雖然體形再流線多啲，輸出又再輕微增長，但賣點是連 S-Class 都仲未有的智能語音系統。

望住呢部第四代A仔，再睇番我廿年前試過的第一代A 190，真係不得不嘆句時光飛逝，歲月不饒人；當年呢部 A 190，1.9公升引擎輸出125hp，用嚟代步是ok的，但想劈番轉就真係唔好諗了。不過咁，當年呢部入門車系就拉低咗 Benz 的入場門檻，可以令更多人一嚐平治車主的滋味。

愈來愈流線
睇番編號W168的第一代 A-Class，車長3,575mm，車高1,601mm，數字屬於輕胖級，雖然有個滑梯式車頭，但體型局限了剪裁手法，觀感始終不及同門兄師瀟灑。不過從第二代開始，設計師就開始進行健美計劃，所以來到編號W177的第四代A仔，跟第一代比較已經長了844mm，矮了161mm，成部車的感覺已經完全唔同晒，風阻系數亦只有0.25Cd，比上一代更加流線。

降容積增馬力
測試的 A 200 屬於入門型號，換了四條 18吋AMG 輪圈及全套 AMG 車身擾流，觀感唔錯，車頭有啲似 CLS。經過改良的第二代 MFA 底盤，前懸掛是麥花臣，後懸掛就要視乎型號而定，A 200 用扭力桿，A 250 或以上型號就用多連桿；軸距長了30mm，車廂比上一代寬敞，尤其後座的腳部空間。編號 M282 的1.4公升渦輪增壓引擎比上一代 A 200 採用的 1.6公升引擎輸出多了 7hp，重點是增強動力之餘，又可降低容積至千五c.c.以下，慳番近兩千元牌費。

不同型號不同尾擔
四汽缸渦輪增壓配 7前速雙離合半自動波箱，自動轉 波不動聲色，動力傳遞非常緊湊；基於後輪採用扭力桿的關係，彎路的寬容度不及上一代的多連桿設計，但喺巿區及公路的表現，比起其他採用相同懸掛結構的汽車，A 200 的舒適及穩定性方面都比較優勝。自選行車模式之中，我認為 Sport mode 喺轉檔時機與懸掛設定之間的配合最適合跑山，至於 Sport plus 雖然可令引擎進入顛峰狀態，但 understeer 的情況會比較明顯。

聲控車廂設備
我覺得 A 200 最正係標準配備了科幻味十足的 MBUX (Mercedes Benz User Experience)，呢套有啲管家 feel 的智能語音啟動系統，無論駕駛人或乘客，只要講聲：「Hey Mercedes」，再講出你的需要，系統就會啟動車廂各項設備來配合你的需求，可控的範圍亦非常廣泛，由音響音量、開關車窗、冷氣風速以至配合導航系統揾地方醫肚等，都可以透過 MBUX 去解決問題，有咗呢套裝備，駕駛人就可以更專心揸車。除此之外，主動安全機關亦達到 S-Class 級數，最先進的 4.5代 Intelligent Drive 駕駛輔助系統，內置PRE-SAFE 主動安全防護、主動防撞輔助與移動行人偵測、停車輔助、閃避轉向輔助、定速測距輔助、車尾安全防護及車道維持輔助等等，先進設備可以話同級之冠。

2018 Mercedes-Benz A 200 規格表
引擎：L4 Turbo
容積：1,332c.c.
馬力：163hp@5,500rpm
扭力：250Nm@1,620rpm
傳動：前置引擎/前輪驅動
波箱：7前速DCT雙離合半自動配軚盤+/-轉檔
0-100km/h：8秒
極速：225km/h
懸掛：(前)麥花臣/ (後)扭力桿
制動：(前)通風碟/ (後)實心碟
輪圈：18吋合金
輪胎：(前/後) 225/45 R18 Bridgestone Turanza T005
長x闊x高：4,419 x 1,796 x 1,440mm
軸距：2,729mm
車重：1,280kg
油耗：5.6-5.2L/ 100km (Combined)
廢排：133g/km
售價：$349,000