級距喺Q3與Q5之間，但車廂空間卻可媲美Q7，不過今次試嘅呢部Q4，係唔會引入香港的......

講緊只係今次測試呢款英國版 e-tron 40 唔會嚟香港，而將會抵港的 Q4，係無論輸出或續航距離都會比呢部更強的 e-tron 45。計埋這部Q4，Audi 現在只有3款電動車型號，擴展速度比對手平治及寶馬都慢咗半拍，如果要喺10年內完成廠方定下的完全撤出引擎車方案，就要加快節奏了。

測試的英國版 Q4 e-tron 40，外形跟將會在港發售的 e-tron 45 分別不大，巨型黑面罩配肌肉形的車身線條，是典型的 Audi SUV 風格；無全景天窗無後泊鏡頭，不過香港版會有齊晒。如果想有埋 S line 車身配件、20吋輪圈及 Sports Suspension，就要另加$75,000。

底盤採用了VW全新開發的MEB，除了Audi及VW之外，Ford及Mahindra等車廠都會選用該副底盤來發展電動車。無論是今次測試的 e-tron 40 還是抵港的 e-tron 45，均採用了82kWh的鋰離子電池，電池淨重為500kg，使用175kW充電10分鐘，可增加115公里的續航距離。

Audi 旗下的電動車可分為兩種驅動型式及摩打設定，純後驅會採用 PSM 恆磁同步摩打，如果是 quattro 四驅，前軸就會使用 ASM 非同步摩打。

按車廠慣例，45TFSI 以下型號會採用兩輪驅動，而45以上則會配備 quattro 四輪驅動系統，所以這部 e-tron 40 採用後輪驅動是意料中事，但原來抵港的 e-tron 45 都係後驅設定，不過相信車主唔會介意採用有更好續航距離表現的後輪驅動。

比較特別的，是後輪用了鼓式的制動系統，這個設定除了從未在電動車身上出現過之外，汽車亦從未試過會在驅動輪上採用「鼓剎」，而且唔只這輛 e-tron 40，就連動力輸出更強的 e-tron 45 都會採用後置「鼓剎」，咁到底夠唔夠剎？

廠方宣稱一定夠剎，因為電動車 90% 的時間都是用摩打剎車，同時又可以動能回收（Recuperation），前輪的碟式制動系統，其實只佔 10% 制動時間；至於採用鼓剎，在保養維修方面，則有更經濟便宜的優點。

這部英國版 e-tron 40，摩打輸出204ps及310Nm，0-100km加速8.5秒，續航距離529km。軚盤配備加減撥片，雖然無波箱，但利用摩打磁極阻抗，一樣可以做到拖波效果；拖波減速分為三段，分別可做出 0.06g、0.1g 及 0.15 的阻力強度；先用制動輕輕減速，同時按下減速撥片，第一、二檔都好順，似半自動波箱；再按第三檔，有輕微突兀感，最啱用來keep住落長命斜。

馬力輸出唔算好勁，大腳踩電，一樣可以產生瞬間離心力，不過加速力好快回復線性。我一向都幾like平治與Audi的制動設定，柔得嚟又唔會唔夠收，回腳停定又唔會突兀，估唔到今次用「尾鼓」都可以保持水準。

車廂好靜好舒適，轉向靈敏度及指向性都唔錯；懸掛寬容度高，可以兼顧到駕駛人與乘客的需要。好揸易揸，穩打穩紮，但無乜駕駛趣味可言，這個都係時下電動車的普遍現象。補充一句，今次比較特別，測試的是英國版e-tron 40，但規格表卻是在港發售的e-tron 45。

優點
・拖波自然
・乘坐舒適
・操控容易

缺點
・Drive Select 按鍵不就手

2023 Audi Q4 e-tron 45 規格表
摩打形式：恆磁摩打
電池容量：82kWh鋰離子電池
最大馬力：286ps
峰值扭力：545Nm
續航距離：547km (WLTP)
傳動形式：後置摩打/後輪驅動
傳動系統：單速直接驅動
0-100km/h：6.7秒
極速：160km/h
懸掛系統：(前)麥花臣/ (後)多連桿
制動系統：(前)通風碟/ (後)鼓式
輪圈：20吋合金
輪胎：(前/) 235/50 R20/ (後)255/45 R20 Bridgestone Turanza
長x闊x高：4,588 x 1,865 x 1,611mm
軸距：2,767mm
車重：2,020kg
電耗：24.0-20.1 kWh/ 100km (WLTP)
售價：HK$479,800 (one-for-one replacement scheme)