玩過界・型到盡 Volvo V90 T5 Inscription Cross Country

型得嚟又要機動性夠強，都唔一定只有SUV的。

早輪睇過一篇文章，內容係講作者點樣透過買賣二手玩具教導子女理財，方法是去二手店變賣自己的舊玩具，換到嘅錢就去買另一件喜歡的玩具。經過幾次之後，小朋友開始發現玩具隨着拆盒一刻開始便立刻折舊，從中悟出Liabilities，明白到只有Assets才可以不斷製造Cash Flow，甚至增值，於是開始籌算點樣做先可以得到最大回報。我唔知咁樣的數字人生，小朋友將來會唔會變成一個銖錙必較嘅巿儈佬，不過我就唔會利用玩具去教小朋友理財概念。

橫行的買車指標
提起折舊，我諗無乜嘢的折舊率會勁得過一輛新車，所以搞搞下，香港人買車就變咗先看二手巿場承接力，確保二手價格唔會一落千丈；至於小朋友在挑選玩具時會考慮到保值能力，或者就係呢種所謂「精明消費」的延伸。講咗咁耐，其實係想話畀大家聽，好多嘢，唔可以一味用錢來衡量的。

不一樣的調校
喺呢種二手價主導新車銷售量的大勢之下，我無打算用文字說服大家去買一部德國以外的歐洲車，不過咁，扑鎚前，我建議約部Volvo親身試一試，比較一下大家的設計、用料及調校，了解一下雙方的優缺。以配備自選駕駛模式的電子底盤為例，我覺得Volvo在Comfort mode方面的濾震表現比同級德國車更細緻更舒適，特別欣賞佢喺啟福道橋面往舊機隧方向那種粗糙路面的處理手法，類似的表現，我曾經在平治S-Class感受過。

越野四驅旅行車
今次長測的V90 Cross Country T5，是旅行車與越野車的混合體，相同車種有Audi的Allroad系列，呢類輕型越野概念或者係跟瑞典佔逾60%的叢林有關。咪以為佢只係一部升高咗懸掛的旅行車，其實除咗擁有210mm的離地距之外，仲有越野車必備的四輪驅動系統、HDC下坡緩降控制及HSA上斜起步輔助裝置，而且為咗強化越野性能，自選駕駛模式仲加了一項off-road功能，不過五天測試都無機會用到呢套裝備。

型得內斂
旅行車版的V90，個look本身已經好夠台型，Cross Country再把離地距升高65mm，加埋前後輪拱及泵把採用的耐磨塑料， 優雅得來又帶幾分粗豪，成個外形及比例真係幾得，呢種內斂又有時代氣息的設計，相信會幾襟睇。
比起時下流行的橫置顯示屏，Volvo的直置一體化可以更加善用中控台；車廂設計，貴氣中唔會覺得浮誇俗套；電動前座椅標準配備按摩功能，只要轉一轉調校鍵外圍的圓鈕，9 吋Sensus彩色觸控顯示屏就會出現座椅的調校功能圖像，呢個時候就可以選擇調校或按摩的位置、按摩的力度或速度等，一邊揸車一邊按摩都咪話唔盞鬼。內置的City Safety系統，包括轉向盲點監測警示BLIS with Steer Assist及閃避對頭車警示Oncoming Lane Mitigat，載住家人可以多一分保障。

輸出兼顧舒適
睇過片，外國有啲車主揸住呢部Cross Country玩慢爬越野，無諗過一部高腳版旅行車都可以玩到斜插30度落山單轆離地咁鬼激，不過我估香港無乜邊個會捨得攞佢咁玩法。V90 Cross Country的淨重拍得住一輛同屬四驅的平治GLE，事關主體結構採用Boron Steel，而唔係時下流行的鋁合金，好處係夠彈性，撞擊時可以保持車體完整度；雖然係重咗啲，但呢副兩公升引擎輸出都唔弱，只是為了減少突兀提高舒適度，油門的初段反應用咗偏柔的設定。

悠然自得
切換到Dynamic mode，軚盤重咗少少，感覺路訊多咗；波箱加速反應快咗，但縮油再踩的反應依然保守；懸掛韌性高咗，整體上仍然以舒適為主，唔會有種好強烈的戰鬥感覺。雖然軸距偏長，但彎道表現幾靈活，幾準，我最欣賞係底盤調校與動力輸出嗰種從容不迫的協調。五天測試，先後錄得ECO、Comfort及Dynamic mode的每百公里耗油量為8.6L
、10.2L及15.7L。

人生，有好多嘢唔可以單單用金錢去衡量價值的，很多陪伴我們成長的事物、情愫、經驗、過程等都係無價的，把自己喜歡的東西都先交由巿場去衡量價值再做選擇的話，最多都只算係消費層面上的精明而已。

Volvo V90 T5 Inscription Cross Country 規格表
引擎形式：L4 Turbocharged
汽缸容積：1,969c.c.
最大馬力：254hp@5,500rpm
峰值扭力：350Nm@1,500-4,800rpm
傳動形式：前置引擎/四輪驅動
傳動系統：8前速Geartronic配軚盤+/-轉檔
懸掛系統：(前)雙搖臂/ (後)多連桿
制動系統：(前/後)通風碟
輪圈：19吋合金
輪胎：(前/後) 235/ 50 R19 Michelin Latitude Sport 3
長x闊x高：4,939 x 1,879 x 1,543mm
軸距：2,941mm
車重：1,934kg
0-100km/h：7.4秒
極速：230km/h
耗油量：7.4L/ 100km (Combined)
碳排量：169g/km
售價：HK$699,800