同一款車，一部汽油，一部混能，你會點樣揀？

在此順個便同各路親朋損友解釋一下，關於車的問題，我唔介意被人問長問短，但如果諗住經我買車會有discount 甚至special offer的話，咁就誤會晒囉。

睇你點用
朋友最近睇中咗豐田Sienta，但唔知應該揀汽油偈，還是油電混合的雙動能。如果你都煩緊揀邊部，我會建議從使用密度方面做先決；差唔多日日都會揸就畀多$49,000買hybrid，假日車手甚至一個月都用唔到一缸油的，咁就最好揀汽油偈，因為電池要經常用先至襟用先至發擇到最佳狀態，呢個係充電池的特性。

主打慳油
進入第二代的Sienta，理念係Active & Fun，設計靈感來自運動鞋，冇咗第一代嗰種呆呆地的萌樣。今次長測的Sienta Hybrid，雖然多咗一套電力驅動機關，但為咗進一步減排省油，換上另一副編號1NZ-FXE的VVT-i引擎，1.5公升直4引擎的輸出被調低至74ps，總馬力輸出比汽油版2NR-FKE的VVT-iE少咗9ps，再加埋總重多咗50kg，所以加速力一定唔及汽油版。

低重心設計
超扁形油缸設在中座乘客的屁股下方，而用於電動摩打的鎳氫電池則放在中座乘客的腳下，除咗有效降低重心之外，亦不會影響行李艙容積。不過電池放得咁低就必須做好保護工作，為咗防止碰撞時有任何差池，電池殼用咗較厚的金屬板，而形狀方面亦經過特別設計。

加速比較慢
雙動能與汽油版本都係配無段變速波箱，前者係Electronically Controlled CVT，後者係Super CVT-i。一般巿區及公路，呢副Electronically Controlled CVT的表現算幾滑幾順，但傳動反應比較鈍，kickdown加速會有啲跟唔上引擎的瞬間提速。轉數表由效能表現代替引擎轉速，踩上PWR區域，傳入車廂的運轉噪音都幾明顯，只要順住揸唔好咁狠死，車廂寧靜度都ok的。

易揸易睇位
行巿區及公路，同揸房車一樣咁定，以一輛小型MPV嚟講，軚感稍為偏重，但路面訊息唔算豐富。山路揸狠少少，轉向初段反應唔錯，車身傾幅可以接受；彎心扭住軚地板油踩住出，冇出現understeer，但四個轆開始輕微跣出外彎，不過只要稍為放鬆油門就可以返回軌道，呢種底盤調校方式在臨界失控時，對一般駕駛者而言會比推頭更容易操控。望望耗油數字，估唔到咁樣踩盡都係15.1km/L (6.6L/100km)。

坐得人擺得貨
車廂有好多唔同大小的儲物格，如果冇數漏，應該有13個，實際用起上嚟，會發覺有啲會細咗少少，有啲深度唔係咁夠。座椅布局是2+3+2，只要中排乘客遷就下，唔好咁霸道，第三排絕對有充裕空間容納兩名成年人，最難得係在咁有限的車廂空間，行李艙仲可以放到一個26吋的行李喼，呢種吞吐量在同級Compact MPV之中並唔多見。想增大行李艙容量，可以把整張後座收摺入中排座椅的底部，最正係收摺系統有埋輔助力機關，就算係楚楚可憐的女車主都可以輕易把整張座椅拉起或放入中排椅底。

塞車都慳過人
長測4天，在未有使用ECO mode的情況下，錄得平均耗油18.5km/L (5.4L/100km)；早上駛入最塞車的中環路段，竟然可以去到19.6km/L (5.1L/100km)，點解塞車反而仲慳油？估計係因為大部分時間處於起步及時速低於40km有關，事關呢種情況下會以摩打驅動為主。如果你想揾部慳油實用的7人車，又需要經常用車，呢部勁慳油的Sienta Hybrid值得留意番。

Toyota Sienta Hybrid 規格表
引擎：L4 DOHC VVT-i
容積：1,497c.c.
馬力：73ps@4,800rpm
扭力：111Nm@3,600-4,400rpm
摩打：恆磁同步交流
馬力：61ps
扭力：169Nm
傳動：前置引擎/前輪驅動
波箱：CVT無段變速自動
懸掛：(前)麥花臣/ (後)扭力桿
制動：(前)通風碟/ (後)實心碟
輪圈：16吋合金
輪胎：(前/後)195/50 R16 Yokohama dB decibel E70
長x闊x高：4,235x 1,695 x 1,675mm
軸距：2,750mm
車重：1,380kg
油耗：27.9km/L (JC08)
售價：$278,950