以前，性能及實用兩者只能選其一；現在，只要有錢，加埋越野都仲得。

我知我知，不倫不類唔正宗吖嘛！有啲嘢，如果係正嘅靚嘅，又無傷大雅嘅，咪接受下囉。好似呢部房車底、越野功能加跑房性能，再撈埋個四門轎跑外殼的GLE Coupé，無錯係有啲雜，但OK型喎！

混種再混種
明嘅，正如有些人，會堅持正音正字，有些人就贊成約定俗成。
我的態度係，不反對約定俗成，但正音就一定要知，唔好把錯當啱，約定俗成唔等於正宗。
講返車，變種混種的，唔正宗的實在太多，好似由跑車與房車組合而成的Performance Car，嚴格來說已經是一部混種車，只是日子久了，大家接受了。當然，呢種混血遠遠比唔上SUV Coupé咁雜，但如果下下講正宗，七除八扣之後，我諗整個車壇都會變得好dull好dry。

嘈到拆天
再講返這部GLE 450 AMG Coupé。
跟普通GLE系列比較，就如房車跟轎跑車之別，從外形可以一眼被分辨出來，還有輸出爆啲，轉向敏捷啲，避震硬朗啲，老套啲講，就是整體性能卓越啲。 仲有一樣，好緊要的，排氣聲勁好多好多，而且還有backfire，不過隔音做得好，坐在車廂的感受無咁強烈；到底出面把聲有幾勁？我在灣仔放低甜心寶貝蜜糖小姐之後，用sport plus一腳油直飆中環。之後，whatsapp有段留言：你知唔知頭先你走得好嘈，嘈到拆天咁嚇死人，成街人都望住你部車，可唔可以細聲啲呀下次。

最強系列
在GLE Coupé系列中，450 AMG Coupé對下有標準版400 Coupé，對上有Mercedes-AMG的GLE 63 Coupé。
講到這裡，對於不太熟識平治與AMG系列的讀者可能會一頭霧水，所以首先解釋一下3款型號的分別。
標準版400 Coupé，是沒有添加任何改件的純平治系列。而Mercedes-AMG則是平治旗下一個獨立的高性能系列部門，除了外觀會套上較為激進的擾流部件之外，心臟亦同時進行強化，並注入賽車技術及以「one man one engine」的理念完成組裝；為了配合強勁的動力輸出，制動、懸掛及部分電子系統都會經重新調校，而GLE 63 Coupé就屬於這個咁霸道的系列。

輕量級改裝系列
不過由於Mercedes-AMG系列跟標準版的性能表現差距太大，於是在2014年推出另一支AMG Sport系列，在標準版車身套上輕量的AMG擾流部件，而性能方面亦作出輕量的提升，因此被坊間視為AMG入門版。1年後，平治以AMG系列取代舊有的AMG Sport，但理念不變，正如今次長測的GLE 450 AMG Coupé。

惡車一族
配上AMG的頭尾泵把、電鍍頭唇、鴨尾翼、兩側金屬腳踏、21吋輕合金鈴，造型唔算高調，但很有肌肉感，着埋燈，還有點惡。大仔咁樣問我：爹爹，呢部車係咪Hulk揸㗎？不過車尾設計稍為內歛，夾唔到佢副兇狠樣。超斜的A及C柱設計，雖然使車身有更流暢的線條，但小心上車很易中頭獎。

大隻佬跑得快
跟標準版GLE 400 Coupé採用同一副3.0公升V6雙渦輪增壓機器，經調校後，由原本333hp增至367hp，只看數字，輸出屬中等貨色。不過揹住超過兩噸的重量，5.7秒可以完成0-100km/h加速，咁嘅身形嚟講都算幾快。
9G-Tronic波箱是首次配在縱置V6及4Matic驅動系列，不過我對平治的「軚波」真係無乜好感，所以比較鍾意有返碌短棍的A45；可惜，AMG今次唔再採用這種排檔方式，就算頂級版GLE 63 Coupé亦只配軚波。

塞車降温模式
依舊有能牽動駕駛人情緒的自選駕駛模式，Comfort能把她的狂傲性格徹底封印，只是徐緩步履對她來講根本是一種折磨，所以除了塞車我才會選擇Comfort為她的火氣降温之外，其餘大部分時間都會採用比較耗油的sport+，綜合4天錄得耗油量為13.2L/ 100km。

穩步電子系統
是咪好劈得？以一輛SUV嚟講，算係；懸掛硬中帶韌，轉向敏捷，波箱夠快，動力的覆蓋轉區夠廣，操控感紮實有跑車feel；高速殺入鶴咀彎，馬步好穩；直路尾收車進入S彎，一直brake到左彎回軚前，彎心再大腳kickdown，車尾輕微甩一甩就回復正軌，這種速度能把一輛逾兩噸重的SUV降服，當然唔是我技術了得，如果沒有ESP電子循跡穩定系統、ASR防車輪打滑控制及4ETS四輪電子牽引系統一大堆輔助裝置，邊有揸得咁爽。

2015 Mercedes-Benz GLE 450 AMG Coupé 規格表
引擎：V6 DOHC 雙渦輪增壓
容積：2,996c.c.
馬力：367hp@5,500-6,000rpm
扭力：520Nm@1,800-4,000rpm
傳動：前置引擎/四輪驅動
波箱：9G-Tronic全自動配軚盤+/-轉檔
0-100km/h：5.7秒
極速：250km/h
懸掛：(前)雙搖臂/ (後)多連桿
制動：(前/後)通風碟
輪圈：21吋合金
輪胎：(前)275/45 R21 Y/ (後) 315/40 R21 Y
長x闊x高：4,900 x 2,129 x 1,731mm
軸距：2,915mm
車重：2,220kg
油耗：9.4-8.9L/ 100km (Combined)
廢排：219-209g/km
售價：$919,000 (GLE 400 Coupé)/
$1,088,000 (GLE 450 AMG Coupé)/
$1,699,000 (Mercedes-AMG GLE 63 Coupé)