暖男實錄 Lexus RX 200t F Sport

咪睇佢起晒角就以為好惡，其實佢不知幾知情識趣，仲好善解人意！

我仲記得第一代RX 300，舒服......前面兩個吖嘛；坐後面，扭多兩隻S彎，就開始見頭暈，去到第二代RX 350都係差唔多，唔知道，仲以為自己耳朵前庭神經系統出了問題。

扭多幾手有啲暈
凌志房車，ok的，我坐親後面，有個動作必做 - 瞓；唯獨佢嘅SUV，住半山真係要諗清楚。十幾年前，有朋友買了一部，開唔夠三個月，即賣，因為老婆同班friends都話，坐後面時有啲暈眩感，唔舒服，於是以後買車醒了，識得試埋後座。到了今日第四代RX 200t，到底仲係咪咁？

加料炮製
今次長測的RX 200t，是F Sport版，外裝加了擾流組件及20吋輪圈；內裝換了金屬腳踏，加配軚盤+/-轉波撥片，軚盤、座椅都升晒「呢」，還有可因應駕駛人的操控方式而自動調節避震緩衝阻力的Adaptive Variable Suspension電子懸掛系統，咁多樣嘢加埋都只係比普通版賣貴9萬左右，但重量就多了大約75kg，唔介意的話，F Sport值得考慮。

兩公升渦輪增壓年代
要推郁一部兩噸車，現今科技係零難度，不過要達到極高水準的燃油效能表現就一啲都唔容易。兩年前，豐田研製出一副8AR-FTS，這副兩公升直四機器，可以話是日本重投turbo懷抱的高水準代表作。

雙重呼吸技術
豐田對上一副渦輪增壓引擎，已經係上世紀的產物，呢副放在Supra車頭的2JZ-GTE到底有幾堅，我諗已經唔使介紹番；問題係，十多年後的今日，到底憑乜嘢同歐洲先進的兩公升直四機器鬥呢？
大家應該仲記得豐田的VVT-i，呢項可以提早把進氣門打開，畀引擎吸多啲新鮮空氣，同時又可以延遲排氣門關閉時間，畀廢氣排放得乾淨啲的技術，除了繼續放入全新研發的8AR-FTS機器之內，還加入一項可延遲進氣門關閉時間的VVT-iW系統。

雙重噴注技術
可以同時增加進氣時間及延遲排氣時間，換句話，在引擎高轉時，能夠產生更大的進排氣重疊角度，令Otto-Cycle及Atkinson-Cycle可以同時並存，輸出更澎湃。另一項針對供油的D-4S技術，高轉時用缸內直噴，低轉時就轉用傳統的進氣歧管噴射，能做到高效率而低耗油的表現。至於渦輪增壓則採用中低轉有更好反應的雙渦流設計及以較短的排氣管道來增加渦輪壓縮側葉片的驅動效率，加埋水冷設計來提升冷卻效果，由呢三項頂尖科技精煉而成的8AR-FTS，除了是RX 200t的動力心臟之外，更是當代數一數二的渦輪增壓引擎。

用六速有原因
無論標準版還是F Sport，輸出都是238ps，不過F Sport加咗大量配件，雖然型咗，但亦重咗，在相同輸出之下，加速相信會有少少分別。講真，呢副偈，加速力唔算猛，頭段有少少NA的味道，不過就係我揸過最滑溜的直四機器。可能有人會問：「歐洲嘅11前速都就嚟殺到埋身，仲揹住副6前速怕唔怕畀人笑呀？！」又係嘅，當IS 200t同GS 200t都行緊8前速，又真係講唔通喎；不過咁，RX 200t係屬於橫置引擎底盤，再加上四驅系統及豪裝設備，車重已經近兩噸，如果配埋8前速波箱的話，一定過兩噸。不過重量都係其次，最大問題係會直接影響車廂空間，咁你寧願要8前速，還是坐得舒服啲闊落啲？其實以D波行車，無論選ECO或Sport S+，呢副6前速Super-ECT的轉波動作都好順，手動拖波都幾滑溜，如果畀我揀，我會揀闊落的車廂空間囉。

不用分神的自選模式操作鍵
不過我覺得科技都係其次，凌志最正嘅，係嗰班挑通眼眉的設計師。點解？
家陣好多新車都配備咗自選行車模式，但大部分選擇過程中都好易令駕駛人分神，而凌志的Drive Mode Select，可以話係我試過同類系統中最方便又最就手。選擇旋鈕位於杯架的下方，逆時針扭係ECO，順時針扭係Sport S，扭多下係Sport S+，再扭多下又變番Sport S，按下整粒旋鈕就係Normal；而F Sport版再加多咗一項Customize，只要撳多一下旋鈕，就可以切換到預先設定的自編行車模式，駕駛人可依個人喜好，預先在多功能資訊整合系統中對輸出、底盤及冷氣進行獨立設定。簡單的一粒掣，以不同的操作方法來代表不同模式，用起上嚟自然更得心應手。旋鈕隔籬仲有個小型有蓋儲物格，因為形狀扁平體積又夠大，用嚟放「大餅」過隧道就唔使大海撈針。

每項細節諗過度過
波棍前方有個開放式置物位，夠闊又夠長，仲有埋塊防跣膠墊，最啱放電話。雖然很多中價新車，標準已配備記憶功能駕駛座椅，但大部分的編程都一定要先熄匙，打開車門之後，座椅同軚盤先至會自動退開，有時只係想停一停車去行李艙攞少少嘢都幾唔方便；想recall番預設座姿，又要長撳記憶鍵，撳到座椅及軚盤完全回復預設setting先放得手。凌志班設計師都知道咁嘅服務態度唔多掂，於是重新設計編程，唔使熄匙了，只要鬆開安全帶扣，駕駛席同軚盤就會自動退後及升高；當你打開車門準備落車時，整個動作剛剛好完成晒；需要recall預設坐姿時，撳一下記憶鍵就得了，呢啲咁暖嘅設計，連歐洲最豪的車廠都唔夠佢咁細心。

雨撥都唔放過
天陰，多雲，間中有雨， 雨勢有時頗大及有幾陣狂風雷暴，長測五日，路面幾乎無一分鐘是乾的；戶外活動唔使諗，雖然浪費咗咁大個行李艙，不過就發現咗有對超靜雨撥，而且撥咗成粒鐘雨都無怪聲，好多車，暴雨下撥幾分鐘已經發出膠邊夾雜雨水磨擦玻璃的「架架」聲，唔知道凌志的工程師又花咗幾多時間心機去研究呢個項目。

似曾相識的綿韌感
講到時間心血，就一定要提提佢套內置30種調節程式的AVS電子懸掛系統，在任何行車模式的情況下，佢都會依據駕駛人的操控方式來自動調節避震機的阻力級數；好明顯，以前嗰種舒服得嚟但又無乜路面感的情況已經無咗，後座的「S彎暈眩症後群」都好番晒；公路遇上被雨水沖壞的路面，本來已經做好晒心理與生理準備會出現中等程度的顛簸，點知比我想象中的振幅輕了60%，而且緩震得嚟，軚盤亦有唔錯的路面感；攻彎，佢唔似德國車嗰種硬朗或韌度，係一種自在的綿韌，同新一代Jaguar的懸掛反應有啲似。

在自己的雞蛋裡挑骨
連日暴雨關係，路面大部分時間都唔太暢通，錄得每百公里平均耗油13.2L，呢個數字，我相信幾接近平日塞車返工。其實呢部RX 200t F Sport仲有好多好暖的設計及編程，例如安全帶的鬆緊度，又或者行近座駕準備上車時，防盜解除與駕駛人接觸門把手在時間上的配合，都可以體現到凌志一班工程師還要比用家更雞蛋裡面挑骨頭，如果你是歐洲SUV的用家，就會發現這部RX 200t F Sport解決咗好多你忍咗好耐的問題。

Lexus RX 200t F Sport 規格表
引擎：L4 DOHC Turbocharger
容積：1,998c.c.
馬力：238ps@4,800-5,600rpm
扭力：350Nm@1,650-4,000rpm
傳動：前置引擎‧四輪驅動
波箱：6前速Super-ECT配軚盤+/-轉檔
0-100km/h：9.2秒
極速：200km/h
懸掛：(前)麥花臣支柱/ (後)雙搖臂
制動：(前/後)通風碟
輪圈：20吋合金
輪胎：(前/後)235/55 R20 102V Bridgestone Dueler H/L 33A
長x闊x高：4,890 x 1,895 x 1,690mm
軸距：2,790mm
車重：1,965kg
油耗：8.6L/ 100km (Combined)
廢排：181g/km
售價：$649,000