林寶堅尼都玩NFT

林寶堅尼同NFT Pro及RM Sotheby's 拍賣行合作，拍賣由藝術家Fabian Oefner創作嘅五組實體及數碼藝術品。每場拍賣持續75小時50分鐘，正正就係阿波羅11號離開地球進入月球軌道所用嘅時間。

堂堂超跑車廠都玩非同質化代幣（NFT），你可以當管理層係跟經頂白，但實情係林寶堅尼曾經將碳纖維複合材料，作為聯合研究項目的一部分送往國際太空站，呢批碳纖維複合材料於2020年返回地球，正好NFT近期大熱，廠方就將呢批往返過太空嘅碳纖維，成為林寶堅尼實體藝術品「太空鑰匙」的一部分，在碳纖維部件刻上獨一無二嘅二維碼以聯繫數碼元素，成為五張林寶堅尼Ultimae飛向星空嘅系列照片，每組NFT藝術品像素都超過6億！放大睇睇就會發現超寫實照片中嘅隱藏細節。圖像刻畫咗車輛在幾秒內從地球升至太空嘅五個不同瞬間，而車嘅部件、引擎、波箱、懸掛及數百個螺帽及螺栓，如同火箭排氣火焰般從底盤噴射而出。