全新SF90 Spider係去年推出嘅SF90 Stradale跑車嘅開篷版，同時亦成為法拉利首款硬頂開篷混合動力超級跑車，而且結合1000匹馬力嘅插電式混合動力，0-100km/h只需2.5秒，0-200km/h都只係7秒。

Photo by：Playful

型號中嘅SF係法拉利賽車部Scuderia Ferrari縮寫，而90就代表法拉利賽車部踏入90週年。SF90 Spider既然係法拉利插電式混合動力超跑嘅雙生花，所以亦共享SF90 Stradale嘅大多數硬件及軟件，包括由780匹嘅4公升V8渦輪增壓引擎，及三個合共220匹馬力電動摩打組成嘅插電式混合動力系統，而4公升V8引擎排氣聲浪，就成為發出澎湃誘人音符嘅機器。

為咗滿足車迷要享受強悍悅耳嘅引擎轟鳴聲，排氣系統亦經過特別設計，透過廠方稱為「熱辣管道」嘅音頻導管，將引擎排氣聲浪更直接地傳入車廂；廠方宣稱與之前嘅法拉利V8系列相比，能夠在整個引擎呼吸頻率範圍內，產生更飽滿，更豐盈嘅音頻，而隨住引擎轉速嘅提升，亦可以帶來更澎湃誘人嘅引擎排氣音符。

至於三個電動摩打，兩個驅動前輪，第三個就裝置於後軸，設於引擎與8前速雙離合器波箱之間，並應用了源自一級方程式嘅設計，集動力輸出及回收功能於一身，整套混合動力總輸出馬力達到1000匹，同時亦組成全時四驅系統。

以鋁合金製成嘅可折疊式硬頂開篷設計，除咗比用鋼造輕咗40公斤之外，無論係打開定關上都只需14秒便可完成，而且可以在時速45公里內行車時開或開硬頂。整個設計最巧妙之處，係打開後嘅硬頂，係收納在引擎艙之前，所以無論係開頂定係關上硬頂，都一樣可透過引擎艙蓋欣賞中置於後軸前嘅V8引擎。

當關上可折疊式硬頂時，SF90 Spider嘅空氣動力學效率及下壓力數值幾乎與SF90 Stradale完全相同；打開硬頂時，又能將湍流與噪音降至最低水平，同時又可完善引擎艙內部氣流通道。車尾嘅主動控制尾翼系統，在正常車速模式下，氣流通過尾燈之間通風孔道排出。 在高下壓力模式下，尾翼嘅中央部件會下降並阻止氣流通過，從而形成了巨大嘅閉合式尾翼效應，在時速250公里時可產生390公斤下壓力。

全新嘅E-MANETTINO駕駛模式選擇系統設有Hybrid、eDrive、Performance及Qualify四種模式。車輛發動時會預設進入Hybrid模式，系統會自行調節引擎及馬達的動力輸出比例，在情況許可下會停止引擎運作，以減低油耗，而在純電動eDrive模式下，車輛單靠兩個前輪馬達就能以最高135km/h的車速行駛，在eDrive模式下最高續航力為25公里，而選用Performance模式時引擎會長期啟動，為電池補充電量，至於在Qualify模式下，引擎及馬達均會全力運作，輸出1000匹峰值馬力。

新車售價由港幣八百八十餘萬起，首批SF90 Spider新車，將於今年底前抵港，SF90 Spider與SF90 Stradale一樣都提供Assetto Fiorano專屬升級版，性能更賽道化，配備基於法拉利GT賽事經驗而製成嘅多功能吸震懸掛，加上碳纖維材料及鈦金屬材料嘅應用，車身重量減輕21公斤，仲有係配備碳纖維後擾流以及專為為提升在賽道乾燥路面表現而特別設計嘅米芝蓮Pilot Sport Cup 2輪胎。