：200km/h耗油量：3.8-5.7L/100km (WLTP)售價：HK$579,700 (ES350h)/ HK$729,125 (ES350e)

早於 992 世代設計之初，保時捷的工程師就已經在底盤埋下電動化的伏線。好彩呢個並非專為環保情而設計，純粹係德國人一早就預留緊湊小巧電池的位置。至於呢個「 T-Hybrid 秘技」，一直等到 992.2 中期改款才正式爆發，正是眼前這部全新 911 GTS。 呢套全新的 T-Hybrid，核心係一副全新 485ps 的 3.6 公升水平對向六汽缸引擎。排氣量比之前的 3.0 公升大咗，而且變成單渦輪，明眼人一睇就知道是向 935 賽車「借鏡」。 更精妙的設計係有兩副電動摩打：• 第一副摩打： 縮咗入渦輪增壓器裏面，介乎壓縮機同渦輪葉輪之間。• 第二副摩打： 採用傳統的永磁電機，直接塞入 8 前速 PDK 雙離合波箱的尾端。 仲有係搭載 400V 電力架構，完全取消了所有外部皮帶驅動，甚麼發電機、冷氣壓縮機皮帶甚至連渦輪廢氣閘都通通消失。 事實上，呢部 GTS 連傳統的Starter起動器都慳返，由波箱內嗰副摩打直接發功，實現賽車般的瞬間「接合」啟動，令動力傳送仿如武林高手火速發功般乾淨利落。 腎上腺素與德國理性的結合 傳統熱血車迷聽到「Hybrid」一詞，大概會好似英國人看見有人向茶杯先加奶才飲一樣面色大變。但請放心，駕駛新款 GTS 幾分鐘後，你就會發現自己多疑了。呢套系統聰明得好似AI，而且唔係為咗慳油而生，亦唔會提供純電行車，反而在 911 應有的狂暴動力輸出之外，仲額外提供動力，令綜合馬力達到541ps，0-100km/h加速只需3秒 。最重要係，幾乎沒有增加甚麼贅肉，一副引擎重 27 公斤，與舊款雙渦輪增壓引擎一樣，卻能額外提供 15 匹電動馬力回饋給車頭那副 1.9 kWh 的輕量化電池。 當你將軚盤上的旋鈕切換到 Sport Plus 模式，這部 992.2 GTS就好似快速除下西裝變身的超人。那副整合在渦輪內的摩打成為eTurbo，已瞬間將增壓值飊升。傳說中的渦輪遲滯（Turbo Lag）？對不起，這部車字典裏冇呢兩個字。 隨著轉速攀升，那股澎湃而猛烈的推背感，伴隨着水平對向六汽缸獨有的Heavy Metal交響樂，直接轟炸到你的腎上腺素急升。香港顛簸山路的終極試煉 在香港的石屎森林或大帽山顛簸多坑的彎路上，GTS 的底盤設定絕對稱不上「溫柔」。即使你將吸震筒調到最軟，它的行駛感依然偏向硬朗，路面資訊會毫無保留地經由你尾龍骨傳向大腦。 呢種硬橋硬馬的底盤反應，換來的是無與倫比的駕駛極限快感：1. 轉向反應： 底盤對你扭軚的執行力快過AI，而且近乎神經質地精準。2. 動態反饋： 由於過度高效，你可能要同架GTS鬥力，但換來的是熱血的駕駛反應。3. 溝通感： 911 招牌的路面感依然清晰。就算後軸在極限邊緣蠢蠢欲動，軚盤依然會老實告訴你還有多少籌碼，令你信心爆棚。在急彎或起伏多變的大山，這種人車合一的敏捷度，容許你去壓榨底盤的潛力。你愈狠，它愈生猛。而喺呢個全情投入嘅過程中，呢副 3.6 公升水平對向六汽缸引擎，再次成為所有動態反饋中最不可或缺嘅靈魂。結論：紳士隨時可以變車手 回到市區，用返Normal模式，GTS 隨即收斂鋒芒，低調得像個紳士。但只要你手癢去轉動那個駕駛模式旋鈕，呢副引擎同埋底盤就立即變成猛獸，隨時會將你連人帶車彈射出去。 這套 T-Hybrid 系統以更少的部件、更輕的重量，換來了更賽道感覺的性能。作為 992.2 世代成熟期的代表作，992.2 GTS 或許是目前整個保時捷車系中，最全能、最值得拎支票簿落訂的車款。前提是，當你激情駕駛時，隔離座位乘客，頂唔頂得順呢份德國式嘅硬朗？2026 Porsche 911 Carrera GTS 規格表引擎形式：F6 eTurbo配T-Hybrid電動摩打汽缸容積：3,591c.c.最大馬力：485ps@6,500rpm峰值扭力：570Nm@2,000 – 5,500rpm摩打輸出：41kW(54ps)/150Nm綜合馬力：541ps @6,500rpm 綜合扭力：610Nm@1,950 – 6,000 0-100km/h：3.0秒0-200km/h：10.5秒極速：312km/h傳動形式：後置引擎‧後輪驅動傳動系統：8前速PDK雙離合半自動配軚盤+/-轉檔懸掛系統：(前)麥花臣/ (後)多連桿制動系統：(前/後)通風碟輪圈：合金 (前) 8.5J x 20 (後) 11.5J x 21輪胎：(前) 245/ 35 ZR20 (後) 315/30 ZR21長x闊x高：4,553 x 1,852 x 1,296mm軸距：2,450mm車重：1,595kg耗油量：10.6 – 10.1 l/100 km碳排量：242 – 230 g/km售價：HK$3,188,000起

售價HK$321,300，呢個就係2026款 Tesla Model 3 最平入門版嘅入場費。面對大堆頭平價中國電動車「圍攻」嘅今日，呢部曾經嘅「科技新貴」都用「新低價」迎戰，究竟佢憑住 534km 嘅續航力、滿瀉嘅科技配備同可靠嘅駕駛感，仲保唔保得住佢「電動車大佬」嘅地位？One-Pedal 似高手過招，懸掛就有啲「硬朗」 雖然佢唔似 Performance 版 0-100km/h 3.1秒咁，可以幫你重新整理面部肌肉，但 RWD 版嘅 6.2秒加速，其實已經夠你喺告士打道起步時，將隔離部燃油車放甩於後視鏡。 Tesla 玩神秘唔肯公布電池容量，網上搵EV資料係 64kWh ，廠只提供最大續航里程為 534km ，雖然是整個車系中最短的， 但勝在 Supercharger 網絡夠大，15分鐘就充到 270km，買杯咖啡嘅時間又可以行多轉屯門。 同競爭對手相比，仍然相當不錯。 油門（電門）反應精準到令人忍唔住讚，即使喺旺角塞車，你都可以靠一隻腳掌嘅微調，令架車行得順滑到令人以為係禮賓車司機。至於動能回收（Re-gen）大部分時間可以取代迫力踏板，慳電之餘仲幫你慳埋換迫力皮嘅錢。 山路上劈彎，車身沉穩靈活，雖然軚感一般，但轉向夠敏銳，即時以為自己係F1車手韋斯塔本。 不過，Tesla 工程師對「路感」嘅執著，懸掛調校偏硬，喺香港啲爛路上低速行駛，你會好清晰咁感受到路面嘅「起伏」。好在遇到大坑洞時佢都可以應付得到，未至於令你嘅脊椎受內傷。  隔音大幅進化：世界靜到剩返胎噪 中期改款最成功嘅地方，莫過於車廂精緻度嘅提升。全車玻璃、改良懸掛襯套同密封件真係無白費。廠方話風噪低咗 30%，實測下在公路行車，車廂靜到你開始會嫌棄輪胎傳入嚟嘅低沉摩擦聲。冇辦法，當你將所有雜音消滅晒，剩低嗰少少缺點，就會好似黑夜中嘅螢火蟲一樣咁鮮明。 極簡主義，定係「慳物料」？ 15.4吋中央觸控螢幕：控制晒全車靈魂。如果你未俾呢種極簡（甚至近乎修行）嘅內裝嚇親，你會發現系統其實算幾好用。但係！Tesla 似乎對「實體波棍」有某種創傷後遺症。新車完全取消咗實體波棍同按鈕，轉波要喺個大螢幕右上方「向上滑、向下滑」。如果你行車時個螢幕突然「罷工」藍畫面，你可能會好懷念以前嗰支雖然老土，但永遠喺度無言支持你嘅機械桿。 車廂整體質感雖然有進步，但對比起完美無瑕、充滿德式工藝嘅 BMW i4 或者 Mercedes-Benz CLA，Model 3 嘅內裝頂多只能算是一件「剪裁不錯的快時尚服飾」。後排空間對比 後排地板完全平坦，的確有利於五人同坐，不過座位偏低，中間嘅朋友，大腿支撐不足，坐姿幾乎似蹲凳仔。尾箱實用性容積有682L，不過房車式（Sedan）尾箱略窄，搬大行李要考技術。 總結 Model 3 入門版用超值車價、頂級科技與出眾續航力捍衛其中型房車王者寶座。雖然無實體波棍需要適應，且後座大腿支撐稍遜，但依然是市面上性價比最高的家庭電動車，尤其係sedan車型的首選。 2026 Tesla Model 3 RWD 規格表 車型：四門四五座位電動房車摩打類型：永磁同步摩打數目：1最大馬力：283hp峰值扭力：350Nm傳動：前置摩打, 前輪驅動 單速自動 0-100km/h：6.2秒電池類型： 鋰離子電池電池容量：64kWhDC直流快充：15分鐘(270km)續航距離(WLTP)：534km車輪：18吋合金車身長 x 闊 x 高：4,720 x 2,089(連側鏡) x 1440mm軸距：2,875mm車重：1,772kg售價：HK$321,300