台東擁有超長海岸線，除咗係欣賞超藍太平洋嘅最佳地方，仲可以去綠島或蘭嶼玩潛水、睇海龜、玩SUP立漿、浸世界唯二的海底溫泉，咁唔玩水有咩好玩呢？

東海岸都有天空之鏡？
有！台東呢個近年越來越多人趨之若鶩衝去打卡嘅都歷海灘，被冠以天空之鏡的美譽，佢嘅真名其實好靚：Pacefongan 巴茲風岸。 呢個沙灘非常平坦，沙係好幼細嘅黑沙，當潮退時只得一層好薄嘅海水覆蓋在沙灘上，所以可以好似鏡面咁反射沙灘上嘅所有物件、包括天空。 在沙灘上漫步會真實體會到咩叫做海天一色，嗰種感覺好難用言語來形容，好夢幻。

咁靚嘅沙灘，如果可以揸架靚車或者電單車落來一定可以影到好靚嘅相，你係咪都係咁諗？ 不過！因為附近就係都歷部落同民居，越來越多嘅遊客已經干擾到當地居民嘅生活，所以目前已禁止任何車輛進入（單車可以），所有人都需要在附近落車然後步行10～15分鐘前往海灘。 切記切記。 出發前記得check咗潮汐表先(https://www.cwb.gov.tw/V8/C/M/tide.html)，唯有退潮但又未退到最低既時候至係perfect timing。 當然，如果你想在呢個沙灘上逗留全日、玩水衝浪或者淨係坐喺沙灘吹海風睇海浪，你一定遇到佢倒影範圍最大效果最靚嘅時刻。 但提提你，就算計啱潮退時刻都未必見到天空之鏡效果，P編第一次去時就遇到狂風大雨，乜影都無！哈哈～ 網上見到有人在呢個沙灘影到好靚嘅日出，認真羨慕。

如果自己揸車去，導航set 【都歷沙灘天空之鏡-福德宮小路】，見到路邊有間7-11，隔離就係通往海灘的路仔。 在附近泊好車然後步行就可以到沙灘。 沙灘附近無淡水可以沖洗，記得回程途中留意路邊有當地居民設嘅淡水沖水處，免費或者象徵式收少少費用（e.g.台幣10元）。
* 呢度無救生員駐守，無論玩水定衝浪都要多加小心。 游水係絕對不建議，東海岸海面看似平靜但浪多且急，離岸十幾米就即刻係100～500米深、再遠少少就係深度達兩萬米的世界上最深海溝，當地居民都唔會選擇喺呢度游水。

浪花蟹聽過未？
浪花蟹(Hippa ovalis)體型好細，無論size或者顏色或者形狀都好似沙灘上最常見的圓石仔，係大自然最成功的偽裝術之一。 但其實佢係蟬蟹科生物，又叫橢圓蟬蟹、太平洋蟬蟹、倒退嚕（打倒褪），以腐爛植物或動物腐肉為食。 聽個名就知佢嘅行走模式 - 無錯就係向後褪，褪去邊？褪入沙裡面匿埋囉； 橢圓係形容佢既體型，太平洋則帶出咗佢嘅生活地區。 佢地通常住喺沙灘上海浪所到之處，每逢有浪拍埋案就由沙入面捐出來覓食，浪退就即刻打倒褪匿返入沙。 東海岸邊的居民熟悉佢嘅習性，通常會在沙灘上以魚肉或海鮮內臟為餌設下陷阱，蟬蟹的嗅覺非常靈敏，無法抗拒美食嘅佢地好快就聚集在陷阱附近，呢個時候只需要用筲箕將附近的沙?起、再將沙篩走就會見到一粒粒‘石仔’留在筲箕內。 當然都會有唔少真石仔，蟬蟹偽裝咁勁而且擅長詐死，一個唔小心就會將佢地當係石仔拋返落海，要落足眼力搵啊。 不過由於浪花蟹對環境污染非常敏感，所以依家已經越來越少啦，得返東海岸少數地方可以搵到。 其實佢地咁細隻就算幾十隻都唔夠攝牙罅啦，大家如果有機會去海邊玩捉浪花蟹，真心建議大家影完相就放返佢地返屋企，等呢種咁可愛嘅生物可以繼續生活在太平洋海岸。

想去搵浪花蟹玩？ 可以去台東大武鄉。 大武鄉雖然位置比較偏遠，但呢度外海有全世界少見的湧升流，含豐富營養鹽，所以有大量深海魚在此迴游棲息，附近居民以漁業農業為生。 因為偏遠所以街道巷弄仍保持住2、30年前的色彩，大武老街上有清朝所建的福安宮、日本神社遺址、依家已經絕跡的碾米廠等等。 用‘浪潮尋蟹’呢幾個關鍵字去搜尋，就會搵到相關活動，由當地居民帶你地去沙灘set陷阱捉浪花蟹、等待期間仲會帶大家沙窯悶烤，幾好玩㗎。