又平又劈得 Ford Grand C-Max

如果你揸緊Hothacth或者Wagon，正打算換部MPV的話，不妨試下呢部Grand C-Max。

揸得斬尾車，唔多唔少對操控都會有啲要求；不過鍾意還鍾意，成家立室之後，開始知道呢個世界唔係得你一個，以前的輕狂、任性、傲慢，一下子被責任感徹底封殺，開始懂得欣賞MPV的實用，但亦懷念Hothatch的敏捷。

夢幻組合
要揾一輛有操控感的MPV，唔算難，又要同時配備低容積低耗油引擎，都未算難，如果仲要車價平過一輛Corolla Super Luxury的話，就唔係咁易。今次長測的Ford Grand C-Max，唔只有齊以上要求，而且仲要係made in Germany，呢個夢幻組合真係可遇不可求。

行李艙偏細
進入Grand C-Max的車廂之前，首先要搞清楚佢只係一輛細碼MPV，所以唔好對車廂空間有過份幻想。設計師明白到7人車唔一定經常高朋滿座，所以中排有個叫Fold Flat System，可以把中座收入右座椅墊裡面，開通一條貫穿中後排的walk-through，日產Serena亦有同類設計。後座可以坐到兩位1,750毫米高Body Mass Index合符國際 標準的成年人，但鬆動位唔多，短途車可以接受，所以我會建議把後座留畀小朋友，又或者嗰啲連溶解液都分唔開的熱戀男女；不過咁，行李艙容積只有115L，如果行李稍為大件啲，就沒可避免要摺起後排，把容積增至880L，仲唔夠，可以連中排都瞓低埋，載運量可倍增至1,867L。個人認為駕駛艙中控台的設計唔錯，不過呢種咁立體的設計，某程度上亦偷走了唔少車廂空間，犧牲咗行李艙容積。

將配第三代多媒體資訊系統
今次長測的Grand C-Max，中控台多媒體系統屬於舊款的SYNC 2，遲啲會換上第三代SYNC 3，不過相信車價亦會相應調高。新系統主要是提升反應速度，簡化操作介面及增強語音輸入的理解能力等。其他設備仲有香港人最like的全景天窗及8吋輕觸式屏幕配泊車鏡頭等；唯一使人掃興的，可能係雙趟門不設電動功能。不過無「電趟」都唔一不定係壞事嘅，相信好多MPV車主都曾經試過跟中排乘客糾纏於趟門開閂之間，手動就無咗呢種尷尬情況。

線性的加速反應
動力心臟是輸出150hp的低壓渦輪增壓引擎，直噴、雙凸、鋁缸、多變正時，兼且是EcoBoost系列中第一副配備電腦控制水冷系統的引擎，1.5公升，容積剛剛好。配合6前速Select Shift全自動波箱，用D檔行車，加速線性；雖然無自選行車模式，但只要拍入S檔，動力傳送會生猛番晒。長測4天，巿區行車錄得平均耗油10.7L/100km，比較奇怪的是，我以D檔沿三號幹線順行至元朗一段高速公路，每百公里油耗只係輕輕降低至10.5L/100km，睇番油針的整體降幅，我認為實際耗油應該更少，這個可能跟系統運算的時間及方式有關。

似揸旅行車
換得MPV，就要預咗重心放晒在屋企人身上，所以底盤跟駕駛人無乜兩句，係好正常的事，如果本身揸開揭背車或者跑房車，對住一類零溝通又或者天然呆的MPV真係會幾無癮的。
第一次揸呢部Grand C-Max，扭了幾個街坊彎之後，已經發覺部車好好揸，傾幅度比預期少，路面感唔算好豐富，但可以感受到懸掛做緊嘢兼有預見性，同級的Touran亦有類似的感覺，不過Grand C-Max的roll center更低，擺動更微，高速彎表現更加寬容，似揸緊一部wagon多過MPV。漏震能力唔錯，懸掛反應漸進而有層次感，雖然跑上龍翔道的路噪較為明顯，但對駕駛人來講，MPV可以在這種迂迴公路有咁正的操控表現，再加埋一個超級無敵價，呢少少噪音完全唔成問題。

2017 Ford Grand C-Max 規格表
引擎：L4 DOHC Turbo
容積：1,498c.c.
馬力：150hp@6,000rpm
扭力：240Nm@1,600-4,000rpm
傳動：前置引擎/前輪驅動
波箱：6前速全自動配軚盤+/-轉檔
0-100km/h：10.2秒
極速：199km/h
懸掛：(前)麥花臣支柱/ (後)多連桿
制動：(前)通風碟/ (後)實心碟
輪圈：16吋合金
輪胎：(前/後) 215/55 R16 Michelin Primacy 3
長x闊x高：4,519 x 1,828 x 1,662mm
軸距：2,788mm
車重：1,496kg
油耗：6.6L/ 100km (Combined)
廢排：119g/km
售價：$209,900