有些人，話佢鋼水差、唔耐用、唔安全。
即係咁，係時候update下自己，唔好人云亦云。

或者你正在用緊韓國手機睇緊這分長測報告，但對韓國車又偏偏耍手擰頭，點解嘅？

汽車未及手機巿場
其實唔難明，因為LG、Samsung在電子產品巿場上屬一線品牌；至於Hyundai，sorry囉，起碼到呢刻為止都仲未係，呢個係鐵一般嘅事實。
即係點？樣衰囉！揸部韓國車出街喎，被親朋戚友知道，就算唔是以為我撈唔掂，暗地裡都會笑我bad taste！

開始受年青人追捧
香港地買車就是咁，面子行先，其次睇二手價。不過這種諗法，隨着韓國車在設計及技術方面突飛猛進，近年已開始出現逆轉，尤以Veloster及Soul出現之後，對於無乜品牌舊有觀念的年青人，韓國車是比較容易接受。
最近有個被Tucson的外形、設備及售價吸引住的朋友問我：聽人講，韓國車鋼水差、唔耐用、唔安全，真唔真？

在綠色地獄修成正果
進入第三代的Tucson，整個開發過程其實一啲都唔簡單。由Audi奶水養大的德裔首席設計總監Peter Schreyer，在同一底盤基礎之下，分別設計出KIA Sportage及Tucson，之後駛到德國紐柏林試跑。
你可能會話：唓！個個都話去紐柏林，有幾巴閉呀！
巴閉在於Tucson不是落場跑幾個圈，鬆鬆肩拍下屁股就走人，而是耗資660萬歐元，在紐柏林興建一所技術測試中心，呢個舉動，連日本仔都未做過。結果，新一代Tucson利用前麥花臣後多連桿配德製SACHS高性能避震系統，在紐柏林賽道經過1,464小時的修練，成就了今日的武藝。

根本就是一輛德國車
咁當然，修練時間唔代表一切的。今次請來的武指，是前BMW M GmbH部門副總裁的Albert Biermann，如果你是「M3迷」，就一定知道此君來頭非同小可。曾效力BMW Group逾30年， 由第一代M3(E30)開始參與高性能型號的懸掛、操控及驅動系統等技術性調校，除咗話佢係M3的靈魂，我真係諗唔到其他形容詞。
經過Albert Biermann的調校及技術意見，第三代Tucson的後多連桿加裝了一對下支臂，結果轉向準繩度、後輪抓地力、行車穩定性及路面回饋感全部返晒嚟，所以試過車之後，如果發覺今代Tucson的駕駛感有啲似寶馬，定啲嚟，你無撞鬼。

硬到阿媽都唔認得
今代Tucson把AHSS先進高剛性鋼材的使用率提升至51%， 車身平均強度較上一代增加56.4%，但重量卻減少12.1kg。
AHSS有幾堅？一般鋼板強度大約在100至250MPa之間；MPa是鋼材強度的單位，1MPa代表每平方毫米能承受0.1kg的重力，而AHSS的強度可達500至1500MPa，主要用於A、B、C柱、門檻位、前後防撞陣架、車門防撞樑、底盤橫縱樑等需要極高安全保護的區域；再具體啲講，潛水艇都只係用緊1,600MPa強度鋼材，仲未計今代的車身結構採用3D環狀強化設計。擔心鋼水差唔耐用？不如擔心高鐵好過啦！

不計成本的強化
有Peter Schreyer及Albert Biermann兩大殿堂級猛人監場，真係想輸都難。結果，一出閘就以Fluidic Sculpture流體雕塑概念取得國際級iF設計大獎及Good Design Award；還有Euro NCAP五星安全評級、美國高速公路安全保險協會最高安全等級及德國同級最佳SUV等等；留意返，歐美唔係果啲好有特色主義嘅國家，呢啲獎，用錢係買唔到的。
唔只咁，為了兼顧舒適的駕乘空間，懸掛與連桿的接合位、避震的橡膠墊、引擎周邊的防火板及吸音物料、排氣系統隔音管道等，都經過全面強化，以抑制Noise、Vibration及Harshness，即所謂嘅NVH，所以車廂的寧靜程度，絕對可以媲美德國豪華SUV。

科技大晒冷
今次長測的Tucson，配備2.0公升直四Nu MPi引擎，6速全自動配軚盤+/-轉檔，馬力155ps，附設Eco、Normal及Sport三種駕駛程式。
主動安全方面，有ABS防鎖制動機關、BAS制動輔助裝置再加BOS煞車優先系統作為避免碰撞的金牌鐵三角；還有用來修正失誤穩定行車的ESC電子穩定控制系統及VSM整合式車身動態管理系統。想知胎氣夠唔夠，按一按軚盤附設的多功能按鈕，TPMS胎壓偵測裝置就會在儀表板show畀你睇4條輪胎的即時氣壓數值；玩越野，又有DBC下坡制動控制及HAC爬坡輔助控制系統助你變成攀山高手，這些設備，以前車價無番5-60萬真係唔使諗。雖然手掣仲用緊傳統手動拉桿，但好肯定係最後一次，除非唔係啦！我相信facelife版或者下一代Tucson應該又好似棍波咁會被消失，呢啲咁有歷史價值嘅嘢，望住佢，真係唔知講乜好。

自己感覺自己試
為期4天測試，玩盡3種駕駛模式，温柔激情乜都有，錄得平均耗油11.1L/ 100km，呢個數值，我相信已經好接近一般人的駕駛方式及實際路況，以一輛自然吸氣兩公升引擎來說，耗油算係合理。至於有幾靜幾舒適幾實用駕駛感有幾似歐洲車，唔再花墨水了，反正狄Sir份試車報告已經講得好清楚，有興趣的話，唔好齋在討論區睇人紙上談兵，更加唔好信晒我哋，跳出虚擬世界親自約車試一轉，自己嘅感覺永遠係最實際的。

Hyundai Tucson 2.0 Premium 規格表
引擎：L4 DOHC 16V
容積：1,999c.c.
馬力：155ps@6,200rpm
扭力：191Nm@4,000rpm
傳動：前置引擎‧前輪驅動
波箱：6前速自動配+/-轉檔
0-100km/h：11.1秒
極速：181km/h
懸掛：(前)麥花臣支柱/ (後)多連桿
制動：(前)通風碟/ (後)實心碟
輪圈：18吋合金
輪胎：225/55 R18 98H
長x闊x高：4,475 x 1,850 x 1,655mm
軸距：2,670mm
車重：1,540kg
油耗：7.9L/ 100km
廢排：182g/km
售價：$228,000/ 258,000(Premium)