林寶堅尼Lanzador電動概念車於Monterey Car Week首度登場

話之你係以聲威力猛汽油引擎而聞名嘅超跑車廠，環保條例就點都要你推出純電動車。林寶嘅答案，就係剛於加州Monterey Car Week，展出引人注目嘅Lanzador全新電動概念車。

按照林寶堅尼透露嘅車系電動化時間表，首款純電動量產車已計劃於 2028 年投產。呢次在加州Monterey Car Week展出嘅Lanzador，林寶CEO Stephan Winkelmann表示：我哋將會開創一個新嘅Ultra GT車型細分市場，透過尖端科技，為用家提供前所未有嘅嶄新林寶堅尼駕駛體驗。

概念車除了係全電動，亦係採用咗打破常規嘅車身設計：2+2 座位，加上比較高嘅車身離地距，揭示咗林寶對於推出全電動量產車嘅未來計劃。

林寶堅尼設計總監Mitja Borkert，解釋咗概念車嘅大膽造型及咁嘅比例係全新嘅，有潛力創建一個全新汽車細分市場。Lanzador呈現咗超級跑車超跑份量，但駕駛位置稍高，又呼應咗Huracán Sterrato嘅設計。

廠方又話，儘管Lanzador外形較高，但車內座位嘅位置係比較低嘅，就好似坐喺噴射機入面一樣。駕駛人同前座乘客之間由中央控制台分隔，而呢個控制台同儀表板係相連嘅，而且有專為呢個概念車而設計嘅新型冷暖氣控制，同埋數碼功能，車內亦有一個乘客顯示屏，駕駛人可以使用林寶堅尼嘅「ANIMA」駕駛模式，來改變Lanzador嘅行車特性。

車內幾乎全部由可持續嘅材料製成，而且全部都嚴格選自意大利。座椅內嘅軟墊由回收纖維製成，中央控制台同門板嘅碳纖維則使用再生碳製造，儀表板、座椅同埋門飾板嘅羊毛內飾亦採用回收材料製成。

至於性能數據及電池規格，林寶堅尼暫未透露，但佢哋表示動力會由前後輪軸上嘅「高特定功率」電動摩打傳送，以實現全時四輪驅動。

林寶堅尼亦強調：動力、駕駛樂趣同性能絕對唔會妥協。Lanzador亦加入咗一系列嘅技術，去加強駕駛動態，包括後輪轉向、氣壓懸掛、主動空氣動力學，同埋全新嘅電子扭力分布系統等。

首部全電動嘅林寶堅尼量產車仲有段時間先會推出，廠方時間表預計係2028年。到時將會分享由保時捷主導開發，叫做SSP Sport嘅新底盤，而SSP Sport底盤同時亦會畀未來嘅Taycan同Panamera採用之外，同埋亦都會係將於2028年推出嘅Urus電動車型底盤。

林寶堅尼表示，新款GT雙門轎跑車嘅新底盤，將會係「技術先進、可靠，而且會做到極具駕駛樂趣。」

暫時已知道SSP Sport底盤將會配備800伏電動架構，同埋最高350kW嘅快速充電功能，所以新車可以極快速充電。不過，新車嘅電池同電機嘅具體規格尚未最終確定。