新版911，廠方編號為992.2，作為現行992嘅中期改款車型，外觀上只係微調，動力再略有升級，科技配備上進一步提升，同時亦維持經典嘅後置引擎、後輪驅動（或四驅）佈局。至於911 Carrera Cabriolet屬於車系中嘅入門級開篷版本，搭載動力輕微提升嘅3.0公升雙渦輪增壓水平對向6汽缸引擎，輸出389匹最大馬力（比 992.1 增加9 匹），依然以經典設計嘅外觀，性能強悍而又符合日常實用性為主要賣點。992.2 嘅外觀變化不大，驟眼睇難以分辨與992.1嘅分別，但其實車頭指揮燈，已由泵把上整合埋大燈成為一個整體燈組，令前泵把進氣空間比以前大，以提升冷卻效率，同時又令外觀更簡潔。車尾就採用更圓潤及簡潔設計，配備新嘅一字形燈條，視覺上更簡約流暢。線條幾乎與Coupe版冇分別經過微調外形嘅911 Carerra Cabriolet，又的確係漂亮咗。靚咗，係要歸功於採用咗鎂合金支架嘅嘅軟篷頂，優點除咗輕巧而堅固之外，又可以在車速50km/h以下時，只需12秒就可以開或關；而且關上軟篷時，亦可避免一般軟篷會出現嘅摺合位嘅骨線而影響順滑線條，令關上軟篷時，整體外觀線條，幾乎與Coupe版沒有分別，而且關閉軟篷行車，車內隔音效果亦十分接近硬頂版，只有在高速時略有風噪。首次配備全數碼化儀表板新版992.2亦係911車系首次配備全數碼化儀表板，12.6 吋曲面螢幕嘅駕駛儀表，支援多種個性化功能，提供7種效果，其中包括轉速表在中央嘅經典保時捷傳統五圓表設計，讓死硬派擁躉可以懷緬一下。 中控位置配觸控式螢幕，操作反應流暢，介面也非常合理易用，又可以無線連接Apple CarPlay及Android Auto，全新嘅Porsche Connect亦可使用Spotify及Apple Music等第三方應用程式，也十分方便易用。劈彎都零舍人車合一動力來自水平對向3公升6汽缸雙渦輪増壓引擎，而且採用了Turbo車型嘅中冷器，並配備之前只限GTS車型採用嘅渦輪增壓器，輸出最大馬力394ps，峰值扭力450Nm；配8前速PDK雙離合波箱，後輪驅動。0 - 100 km/h只需4.3秒，有埋Sport Chrono Package就4.1秒。 老實講，實際駕駛時，根本體驗唔到多咗9匹馬力有咩分別。只覺得副8前速PDK雙離合波箱，能夠好順滑就將394匹嘅動力驅動後輪，而且可以好輕鬆咁熨平不同嘅彎路。Cabriolet車型重量雖然比Coupe增加大約80公斤去到1,600公斤，但點都比動輒就兩噸半嘅電動車輕巧得多，所以劈彎都零舍人車合一。山路上快跑已經係樂趣跑車化嘅駕駛位置及座椅依然非常稱心，轉向反應靈敏，劈彎時PASM主動懸掛系統反應乾淨利落，底盤嘅馬步功架又高強，加上 911車系配備越來越寬闊嘅輪胎，加上由軚盤傳來嘅清晰路面感，在多彎嘅山路上快跑，就已經係一種樂趣，唯一覺得不夠過癮嘅係排氣聲浪不夠轟動。 雖然開篷嘅結構剛性會不及Coupe，但整體行車表現依然硬朗穩健，只有在極端顛簸路面，才會感到車身嘅少許多餘震動。整體評價保時捷911獨特之處，在於經典嘅青蛙眼頭燈，後置引擎布局，同埋排氣聲浪誘人嘅水平對向6汽缸引擎，令911車系在跑車市場上可謂無可取代。至於911 Carrera Cabriolet嘅主要競爭對手，其實已越來越少，包括過去嘅Jaguar F-Type、Audi R8 Spyder都已停產。事實上，911 Carrera Cabriolet簡單而直接嘅機械規格，配合順滑流暢嘅雙離合器波箱箱，仲有設計精緻嘅電動軟篷，足以成為令人享受開篷駕駛，又可以符合日用嘅開篷跑車。2025 Porsche 911 Carrera Cabriolet 規格表引擎形式：F6雙渦輪增壓汽缸容積：2,981c.c.最大馬力：394hp@7,500rpm峰值扭力：450Nm@2,300–5,000rpm傳動形式：後置引擎‧後輪驅動傳動系統：8前速PDK雙離合半自動配軚盤+/-轉檔懸掛系統：(前)麥花臣/ (後)多連桿制動系統：(前/後)通風碟輪圈：合金 (前) 8.5J x 20 (後) 11.5J x 21輪胎：(前) 245/ 35 ZR20 (後) 305/30 ZR21長x闊x高：4,542 x 1,852 x 1,301mm軸距：2,450mm車重：1,600kg0-100km/h：4.3秒 (4.1秒with Sport Chrono Package)極速：291km/h耗油量：10.5-10.3L/100km (Combined)碳排量：238-234g/km售價：HK$3,269,352 ( 測試車連額外裝備 ) 

平治全新純電動嘅 G580，除咗外觀保留經典G-Class風味之外，全車內外都同樣都好有卡士，不過亦同時亦保留埋G-Class相當昂貴嘅傳承。測試嘅G580e Edition One，係第一年生產嘅特別型號，加埋額外設備，售價係港幣$2,920,000；之後生產嘅稱為G580 with EQ Technology，售價係港幣$2,380,000起。無論係邊一款，賺錢能力冇返咁上下，就唔係咁易擁有了。越野車之中，講man、講型，來自德國嘅平治G-Class，一直都係man到爆又型到震。至於外觀保留經典G-Class風味嘅全新純電動G580e，同樣都係man到爆又好型。近年有不少女明星步入50歲，但又keep得好fit仲好靚，娛樂記者就會大字標題稱為凍齡美魔女。至於1979年面世嘅G-Class，也差不多步入50歲，一直都keep住個剛猛外形，又唔玩整容變臉，就算出純電版本，依然維持數十年不變嘅方正剛猛外觀，而且依然威猛有型，係咪都應該稱為凍齡型魔男呢。  高性能硬派越野車外觀保留經典G-Class風味嘅G580e凍齡型魔男，仲擁有非常犀利嘅技術，尤其係關於越野嘅先進功能，更加係令人嘩嘩聲，包括 G-TURN、G-STEERING及智能越野爬升斜坡等功能。不過呢啲勁辣招式，要留返遲啲有越野機會先可以試。 純電驅動嘅G580e，續航力有491公里 (WLTP)，四個獨立控制電動摩打最大總輸出馬力587匹，峰值扭力達到1,164Nm，0-100只需4.7秒。可以話係所有G-Class之中，講威！除咗G63 AMG認咗第一，就到佢最犀利。講到數十年不變，進入車廂前，係要按一下車門把手嘅老式按鈕，而唔係高科技嘅彈出式把手，關上車門時仲要發出堅實沉厚嘅聲音，非有儀式感。車廂佈置精美，用嘅都係高質材料，不過除咗駕駛儀表及中控螢幕係電子化操作，車廂仍然有好多維持實體掣鈕，貫徹越野車嘅硬朗實用神粹。維持G-Wagen駕駛感覺電G嘅0-100km/h加速只需4.7秒，不過操控就唔係超級跑車咁靈敏， 駕駛反應係偏向越野車嘅沉穩，在山路上可以快跑，不過在連續S彎上嘅車身控制反應不夠敏銳。當在彎前重腳減速入彎，就會感到那超過三噸嘅重量，出彎要加速時，就更加明顯感受到超過三噸嘅重量，拖慢出彎嘅速度。 話需如此，但電G嘅操控感覺好堅實，能提供不一樣嘅電動車駕駛樂趣。加上又有特別設計嘅「G-Roar」扮V8引擎音效，能夠跟隨電門加速而變化，製造些微V8引擎氣氛，雖然聲浪不大，但也不會單調而令人厭煩，聽起來又覺得非常合適，亦相當過癮。保留經典梯形越野車底盤由於保留經典嘅梯形框架越野底盤，廠方將116 kWh 電池結合於底盤框架之內；當進行越野駕駛時，車底嘅保護係至關重要，所以又在底盤下方加上碳複合材料防撞裝置。 除此之外，可切換波段嘅波箱，具備Low Range越野減速功能，涉水或越泥功能最深可達850毫米，又可在斜度最高達 35° 斜坡上行駛，前部接近角/離去角為 32°，後部接近角/離去角為 30.7°等等強勁越野功能。擁有硬派越野功能嘅豪華SUV整體而言，電G係我們駕駛過最具機械感嘅電動車，設計出色，電動化高科技中又可維持經典G-Wagen功能，日常駕駛又寧靜舒適，駕駛輕鬆容易，完全可以在硬派越野車中佔有一席地位之餘，亦可滿足豪華SUV嘅需求。2025 Mercedes-Benz G580e Edition One 規格表摩打形式：恆磁同步摩打電池容量：116kWh鋰離子電池最大馬力：587ps峰值扭力：1,164Nm續航距離：491km (WLTP)傳動形式：四摩打四輪驅動傳動系統：單速直接驅動0-100km/h：4.7秒極速：180km/h懸掛系統：(前)雙搖臂/ (後)De-Dion 車軸制動系統：(前/後)通風碟長x闊x高：4,624 x 2,187 x 1,986mm軸距：2,890mm車重：3,500kg快充：200kW (10-80% ) 32分鐘售價：HK$ 2,920,000 / G580 with EQ Technology：HK$2,380,000 起 (意向價格)

外形充滿濃烈意大利設計風格，配合動感設計嘅車廂，而且搭載唔錯嘅數碼技術裝備，車外車內都有明顯又充滿趣味嘅特色設計，車廂空間實用，重點係以駕駛趣味吸引消費者，尤其係一眾Alfa粉絲，十成會中毒。  Alfa Romeo終於打開電動車嘅篇章，全新嘅Junior小型純電 SUV，係Stellantis集團旗下備受好評嘅e-CMP電動車底盤發展而成。經常有人問我買車，到底係日本、德國，定係意大利或法國車好。冇呃你，個順序九成都係日本排先，然後係德國，意大利及法國。會揀意大利或法國車，九成都係中毒。不過中毒嘅唔係毒男毒女，反而係不乏潮人及專業人士。道理好簡單，揀車就好似出街想飲嘢，冇乜idea，穩穩陣陣咪揀茶囉；想有型少少，揀Americano囉，有品味，梗係Espresso啦！不過口感濃烈嘅Espresso，唔係人人都覺得好飲。鍾意嘅人，甚至會講究埋Espresso浮面嘅一層Crema，唔夠濃厚都覺得唔合格。Alfa Romea嘅設計特色，其實真係幾似Espresso浮面嘅一層Crema，不過就唔係人人都識欣賞。 新車原本計劃命名為 Milano，不過由於新車在波蘭廠房生產，雖然在意大利設計，外形充滿意大利風情，但就未能符合意大利政府嘅「made in Italy」規定，廠方就改用曾用於六、七十年代嘅 Alfa GT Junior 轎跑車嘅Junior來命名。Junior係Alfa Romeo第一架電動車，配54kWh電池，採用400V電力架構，用100 kW DC直流快充，可以在30分鐘內將電量由20%充 80%。至於最大馬力就有156匹，峰值扭力260Nm，單摩打，前輪驅動。 主打電動SUV市場嘅Junior，設計團隊似乎不甘心於SUV嘅平淡，於是在車上出現好多Alfa嘅徽章、好似浮雕嘅車尾燈，甚至冷氣風口都有廠徽。車廂設計仍然帶有燃油車味道，如果有支波棍就更加似跑車。前、後座空間不算寬敞，但已可舒適乘坐四名成年人，行李箱空間亦可滿足日用要求。續航距離，以WLTP 標準計算有410公里，城市行車就可以超過592公里。由於電池唔算大，車重可以維持在冇咁重嘅1,545 公斤，所以操控就可以做到比一般超過兩噸嘅電動車靈活敏銳。單睇性能數字，Junior嘅0-100要9秒，幾乎輸晒畀高容量電池嘅內地電動車對手。但車重 1,545 公斤嘅Junior，雖然仍然比同級嘅燃油車要重，但勝在比搭載大電池閒閒地2,000公斤以上嘅對手輕盈，跑山路明顯靈活敏銳得多，相形之下，0-100跑得好快嘅對手，跑山路嘅靈活性就相形見拙了。來港發售嘅Junior有兩個版本選擇，分別為 Launch 版本及 Sport 版本，售價分別為 港幣$359,800 及$429,800，首批預售有得送40,000元嘅「Technology Pack」升級配備，包括LED矩陣大燈、無邊框自動調節光暗車廂後視鏡、無線智能手機充電器、泊車感應系統、導航系統、遙控電動尾門、免匙啟動、車道偏離嘅自動調節巡航控制、後視鏡頭及交通標誌自動識別功能。2025 Alfa Romeo Junior 規格表摩打形式：恆磁同步摩打電池容量：54kWh鋰離子電池最大馬力：156hp峰值扭力：260Nm續航距離：592km (City) 410km (WLTP)傳動形式：前輪驅動傳動系統：單速直接驅動0-100km/h：9秒長x闊x高：4,173 x 1,981 x 1,532mm軸距：2,562mm車重：1,545kg售價：HK$359,800   (Launch Edition)、HK$429,800 (Sport Edition) / (one-for-one replacement scheme)

採用全新純電Pickup底盤嘅T9 EV，係JAC首款雙摩打4X4電動Pickup，高頭大馬嘅外形，提供又高又闊嘅視野，山路上表現比想像中靈活，在市區揸住佢，會有大地任我行嘅感覺，操控亦輕鬆容易。動力來自88.02 kWh磷酸鐵鋰電池，WLTP續航距離340公里，對充電焦慮嘅駕駛人來講係扣分之環節。來自內地嘅JAC T9 EV，以美式Pickup風格包裝，號稱全港首部電動四驅農夫車，售價港幣$368,800，進軍競爭相當激烈嘅香港Pickup商用車市場。乜嘢人會揸呢類車呢？ 講到美式Pickup，T9 EV高頭大馬嘅外形，又真係有啲似來自美國嘅Ford Ranger；不過睇真啲，面積隨時大過勞斯萊斯嘅車頭面罩，又真係幾有霸氣；頭燈及日間行車燈嘅設計，亦採用凌厲風格，加埋尾箱上嘅防滾架，粗獷味爆燈。 Pickup在香港叫農夫車，不過香港農夫其實唔多，乜嘢人會揸呢類車呢？一般會用作工程車，建築地盆腳車，偶然又會有潮人揸Pickup，潮得嚟又真係幾Man。我就覺得冇頂嘅貨斗，揸去滑浪應該幾實用，夠晒吸睛，又唔怕日曬雨淋。大地任我行嘅感覺 高頭大馬四驅底盤設計嘅T9，離地距都相當高，所以車側兩邊踏板唔係扮有型，係真正有需要的。想好有型坐上車的話，最好先拉住A柱上嘅手挽，再按個人身手靈活度，摸索一下用右腳定左腳上踏板最啱自己。 至於又高又闊嘅視野，係幾霸氣嘅。在市區揸住佢，會有大地任我行嘅感覺。燈口起步，前後兩個摩打分別輸出70kW及150kW，夾埋差不多三百匹馬力，加上電動摩打強項就係即時嘅加速，所以驅動3,260公斤嘅T9，依然好爽快。在多彎嘅山路上，揸住車身長5,330mm，軸距有3,110mm嘅T9，比想像中靈活，遇上連續S彎，高離地距嘅車身難免會向外傾，但四個車輪就相當咬地，行車依然平穩，操控輕鬆容易。坐在車廂令人有feel good之感 採用現代化設計風格嘅車廂，配多功能皮革軚盤及數碼儀表，中間係相當搶眼嘅10.4吋觸控螢幕資訊娛樂系統，支援Apple CarPlay及Android Auto智能手機連接，又有無線充電。前座空間相當闊落，後排空間亦令人滿意，配備原廠皮革座椅，仲有一個飲品冷凍格，整體令人有feel good之感。 粗獷味爆燈嘅T9 EV，設備原來都相當豐富。頭燈係自動感光開關，又配備前後霧燈，電動調校嘅門邊鏡可以自動摺合，具備免匙系統及定速巡航，電動調校駕駛座，後座亦有兒童安全座椅扣。安全設備亦十分齊全 包括前座雙安全氣袋、側面安全氣袋及窗簾式安全氣袋，另外仲有一系列電子安全設備：防鎖制動系統、車身穩定系統、制動力分佈系統、斜路起步輔助、循跡控制系統、車輛動態控制、盲點監察、車道預警輪胎氣壓感應等等。2025 JAC T9 EV 規格表摩打形式：恆磁同步摩打電池容量：88.02kWh磷酸鐵鋰電池最大馬力：299ps (前70 / 後150 kW)峰值扭力：516Nm (前176 / 後340 Nm)續航距離：340km (WLTP)傳動形式：雙摩打四輪驅動傳動系統：單速直接驅動極速：140km/h懸掛系統：(前)雙搖臂/ (後)葉片彈簧制動系統：(前/後)碟式車輪；18吋鋁合金輪胎：265/60R18長x闊x高：5,330 x 1,965 x 1,920mm軸距：3,110mm貨箱長x闊x高：1,520 x 1.590 x 470mm車重：3,260kg (G.V.W)淨載重量：800kg快充：DC直流 (15-80% ) 45分鐘售價：港幣$368,800起

作為廠方首款電動車，以 Stellantis 的 e-CMP2 純電底盤發展而成的 Alfa Romeo Junior，雖然沒有了愛快引擎的魔力，但設計依然具備羅密歐的浪漫感覺與魅力，配合 410公里的續航力，實用的車廂空間，對 Alfa 粉絲依然十分吸引。作為 Alfa Romeo 的第一架電動車，廠方也刻意要注入一些經典的元素，例如 Junior 的名字，曾用於六、七十年代的標誌性 Alfa GT Junior 轎跑車。新車由意大利都靈的 Alfa Romeo Centro Stile 設計，於波蘭的 Tychy 廠房生產。外形設計依然貫徹 Alfa 的獨特風格，全長 4,173 mm，闊 1,981 mm，高 1,532 mm，配上全新的 Leggenda 及 Progresso Scudetto V-shield 盾形面罩，車頭配備「3+3」自動調節的 LED 矩陣大燈；至於肌肉型輪拱設計，則是向經典的 Giulia TZ 致敬。除此之外，車重為 1,545 公斤，比一般電動 SUV 輕盈得多。Junior 配備全新的 400V 電力架構，配 54kWh 電池，輸出 156 匹馬力，峰值扭力 250Nm；續航力根據 WLTP 標準計算最高有 410 公里，城市駕駛續航超過 592 公里。使用 100 kW DC 快速充電站，能在 30 分鐘內將電量從 20% 充至 80%。車廂配備跑車化的 Alcantara 皮革軚盤，全數碼化的 10.25 吋 TFT 儀表板，駕駛輔助功能包括有二級自動駕駛系統和360° 泊車感應器，並附有 180° 後視鏡頭以提高安全性。Sport 版本標準配有 Sabelt Corsa 高性能運動座椅，行李箱容量為 400 公升。 駕駛模式提供三種選擇：Dynamic（動態模式）透過特定的轉向和油門調校，提供最佳性能和駕駛表現；Natural（標準模式）在性能和舒適性之間取得最佳平衡，適合日常城市行車；Advanced Efficiency（節能模式）則專為最大效率而且節能。值得一提的是新一代 Alfa Romeo 車頭的盾形面罩，分別有 Leggenda “Scudetto” V-shield 及 Progresso “Scudetto” V-shield 兩款設計。香港發售的 Launch Edition 版本配備 Leggenda 規格裝備，以黑色面罩配 Alfa Romeo 的意大利斜體字款設計，讓人聯想到 1920 年代和 30 年代的 Alfa Romeo 運動轎跑車系列。至於 Sport Edition 版本，則搭載 Progresso 規格裝備。 新車售價分別為 Launch Edition HK$359,800 及 Sport Edition HK$429,800，首批預售可獲贈 HK$40,000 的「Technology Pack」升級配備。

新款Taycan Turbo S售價由港幣 $3,368,000起，電池性能及續航力再有提升，加速也快得驚人，是一架擁有保時捷跑車功架的電動跑車。至於320 kW DC直流快速充電功率，亦係一個賣點，加上係四門跑車，續航力亦提升至最高630公里，令新車更加符合日用需求。推出已超過四年的純電動Taycan，我們在2020年尾試初代Taycan Turbo S時，當時已經對其2.8秒0-100的強勁加速，留下深刻印象。 新款Taycan屬於中期小改款，新車外形變化不大，但其實最大變化係內涵，基本上已係全新設計。Taycan係電動跑車，講到內涵，首先係電動性能上，有好大嘅提升。新電池不但有更高容量，仲要輕咗，充電速度亦快咗；800 V 電力架構嘅直流充電系統經過改良，可以提供最高 320 kW 嘅 DC 直流快速充電功率，由10% 充至 80% 只需18分鐘，比初代Taycan嘅37分鐘充電時間減少一半有多，已經更為接近去油站入油嘅時間。新車續航力再有提升，綜合路況係558 – 630 公里，如果係城市駕駛，續航力係更加長嘅612-691公里。事實上，單係綜合路況，已經比初代Taycan嘅388-４12公里行遠咗好多。雖然話新款外形變化不大，其實前後LED車燈係全新設計，新嘅四點式高清矩陣頭燈，造型更加醒目。 值得一提係，所有車型都標準配備經過改良氣流動力性能嘅輪圈，同埋低滾動阻力輪胎，而且仲特別針對 21 吋胎軨，開發咗專用嘅新輪圈及輪胎。最大馬力775匹嘅Taycan Turbo S，加速的確好快。至於Sport Chrono新增好似Formula E賽車嘅 Push-to-Pass (一鍵加速) 功能，有 10 秒提供 70 kW 額外動力，要超車爬頭，其實真係快得嚟又幾過癮。講到快，新車用埋Launch Control起步，最大馬力可標升至952匹，峰值扭力達到1,110Nm，0-100 只需2.4秒，又比初代嘅Taycan Turbo S快咗0.4秒。而且0- 200時速公里，只需7.7秒，比初代嘅9.6秒，再快1.9秒。至於極速就同樣係時速260公里。新款Taycan都標準配備自動感應氣壓懸掛，加上Turbo S又係四輪驅動，在多彎嘅山路上，高速劈彎不但穩如泰山，由軚盤傳來嘅路況感覺清楚又明確，轉向靈活敏銳，而且又可選配全新嘅Porsche Active Ride系統，透過電子液壓控制四個車輪，感覺就好似熨斗咁，熨平不同嘅路面，令行車更順暢之外，快跑劈彎嘅感覺更爽快利落，係現時我們試過最有跑車功架及駕駛樂趣嘅電動車。除咗性能更強加速更快之外，廠方亦強調新車更節能，因為採用了升級軟件嘅脈衝逆變器，加上性能提升嘅電池、改良熱量管理概念、全新熱泵，以及調整過動力回收，於高速下煞車嘅最大動力回收功率，增加超過 30%，從 290kW 提升至最高 400 kW。整體而言，保時捷在電動車最重要嘅環節，尤其係續航力及充電速度，為Taycan進一步改進之外，其跑車化性能依然強橫。儘管電動車市場競爭出現極大變化，但Taycan憑藉出色的運動化駕駛表現，乘坐又舒適，日常使用也方便，令Taycan繼續成為市場上其中一款最出色的電動跑車。2025 Porsche Taycan Turbo S 規格表摩打形式：永磁式同步摩打電池容量：97kWh鋰離子電池最大馬力：775ps ( with launch control：952ps)峰值扭力：1,050Nm( with launch control：1,110Nm)續航距離：558-630km (WLTP Combined)0-100km/h：2.4秒0-200km/h：7.7秒極速：260km/h傳動形式：前後摩打/四輪驅動傳動系統：前單速/ 後雙速懸掛系統：(前)雙搖臂/ (後)多連桿輪圈：21吋合金輪胎：(前) 245/40 R21 / (後) 285/35 R21 長x闊x高：4,962 x 2,144 x 1,378mm軸距：2,900mm車重：2,295kg售價：$3,368,000 up

純電動的保時捷 Macan，雖然欠缺汽油引擎獨有的澎湃加速氣勢魅力，但憑著出色的典型保時捷動態反應，靈敏的軚感，操控敏銳而又容易駕駛，在彎路靈活而穩健的車身控制，依然能夠維持保時捷的一貫跑車化駕乘感覺；再加上電動車的尖端技術、造工一流，精心設計而且華實並重的車廂，令純電動 Macan，成為市場上最出色的電動車之一。由引擎驅動，轉為純電動 Macan，可以繼續成為保時捷最暢銷車系之一嗎？走運動型路線的保時捷 Macan 於2014年推出市場，到 2018 年首次小改款時，全球已售出 350,000 架，成為保時捷最暢銷兩大車系之一，可見幾受市場歡迎。至於全新第二代 Macan 已經轉為純電動，而另一款最暢銷係大哥 Cayenne，亦將會推出純電動新車。 提到 Macan 及 Cayenne 兩款車系，不但暢銷，仲佔廠方總銷量一半以上，即係非常有賺錢能力。講到賺錢，就會意識到全新的電動車底盤，對保時捷未來幾年嘅利潤係幾咁重要，而且係非常有賺錢能力。講到賺錢，就會意識到全新設計的電動車底盤，對保時捷未來幾年利潤係幾咁重要。到底保時捷廠方係點樣研發純電動 Macan 呢？ 首先係採用全新 Premium Platform Electric (簡稱PPE) 電動車底盤開發而成，所以同內燃引擎 Macan，係冇任何一個部件共享，甚至連引擎蓋上的徽章亦都冇共享。雖然都係 Macan 車系，但實際上已經係完全不一樣汽車工程設計的電動車。充電要快！廠方為 Macan 搭載 800V 高電壓電力架構，配總容量 100kWh，可用量為 95kWh 電池，而且充電系統可按充電設施分為 800 V 和 400 V，DC 充電功率分別為 270 kW 和 135 kW， 270kW 的快速充電，可在 21 分鐘內將電池從 10% 充到 80%。 續航力都要夠長氣！香港消費者非常關注的續航力，純電 Macan Turbo 算係幾長氣，WLTP 綜合續航力可以做到 591km，至於市區續航力就有 765km。跑車化的馬力及加速車迷最期待的性能表現方面，Macan Turbo 配前後兩個摩打，構成四輪驅動佈局，最大馬力有 639ps，峰值扭力 1,130 Nm，0-100km/h 係相當快的 3.3秒，極速 260 km/h。數值上，完全係跑車化的SUV。 懸掛系統一直係保時捷的強項，除咗採用雙閥門技術的PASM保時捷主動式懸掛系統，仲配備後軸轉向系統、電子式保時捷牽引力控制管理系統 (ePTM)，最重要係 Turbo 版仲有保時捷扭力分配升級系統 (PTV Plus)，即係話預咗駕駛人會好激進駕駛，底盤都會非常聽話。在路面上，Macan 的軚感，無論是操作力度，轉向敏銳準確的即時反應，都是十分有跑車感。加上電門的操作力度與反應沉穩而線性，懸掛在彎路上對車身外傾的控制，都實實在表現出保時捷應有的跑車風格，駕乘表現比同級的 SUV 對手都要出色。 在日常環境中的駕駛，動力輸出及制動反應都是偏向線性的，所以操控就非常輕鬆容易，不會出現加速及減速時產生的頓挫感。在山路上快跑，Macan Turbo 的性能也是一流的，雖然比汽油版重約400kg，但由於電池在車底，重心低了，轉彎抹角時也一樣平穩流暢。數值上，Macan Turbo 的 3.3 秒 0-100km/h 加速反應，因為沒有了引擎的咆哮聲，感覺好像很斯文，也因為四輪驅動的佈局，又配備了十分厲害的 PTV Plus 保時捷扭力分配升級系統，的確很少機會可以令車輪胎嘶叫，而且整體的氣壓懸掛表現十分出色，令 Macan Turbo 在各方面都有出色的平衡。 如果要揀有典型跑車感覺的 SUV，Macan Turbo 的確係錯不了的選擇。2024 Porsche Macan Turbo Electric 規格表摩打形式：前、後軸配恆磁同步摩打電池容量：100kWh鋰離子電池最大馬力：639ps峰值扭力：1,130Nm續航距離：765km (City) 591km (WLTP)傳動形式：四輪驅動傳動系統：單速直接驅動0-100km/h：3.3秒懸掛系統：(前)多連桿/ (後)多連桿制動系統：(前/後)通風碟輪圈：20吋合金輪胎：(前) 235/55 R20 (後) 285/45 R20長x闊x高：4,784 x 1,938 x 1,621mm軸距：2,893mm車重：2,405kg售價：HK$ 1,448,000 up

並非為速度而生的Abarth 500e，其實是講求操控輕巧矯捷的掀背小鋼炮，至於非常意大利設計的車廂，還有趣緻而令人喜愛，又有少少辣的跑車化外觀，令Abarth 500e係一架令人有驚喜的電動城市小車之外，同時亦係一架非常有玩味的意大利hothatch，雖然售價不及中國電動車便宜，City續航力亦只有336km，但卻具備令人好想擁有的魅力。當歐盟決定2035年起停止銷售引擎車，以推動低碳嘅電動車，車迷最熱愛嘅hot hatch小鋼炮，似乎都難以避免要淘汰汽油引擎的命運。 面對要進入電動車世代，來自意大利的Fiat，對策是將十分受歐洲市場歡迎的500掀背車系，轉型為電動hatchback。但對於專造運動型hot hatch的Abarth來說，沒有了渦輪增壓四汽缸引擎，轉為電動摩打，係咪可以取代汽油引擎嘅駕駛樂趣？複製Abarth汽油引擎聲為了彌補電動摩打欠缺的誘人引擎聲浪，Abarth為500e的車廂及車尾下方，加了稱為sound generator的「發聲裝置」，複製Abarth典型的汽油引擎澎湃聲浪。 啟動了「發聲裝置」而開車的話，無論是車廂內還是車外，都會隨住車速的升降而發出引擎咆哮聲，相當有趣。不過引擎聲浪並無轉波的激烈起伏變化，也不會發出拖波補空油的轟然高鳴的動人音效。開了幾分鐘後，就會覺得沒有激烈變化的引擎聲浪相當沉閃，要關掉的話，更需要把車停下來，才可在選擇項目中取消。 我反而會建議廠方應該為軚盤加上右升左降的regen撥片，不但可模擬在軚盤加減轉波的駕駛樂趣，說不定還可以令「發聲裝置」發出模擬補空油的動人音效，就更為理想了。高性能hot hatch版本Abarth 500e其實係Fiat 500 Electric 嘅高性能hot hatch版本，同樣建基於FCA與PSA合併為Stellantis之前開發的電動車底盤。懸掛只係簡單嘅前麥花臣支柱，後扭力桿。不過彈弓就比Fiat 500e更硬，吸震筒亦經過Abarth重新調校。 老實講，呢個底盤並唔係最新科技，又唔係機械上好高規格嘅電動車底盤，但hot hatch小鋼炮，往往就係因為簡單直接嘅汽車機械工程，而造就輕巧靈活，出色又好玩嘅操控表現。唔係好快  但操控好過癮為了要輕巧，Abarth 500e同Fiat 500e都係配比較細的42 kWh 鋰離子電池，最大馬力由118匹調高至155匹，峰值扭力由220Nm高至235Nm，0-100km/h加速需時7秒。 今時今日一街都係3至4秒就完成0-100嘅電動車，Abarth 500e嘅0-100係7秒，追求速度嘅朋友未必會滿意。不過試完車後，Abarth 500e的確唔係好快，但係操控就非常過癮。馬步穩健的底盤在路面上，車重1,360kg的Abarth 500e，由於車身輕，又比普通500e多咗37匹的馬力及15Nm的扭力，又多得電動摩打的瞬間加速力，無論係燈口起步還是要超車爬頭，不但得心應手，加上短軸距的車身小巧靈活，在山路上快跑，又真係幾過癮的；就算劈彎，馬步穩健的底盤，都幾難令四條Bridgestone Potenza Sport輪胎發出淒厲的嘶叫聲。駕駛模式分別為Turismo、 Scorpion Street及 Scorpion Track。Turismo模式：馬力和扭力會稍為降低，動力輸出柔順些，適合日常用途；Scorpion Street：提供最高性能，並同時提供最強的regen動能再生煞車；Scorpion Track：顧名思義，就係最激進的模式。在Turismo或Scorpion Street模式下，可以用one pedal方式駕駛，右腳離開電門，就會即時減速。 值得一提係，車廂內的門邊手挽內，有特設的500e壓紋圖案，無線充電位置則是都靈市的高樓大廈剪影壓紋，感覺係幾得意又窩心的。至於天窗亦可令車廂多些天然光，後座空間只乘二人，由於單門的設計，出入後座就較為不便。2024 Abarth 500e 規格表摩打形式：恆磁同步摩打電池容量：42kWh鋰離子電池最大馬力：153hp峰值扭力：235Nm續航距離：336km (City) 253km (WLTP)傳動形式：前輪驅動傳動系統：單速直接驅動0-100km/h：7秒懸掛系統：(前)麥花臣/ (後)扭力桿制動系統：(前/後)通風碟輪圈：18吋合金輪胎：(前/後) 205/40 R18 長x闊x高：3,673 x 1,682 x 1,518mm軸距：2,322mm車重：1,360kg售價：HK$399,800 up  (one-for-one replacement scheme)

廠方宣稱001 FR係一款要挑德國車廠的高性能電動車，無論品質、設計及車載技術都極具競爭力，車廂大量應用賽車化嘅 Alcantara，各樣掣鈕都顯得有質感，加上以遠低於競爭對手嘅人民幣769,000價格推出市場，售價比歐美日對都要便宜一大截，面對001 FR嘅挑戰，各大車廠主腦人都應該感到頭痛。吉利汽車在2021年成立的Zeekr電動車品牌，在短短三年已分別推出001 Shooting Brake旅行車，009豪華MPV，同埋X小型SUV。唔單只推出新車快，Zeekr仲開拓埋高性能Shooting Brake市場，就係眼前嘅001 FR。講到Shooting Brake，歷史上嘅起源，係歐洲皇室及貴族狩獵時用嘅馬車，空間必須實用，可以乘坐尊貴嘅皇室或貴族之外，仲可以容納打獵嘅助手，又可存放獵槍及獵物。 發展到近年，只有兩門，擁有流線形線條，例如法拉利 FF，明明係Station Wagon或者係Estate，但就稱為Shooting Brake。不過只有兩門嘅要求，又畀平治CLA Shooting Brake打破。總而言之， 因為Shooting Brake聽起嚟比Estate有型，又顯得高級，車廠想將旅行車市場定位高級化豪華化，就叫做Shooting Brake。採用Shooting Brake設計嘅001 FR，搭載100kWh 電池配 800V 電力架構，由四副電動摩打分別驅動四個車輪，最大馬力1,265匹，啟動埋Raikkonen模式同埋超頻模式，更可提升到1,300匹，峰值扭力 1,280Nm，再透過彈射起步模式，0-100km/h只需2.02秒。 唔只加速快，充電都要快，由10%充電至80%只需 15 分鐘，續航力就有550公里。至於制動系統配AP Racing 十活塞鍛造制動卡鉗，並且採用賽車專用Brembo碳纖陶瓷鑽孔制動碟。 為咗要輕量化，採用咗大量碳纖維，包括車頂，重量6.5kg，比傳統玻璃車頂減重65%。另外係擾流，包括頭唇、車側裙腳、大尾翼，全部採用碳纖維，整體減重超過17kg之外，高速行車時又可增加178公斤嘅下壓力。001 FR車廂配OLED中控螢幕及HUD抬頭顯示、賽車風格儀表及氣氛燈， 車廂又大量採用紅色，仲有2400瓦嘅額定功率最頂級嘅Yahama音響，配合全車28個揚聲器，每個座位都係7.1.4聲道環繞立體聲。FR001直路上嘅加速當然好快，但表現又唔似想像中超過1,000匹馬力嘅瘋狂，應該係全輪驅動加埋牽引力防滑系統嘅功勞之外，都有得益於Kimi Raikkonen嘅參與開發及調校。 在香港多彎嘅山路，全長接近5米，車身相當大嘅001 FR，操控依然相當靈活敏銳，加速及轉向感覺都會覺得係一架跑車嘅表現。另外值得一讚，就係駕駛座椅在轉彎抹角時，兩邊腰位嘅支撐，就會按照彎道變化而自動泵脹，令腰位支撐更實在。 在連續嘅S彎上，FR表現同樣靈活，不過就會感到超過2噸半嘅車重，會令到橫向嘅G-force更加明顯，加上闊度差不多2米嘅車身，在比較窄嘅山路上，就會感覺到車身相當大架。 整體而言，駕乘空間寬敞嘅001 FR，係一款能夠應付賽道挑戰嘅車之餘，同時亦能夠滿足日常實用性嘅要求。2024 Zeekr 001 FR 規格表摩打形式：恆磁同步摩打電池容量：100kWh鋰離子電池最大馬力：1,265ps / 1,300ps(Raikkonen模式)峰值扭力：1280Nm續航距離：550km (NEDC) 約：468km (WLTP)傳動形式：四摩打四輪驅動傳動系統：單速直接驅動0-100km/h：2.07秒/ 2.02秒 (彈射起步模式)極速：280km/h懸掛系統：(前)雙搖臂/ (後)多連桿制動系統：(前/後)通風碟輪圈：22吋合金輪胎：(前) 265/40 R22 (後) 295/35 R22長x闊x高：4,955 x 1,999 x 1,560mm軸距：2,999mm車重：2,525kg售價：RMB769,000 (香港售價有待公佈)