有研究指，要滿足男人對汽車的欲望，最少要同時擁有3部車，一部跑得，一部慳油又載得，一部要大方見得人。假如你資源有限又欲望無窮，只要願意在性能及裝備上遷就一下，CLA 200 Shooting Brake或者會係唔錯嘅選擇。

馬甲線、A4腰、9頭身、16腿、鎖骨放硬幣、反手摸肚臍、天使臉孔魔鬼身材、識打扮又慳家節儉、溫婉嫻淑善解人意兼剛柔並濟，再加埋出得大場面又入得廚房，就算只是幻想一下都已經要男人流到成地口水。咁完美嘅女人，唔是話冇，只係咁嘅筍盤又幾時輪到你囉！

滿足要求多多
揀車都一樣，要性能夠Sport又想Comfort一啲，外形靚得嚟又要有品牌知名度，要有個載多少少嘢嘅尾箱又想保持流線美，呢類車唔是冇，只是要求愈多愈矛盾，意味車價愈高。想平平地有齊上述要求，就要在性能及配備方面犧牲一下。

實用之餘兼顧外觀
今次長測的CLA 200 Shooting Brake，屬於CLA系列中的旅行版；雖然行李艙比Sedan增大了25公升，但495公升的容量唔算突出，點解唔做大啲？只要望望Shooting Brake的車尾，就會看到設計師在美感與載運之間採取了平衡的筆法，即是說，Shooting Brake比傳統Estate更注重外觀， 目的是要擺脫沉悶的旅行車格局。

黃金四十五度角
話我偏見也好，我認為旅行車先天外形就有拖泥帶水的缺點，就算CLA賣相幾咁型，Shooting Brake的設計幾有誠意，只要拍埋Sedan隔籬就會馬上失去一份瀟灑。不過話時話，要實用總會有點犧牲的，等於老婆入廚炒菜煮飯，你都無理由要人化行個妝吖，況且用45度角從後望部Shooting Brake，睇真啲，其實都幾有味道。

山路更易發揮
以這副頭轆底盤的深厚功力來應付一台千六機器，可以話殺雞用牛刀；引擎最大輸出只有156hp，所以就算採用sport mode，都唔會有強烈的推背感，不過充實的軚感與油門反應又很有高性能房車的味道；包容性極高的底盤及緊湊的7速波箱編程，諸如石澳道這類彎急路窄「大馬無著數」的山路，反而更能發揮該副千六引擎的特性，在迂迴山道中轉彎抹角，敏捷程度不會輸給A -Class。

中庸之選
入門級別的CLA 200 Shooting Brake，外形唔算驚豔，但長相唔差；性能中規中矩，但低轉起圍扭力充沛；沒有電子懸掛，但操控一樣穩定紮實；車廂裝潢唔算奢華，但設計與用料仍然是平治一貫豪華水準。油耗方面，以ECO模式行駛巿區公路164km，錄得平均耗油為8.1L/100km，節能表現唔錯。雖然CLA 200 Shooting Brake在實用、造形與性能方面均表現中庸，但42萬有找的車價就很有競爭力。

Mercedes-Benz CLA 200 Shooting Brake 規格表
引擎：L4 DOHC 16V Turbo
容積：1,595c.c.
馬力：156hp@5,300rpm
扭力：250Nm@1,250-4,000rpm
傳動：前置引擎/前輪驅動
波箱：7G-DCT雙離合半自動配軚盤+/-轉檔
0-100km/h：8.2秒
極速：225km/h
懸掛：(前)麥花臣/ (後)四連桿
制動：(前)通風碟/ (後)實心碟
輪圈：18吋合金
輪胎：225/40 R18
長x闊x高：4,630 x 1,777 x 1,435mm
軸距：2,699mm
車重：1,460kg
油耗：5.6-5.3L/ 100km (Combined)
廢排：124g/km
售價：$385,000