在中國市場大受歡迎嘅bz3X電動SUV，成為豐田首部專為香港市場度身訂造嘅純電車型，賣點係車廂空間尤其係後座十分寬敞，舒適度一流，一換一售價港幣$223,600起，作為家庭用車，足以威脅 Tesla 及 BYD 等對手。廠方表示bz3X係豐田首部專為香港市場度身訂造嘅純電車型，而且係全球唯一指定右軚市場版本。今年6月中，多得內地車媒達人袁啟聰專登由廣州揸佢安排嘅「盲盒」新車落香港，我們率先在香港搶先測試了呢款由廣汽豐田設計及生產嘅bz3X。當時覺得bz3X雖然在內地市場定位係經濟型SUV，但車廂裝潢豪華實用，亦具備令人滿意續航力，仲加埋先進智能駕駛功能，最令人意外係後座空間十分寬敞，舒適度一流，適合家庭用，加上售價只係由人民幣11-16萬，足以威脅 Tesla 及 BYD 等對手。 日本豐田監督、中國團隊研發及生產 至於來港發售嘅右軚版，據廠方表示bz3X係豐田首部專為香港市場度身訂造嘅純電車型，而且係全球唯一指定右軚市場版本。除咗軚盤由左改右嘅工程，廠方亦按照香港用家需求，加入Apple CarPlay，冷氣又針對香港炎熱天氣，加以強化，至於手機互聯及連接車上系統，也要符合香港私隱法例，所以data server放在星加坡而不是中國。講到咁巴閉，加上有睇咗DiksirAuto左軚內地版試車片嘅觀眾，將bz3X同去年在香港發售嘅bz4X加以比較，我們亦忍不住蒐集一下兩款豐田嘅資料，畀大家參考。 型號 bz3X bz4X 摩打 恆磁同步摩打 恆磁同步摩打 電池 70kWh磷酸鐵鋰 71.4kWh鋰離子 馬力 203ps 203ps 扭力 210Nm 266Nm 續航力 (WLTP) 480km 436km 長x闊x高 4,600 x 1,850 x 1,645mm 4,690 x 1,860 x 1,650mm 軸距 2,765mm 2,850mm 一換一售價 (港幣) $229,600 $259,200   外形及尺碼比較：bz3X研發重點係經濟型家庭車 廣汽豐田 bz3X 嘅研發主要在中國進行，重點係要透過廣汽供應商採購零部件與電池，仲有內地勞動生產成本優勢，令bz3X可以大幅降低成本。採用廣汽Aion嘅Architecture Electric Platform（AEC純電底盤），不過電池、電動摩打及電控系統，都改為按豐田標準嘅零部件。核心研發工作由廣州嘅廣汽豐田汽車研發中心（GAC Toyota R&D Center）主導，結合豐田日本愛知縣嘅技術資源，及豐田對安全嘅要求，項目於2021 年啟動，重點提升電氣化技術同切合中國市場需求，特別係合作開發嘅智能駕駛系統Momenta 5.0及Nvidia Orin X 晶片。 至於豐田bZ4X 嘅研發主要在日本進行，由位於愛知縣嘅技術中心（Toyota Technical Center）帶領，於2019至2021年間啟動嘅bZ（Beyond Zero項目下完成。採用同Subaru合作嘅e-TNGA底盤，研發團隊整合豐田日本 Shizuoka嘅電池技術部門同歐洲設計中心（位於法國 Sophia Antipolis）嘅空氣動力學專才，部分軟件同智能駕駛技術則同Subaru於東京嘅研發部門合作。智能駕駛因香港法例而欠奉 駕駛位置配8.8吋儀表螢幕，觀感似乎有啲小家，不過駕駛資料又算清楚易睇，而且有繁體中文及英文可選。中控台配14.6 吋多功能觸控螢幕，又配備11個喇叭Yahama音響；可惜內地頂級版有嘅智能自動駕駛及自動泊車等功能，就因為香港法例所限，就全部欠奉；至於語音控制，暫時只有英語可用，廠方表示未來會追加粵語音控，仍有待廠方安排，應該可以在更新軟件時追加。 電池容量70kWh，最大馬力203ps，峰值扭力210Nm，搭載恆磁同步摩打，前輪驅動，最高速度有160km/h，續航距離以WLTP標準為480km，如果用DC103kW直流快充，只需24分鐘可由30衷電量充至-80%。車廂空間寬敞 中型SUV設計嘅bz3X，軸距有2765mm，高1645mm，車唔算大，但車廂空間造得十分寬敞。前座椅具備冷暖通風功能，駕駛席有6向電動調校，乘客座椅有4向電動調校；值得一讚是後座空間十分寬敞，而且靠背可手動調節角度，最斜有20度可調節，仲有全景玻璃車頂，營造更開揚光猛嘅乘坐感。冷氣系統設有PM2.5濾芯，前排係雙區獨立調校溫度，不過後座就只有出風口設計。整體評價 全長4600mm，闊1875mm，嘅bz3X，幸好不似大部份中國車廠，車身闊度隨時超過2000mm，bz3X嘅闊度仍維持在1875mm，在香港嘅狹窄山路上，操控就比較靈活輕鬆，不過整體操控上，bZ3X就維持一貫豐田汽車以實用性及穩定性取勝嘅作風，動感表現一般。 其實bz3X最大賣點係車廂空間寬敞，駕乘舒適，適合日常駕駛及作為家庭用車，至於追求性能表現，又或者駕駛樂趣，就仍有進步空間。2025 Toyota bZ3X 規格表摩打形式：恆磁同步摩打電池容量：70kWh磷酸鐵鋰電池傳動形式：前輪驅動傳動系統：單速直接驅動最大馬力：203ps (150kW)峰值扭力：210Nm最高速度：160km/h續航距離：565km (NEDC) 480km (WLTP)充電時間：AC 6.6kW ~ 11.8小時（10-100%）DC 103kW ~ 24分鐘（30-80%）懸掛系統：(前)麥花臣/ (後)扭力桿制動系統：(前)通風碟/ (後)碟式輪圈：19吋合金輪胎：(前/後) 225/45 R19 長x闊x高：4,600 x 1,850 x 1,645mm軸距：2,765mm車重：1,835kg售價：$229,600 (一換一後，首100架後售價：$239,600)

寶馬i系列純電動車第二個型號iX，自2022年推出以來備受市場追捧。新版iX xDrive45繼續由專門製作寶馬豪華車型的Dingolfing廠房生產。是次中期更新，核心改動部份是動力系統上的強化。有留意車壇動態的車迷，都會發覺日本車廠久不久就會流出一些新科技，重點看似繞過、跳出純電力推動的框架，讓大家理解到日本車廠並不在新能源汽車技術上落後他人。電能驅動技術並不是只有純粹依賴鋰電池，而氫燃料電池，甚至是Hybrid油電混能等技術，都同樣使用到電馬達技術。那邊廂，德國老品牌BMW寶馬，較早前在德國慕尼黑車展上，再次向車迷展示在純電動車領域有所搞作，全球首發新Neue Klasse的首個型號——第二代iX3。當新一代iX3剛上線生產之時，寶馬先為香港用家帶來iX的中期更新版本。寶馬i系列純電動車第二個型號iX，自2022年推出以來備受市場追捧。新版iX xDrive45繼續由專門製作寶馬豪華車型的Dingolfing廠房生產。是次中期更新，核心改動部份是動力系統上的強化。第五代eDrive電能科技，換入碳化矽變頻器，馬力由326hp提升至408hp，扭力更由630Nm增至700Nm，0-100km/h加速需時因而縮減一整秒，現只需5.1秒。DC直流快充功率亦由150kW提升至175kW，由10%充至80%，比原版的31分鐘略為延長至34分鐘，事關電池容量也增大了30%，由73kWh增至94.8kWh，WLTP續航距離由425km增至602km。除爆發力變得更充沛之外，駕駛感覺與原版大同小異，維持一向寶馬對駕駛者許下的承諾，舒適、無壓力地得到毋庸置疑的可靠性能。外觀上改動不大，雙腎形面罩內轉用斜線對向紋理，比原版的漸進疏密星形圖案更為簡潔，更可選配BMW Iconic Glow光環。面罩沿用Shy Tech隱形科技設計，智慧功能面板巧妙隱藏鏡頭、雷達與其他感測器，並配備自動修復的聚氨酯塗層，於室溫下24小時內可以自動修復輕微刮痕，不僅提升科技感，更保留車身設計的純粹美學。車身顏色也新增兩款，分別是北極競速藍Artic Racing Blue及沙丘灰Dune Grey。容貌依舊的12.3吋及14.9吋雙屏幕BMW Live Cockpit Professional，轉由全新的BMW Operating System 8.5作業系統支援，導航功能並標配AR擴增實景顯示，而QuickSelect更令操作變得快捷方便。而遙控泊車功能，預計將於2026年推出，各位用家請拭目以待。後排座椅可按40:20:40比例靈活摺疊，並可輕易地使用行李箱內的按鈕，一按將椅背放平，行李空間瞬即由500升增展至1,750升，但車頭蓋下不設儲物空間，亦沒有油壓支柱或支撐桿。車，當然是早買早享受，但遲買亦不一定會貴「幾舊」！電動車技術發展日新月異，受種種因素影響，售價下調也屢見不鮮。新版寶馬iX xDrive45，數值上比原版xDrive40有多方面的增強，那麼售價的增幅又如何？最新的「一換一」售價是HK$755,500起。換句話講，那正是一個負增長，售價下調了接近10萬港元。電動車仍是新科技產物，隨發展日趨成熟，成本有下調空間也不足為奇。當年Tesla Model 3初推出時，大家都讚嘆比Model S便宜一截，而Model 3第二代又比第一代更便宜，正是兩個最佳案例。然而，「早買早享受」這點並無改變，早鳥優惠包括兩款21吋雙色輪圈選擇、擁有18具揚聲器的Harman Kardon音響系統、Parking Assistant Professional、Driving Assistant Plus、四區自動恆溫冷氣等設備，面罩亦可免費加配BMW Iconic Glow光環。2026 BMW iX xDrive45（i20）規格   車型：五門五座位電動SUV馬達類型：永磁同步馬達數目：2最大馬力：408hp峰值扭力：700Nm傳動：前後馬達，四輪驅動波箱：單速自動懸掛：前 ~ 雙搖臂 / 後 ~ 多連桿制動：前 / 後~ 通風碟 輪胎：前 / 後 ~ 255/50 R21電池容量：94.8kWh續航距離：490-602km（WLTP）充電時間：AC 11kW ~ 9.45小時（0-100%）DC 175kW ~ 34分鐘（10-80%）車身長 x 闊 x 高：4,965 x 1,970 x 1,695mm軸距：3,000mm車重：2,525kg0-100km/h：5.1秒售價：HK$755,500起（須符合電動車「一換一」計劃資格）查詢：BMW HK（3219 9010）網址：www.bmwhk.com

Inster是Hyundai的入門級電動車，是一款外形可愛的小型車，而且空間非常寬敞。操控感中規中矩，駕乘感亦不過不失，容易揸容易睇位，又可以突出車主個性，可惜只能坐4人。電動車，選擇愈來愈多，但大部分都係鬥軟件功能，設計千篇一律，個性含糊。定位介乎 A-Segment 和 B-Segment 之間的 Inster，前身是汽油版 Casper，是 Hyundai 繼 Kona 及 IONIQ 系列之外，另一款純電車；睇樣，就知賣點係外型。突顯城市SUV的型格 Inster 這個名字，象徵着 intimate 及 innovative，車仔細細但勝在個性十足，是一輛玩型格的 SUV。起初有人認為，SUV 只是一個短暫的風潮，結果從上世紀90年代的傳統汽油主義開始，一直火熱到今日所謂的電動新能源，變成一個不倒的神話。相比一類偽 SUV，Inster 那種小小越野味，就更能突顯城市SUV的型格。抵港的三款型號包括標準版 Inster、Inster APT. 及 Inster APT+，APT 意思係 Perfectly Appropriate，三款都是前輪驅動，輸出由97hp至115hp，一換一車價由 $199,900 至 $239,900。首選係 Inster APT. 今次測試的 Inster APT.，輸出跟APT+同樣是115hp，但續航力是三者之最；廠方公布巿區有518km，混合路段則平均有370km。用120 kW 快速充電由 10-80% 需時 30 分鐘，用50 kW 充電則需時 55 分鐘；0-100km/h 加速 10.6 秒，比標準版 Inster 快1.1秒，簡單講，要有齊性能及續航力，車價又較相宜的，三者之中，首選係 Inster APT.，但如果想要埋天窗、皮座、氣氛燈、V2L、17吋胎鈴，就可以揀 APT+。 軚盤撥片用來控制動能回收強度 雖然大部分電動車都有得揀駕駛模式及可調動能回收系統，不過很多都要經中控屏幕操作，唔夠 user friendly，呢方面，Inster 的工程師就做得幾好。首先，Drive mode 有 Eco、Normal、Sport 及 Snow 四個選項，選擇掣就喺軚盤8點位置。軚盤後方的兩塊撥片，是用來控制動能回收的強度，左撥片每按一下就會進一步增加回收強度，前進阻力就會逐漸增强；右撥片每按一下就會解除一度回收強度，操作類似汽油車的加減轉波撥片，可以當作「低波落斜」，來減低制動系統的負荷。操控感中規中矩 Hyundai SmartSense 主動安全系統，有七個安全氣袋、 BVM 盲點影像監察、FCA-JT 前方碰撞預警、LFA 離線扭軚、LKA 離線警示、PCA-R 後方泊車碰撞預防輔助及 SVM 360度環視鏡頭。115hp揹住1.4噸，預咗加速會比較溫和，對短軸距的 Inster 來講亦較為合適。跑山，出奇地行車動態有點似 Mazda Demio，彎前輕輕減慢車速，彎心就可以大腳加速，馬步都幾穩。操控感中規中矩，駕乘感亦不過不失，容易揸容易睇位，又可以突出車主個性，可惜只能坐4人。2025 Hyundai Inster APT. 規格表摩打形式：恆磁同步摩打電池容量：49kWh最大馬力：115ps峰值扭力：148Nm續航距離：370km (WLTP Combined)DC120 kW直流快充：30分鐘(10-80%)DC50 kW 直流快充：55分鐘(10-80%)DC50 kW 直流快充：55分鐘傳動形式：單摩打前輪驅動傳動系統：單速減速齒輪0-100km/h：10.6秒極速：150km/h懸掛系統：(前)麥花臣/ (後)扭力桿制動系統：(前)通風碟/ (後)實心碟輪圈：15吋合金輪胎：(前/後) 185/65 R15 KUMHO ECSTa HS52 EV長x闊x高：3,825 x 1,610 x 1,575mm軸距：2,580mm車重：1,410kg電耗：14.9 kWh/ 100km售價：HK$209,900 up (one-for-one replacement scheme)

緊湊車型設計嘅Atto 2，車身長 4.3 米，寬 1.8 米，在香港狹窄嘅山路及室內停車場，駕駛完全無難度，而且車廂空間寬敞，設備齊全，行李箱雖然唔算大，但日常使用亦算實用，適合家庭車需求。不過配較細嘅45.12kWh電池，好難苛求又快又劈得，續航力亦只有312公里。定位介乎於Dolphin及Atto 3之間嘅中型SUV，同時又瞄準全球增長最快嘅小型SUV市場，力圖在競爭激烈嘅電動車市場中分一杯羹。又係電動SUV？好悶呀！無錯！熱衷駕駛嘅車迷，寧願選Hot Hatch多於SUV，但事實係越來越多家庭，都會選擇SUV，因為有較高嘅駕駛座姿，代表駕駛視野更為廣闊清楚，而較高嘅車身，代表乘客容易上落車廂。眼前嘅Atto 2，仲有埋硬朗嘅外觀，同埋小巧靈活嘅車身，可謂有晒家庭SUV嘅賣點。  前後座空間寬敞 外形小巧又有少少硬朗嘅Atto 2，其實車廂空間相當寬敞。至於人造皮座椅，造型及質感亦有高級感，桶形前座椅包托度不錯，乘坐感亦令人滿意，後座空間亦充裕。駕駛席配四輻式軚盤，手感幾好，10吋數碼儀表，顯示嘅駕駛資料相當多，但就需要小小時間了解及熟習。 至於中央螢幕，同大部分內地電動車一樣，都係幾乎將所有控制都用螢幕操作，要調校冷氣溫度及風速，要在螢幕進行。現時仲支援埋「多點觸控」，用三隻手指在螢幕上，以下滑動調節溫度，向側滑動就調節風扇速度。不過當只有駕駛人在開車，如果駕車途中要調校冷氣，由於無實體按鈕，就最好在開車前預早設定，否則一面駕駛一面要分神去調校冷氣，未免會影響安全。駕乘舒適 對於一款緊湊型電動SUV來說，Atto 2嘅1570公斤重量算係相對輕，所以配屬於細嘅45.12kWh電池，最大馬力只有174hp，加速表現依然令人滿意。 至於0-1001km/h加速7.9秒，以現時電動車隨時只需3或4秒而言，算係十分斯文，加速屬於平順漸進，其實係非常適合在繁忙嘅香港市區駕駛。在公路上，平順漸進嘅駕駛表現當然談不上刺激，事實上，174hp嘅最大馬力，好難苛求又快又劈得，但就合乎駕乘舒適嘅需求。 續航力方面，以歐盟WLTP計算，只有312公里，採用AC 11kW充電，由0充至100%電量，需要5.5小時；用DC 65kW快充，由10%充至80%，就只需37分鐘。整體評價 電動SUV市場競爭越來越激烈，尤其係港幣20萬至26萬嘅競爭就更為白熱化。面對眾多對手，Atto 2確實具備一些強項，首先係設備豐富，實用性強，然後係乘坐舒適，在市區駕駛也很輕鬆舒適。 總的來說，Atto 2係一款適合輕鬆舒適駕駛嘅電動家庭SUV，但就唔適宜在山路以激進方式快跑，尤其係在急彎上，車架反應緩慢，軚感亦比較輕。試車當天遇上失魂雨，輪胎嘅濕地抓著力不足，令車身在連續S彎上有不安定表現，並非熱血駕駛者嘅選擇。 暫時廠方仍未正式公布售價，如果售價係港幣20萬元有找嘅話，會係實用嘅經濟型電動家庭SUV選擇。2025 BYD ATTO 2 規格表 車型: 五門五座位電動SUV摩打類型: 永磁同步摩打數目: 1最大馬力: 174hp峰值扭力: 290Nm傳動: 前置摩打, 前輪驅動波箱: 單速自動懸掛: 前 ~ 支柱式 / 後 ~ 扭力桿制動: 前 ~ 通風碟 / 後 ~ 實心碟電池類型: BYD Blade鋰離子電池電池容量: 45.12kWh續航距離: 312km（WLTP）充電時間: AC 11kW ~ 5.5小時（0-100%）DC 65kW ~ 37分鐘（10-80%）平均耗電量: 10.8kWh/ 100km (WLTP)車身長 x 闊 x 高: 4,310 x 1,830 (連側鏡：2,060) x 1,675mm軸距: 2,620mm車重: 1,570kg輪胎: 前 / 後 ~  215/60 R170-100km/h: 7.9秒售價: 待定

受惠於當局接受左、右軚新車登記出牌，澳門車市比香港熱鬧得多，供用家選擇的品牌和車款亦明顯較香港多。其中跟吉利集團關係密切、份屬Zeekr姊妹車廠的Lynk & Co，便以純電和左軚駕駛的Z20，成為進軍當地新能源汽車市場的新力軍。

家庭車, 甚至是「粗用」的通勤「腳車」, 你會有甚麼要求? 除可靠、舒適、價錢實惠外, 如有更多便利和豪華設備, 可會是錦上添花。 然而, 二十多萬車價這個級別, 近期有大量新品牌、新型號湧現香港市場。 要站穩陣腳, 必須要做到獨當一面。 眼前的GEELY EX5, 在內地稱為吉利銀河E5, 又憑什麼在這個浴血戰場插旗? 做人又好, 造車又好, 擁有一副討好的面孔, 不管你是真心好人, 還是大奸大惡, 也會先行讓人放下戒心, 不害怕跟你破冰。 即使外表普通, 但擁有內在美, 憑實力也可有一番成就。 GEELY EX5比不少怪型怪相、左模右仿的車種更討好, 但它的外觀是否過目不忘? 是否美若天仙? 是否性格突出? 全不是也! 難道平凡但不平庸的形象, 不是低調出行的好選擇? GEELY EX5車身線條圓潤流暢, 觀感舒服順眼, 以直線介入的位置不多, 較明顯的只有兩側車門底部的一組。 然而, 最重要是右軚型號國產車, 又怎會只為香港這麼細小的一個市場特製? 所以終極目標當然是英國、澳洲、東南亞, 甚至日本等市場。 但罕有地, 供港的EX5標配歐洲法例規定的車尾霧燈, 並設於車尾泵把左右兩側。 中控台的「堤壩」式手枕, 錯覺上產生焗促感, 實際上空間不比同級型號細。 前座中央的馬鞍儲物箱前有手機無線充電器, 「堤壩」下是一個寬闊的儲物空間, 足以容納大型手袋, 兼設有USB Type-A和Type-C插座各一, 另備有12V電插座。 自動恆溫冷氣系統內置N95高效過濾器, 中控台上設有實體鍵控制, 中央屏幕底部有更細緻的設定選項。 馬鞍位置更設有後座中央送風口, 下方亦有USB Type-A和Type-C插座各一。以全長4, 615mm的車長、2, 750mm的軸距而言, 車廂空間運用頗有效率。 後座乘客的膝部空間合格有餘, 乘坐感跟一般中小型SUV感覺相若。 車頭蓋下不設儲物空間, 一鍵打開電動尾門, 見到寬敞的尾廂容量有461升, 更設有照明燈, 放平後排椅背更可令尾廂容量增至1,877升。 此外, 揭開車尾箱的層板, 更有一個四方實用的暗格, 放置充電線後還有大量空間。豪華車種必備的車廂氣氛燈, 同樣在EX5身上提供。 10.2吋LCD多功能儀錶板, 顯示編排與吉利大家庭其他成員相若, 資訊清楚分明, 更有head-up display投射錶板, 必要資訊精簡, 顯示對比度高。 15.4吋中央顯示屏解像度達2.5k, 系統操作介面包括英文和繁體中文, 附設16具揚聲器的FLYME Sound環迴立體聲系統, 亦支援Apple CarPlay功能。 仰首一望, 除行李架外, 車頂還設有可開啟的全景天窗, 更有電動遮陽簾, 香港的炎夏驕陽, 能被完全遮蔽。 雖然控制天窗和遮光簾開關, 要在中央顯示屏中選取, 但貼心之處在於天窗和遮陽簾, 均可任意設定開啟幅度, 這正是市場上好些型號忽略了的細節。 前座仿皮座椅不僅設有位置記憶、冷暖通風, 甚至按摩功能, 乘客席更有電動腳托, 令EX5超越群雄, 少有地在同級車種擁有這項豪華設備。 又一項便利歐洲用家的設備, 亦有在輸港版本上出現, 就是具備發熱功能的倒後鏡。EX5的峰值扭力達320Nm, 拜電動馬達即時傾巢而出的特性所賜, 正好切合日常駕駛需求, 要加速? 無需等。 在CTB車身電池一體化的吉利Global Intelligent New Energy Architecture（GEA）平台上, 名為「神盾短刀」的新一代磷酸鐵鋰電池, 能量密度更高,  而且更耐用。 容量60.22kWh的電池,  為輸出功率達100kW（馬力214hp）的前置馬達提供動力驅動前輪, 0-100km/h加速需時7.1秒。 以上性能指標屬中規中矩, 60.22kWh電池以現時市場標準而言, 容量並不算高, 但換來一個優點, 就是比同級純電SUV輕, 車重只有1, 765kg。 以16kWh/100km交出425km的WLTP續航距離,  算是不過不失。 在日常使用角度上也算足夠, 而它亦支援V2L和V2V等便利功能。 EX5接受最高100kW的直流電快速充電, 由30%充至80%需時僅20分鐘。 若使用11kW中速充電, 由10%開始充滿則需6.1小時。 駕駛席偏高, 前後視野遼闊清晰, 5.4m最小迴旋半徑,  加上可在中央屏幕一鍵召出360鏡頭, 那怕掉頭泊位、駛過峽窄路段, 新手初哥也會信心十足, 輕鬆駕馭。 前麥花臣、後多連桿懸掛結構, 屬當代SUV的標準設計, 在一般通勤狀態下, 駕駛表現無可挑剔。 但若你強行進入「熱血模式」, 舒適向的懸掛系統行程稍長, 始終不利激烈攻彎, 所以駕駛EX5的你, 還是做個溫柔的載客司機吧！EX5在2024年底正式在泰國開賣, 筆者在2025年3月的曼谷國際車展, 率先與它有過一面之緣。 與輸港型號相若的高配版本, 泰國定價899,000泰銖, 折合22萬港元有找。 EX5以首款掛上「吉利」品牌的車型登陸香港, 以「一換一」起步售價239,000港元開售。 實話實說, 此價位的國產電動車選擇眾多, 你又會否因設備齊全和吉利的優良品質, 向EX5投下信心一票? 2025 Geely EX5 規格表 車型: 五門五座位電動SUV摩打類型: 永磁同步摩打數目: 1最大馬力: 214hp峰值扭力: 320Nm傳動: 前置摩打, 前輪驅動波箱: 單速自動懸掛: 前 ~ 雙搖臂 / 後 ~ 多連桿制動: 前 ~ 通風碟 / 後 ~ 實心碟電池類型: 磷酸鐵鋰電池電池容量: 60.22kWh續航距離: 425km（WLTP）充電時間: AC 11kW ~ 6.1小時（10-100%）DC 100kW ~ 20分鐘（30-80%）平均耗電量: 16.0kWh/100 km (WLTP)車身長 x 闊 x 高: 4,615 x 1,901 x 1,670mm軸距: 2,750mm車重: 1,765kg輪胎: 前 / 後 ~  235/50 R190-100km/h: 7.1秒售價: HK$239,000起（須符合電動車「一換一」計劃資格）查詢: 智聯志利新能源汽車服務電話: 9180 8038

由內地新能源車廠Seres Group及華為合作開發嘅AITO (問界) M9豪華SUV，在澳門正式推出市場。配備自動感應氣壓懸掛 廠方宣稱M9設計理念係重新定義大型豪華電動SUV標準，車身採用全鋁合金一體化壓鑄技術製造，配備自動感應氣壓懸掛，及一系列智能輔助駕駛系統，仲有係內地豪華車現時不可缺少嘅小型雪櫃，及具備按摩功能嘅零重力座椅。試車前亦有專人為我哋介紹M9多項智能化設備，包括非常花巧、配備HUAWEI xPIXEL嘅智能投影大燈，除咗係車頭燈，仲具備投影功能，可在路面上投射警示信息或者迎賓圖案，又可以用手機在車外啟動智能自動泊車，車廂又配備智能激光投影幕，將車廂變成音樂廳或影院。最玩嘢係為中排座椅嘅老闆而設嘅私隱設計，老闆開啟私隱模式，司機座椅頭枕內嘅喇叭，就發出特別嘅噪音，令司機聽唔到車廂中後排乘客嘅對話。我哋在澳門小試咗一段市區及山路，由於係電動車，加上車廂隔音亦出色，行車的確係寧靜舒適。最特別係全長超過5米嘅M9，轉向半徑非常短，在雙線行車路面，可以一手軚U-turn調頭。由於試車時間及路程都比較短，只算係初體驗嘅駕乘感受。問界澳門代理係捷成汽車，相信廠方推出右軚時，捷成香港亦可能成為代理。詳細嘅試車，要等問界在香港推出時再進行。 售價方面，澳門電動車係免稅的，旗艦型號M9 Ultra六座版，售價由澳元$ 680,584起，M9 Ultra五座版由澳元$ 659,954起；M9 Max 六座版由澳元$ 618,694起。

有John Cooper Works嘅加持，純電動Aceman E成為加速反應好快嘅Hot SUV，銳利嘅轉向令彎路表現十分靈活，跑山路會令駕駛人好開心；至於偏硬嘅懸掛，後座空間一般，亦欠缺現時內地車廠討好後座乘客嘅花巧設計，作為後座乘客可能會覺得扣分；不過前座乘客及駕駛人，就一定會鍾意設計相當有玩味嘅車廂設計，同埋非常有個性嘅外形。全新MINI John Cooper Works (JCW) Aceman，係 MINI 首次將高性能 JCW 標誌，用在於全電動SUV嘅嘗試。廠方表示新車結合咗MINI經典嘅Go-Kart操控感同埋現代電動科技，市場定位介乎三門Cooper同較大嘅Countryman之間，除咗追求性能表現，同時亦兼顧日用實用性。硬朗嘅外形配合JCW運動化元素 眼前嘅MINI JCW Aceman E，係廠方現時最火辣嘅純電高性能SUV版本，硬朗嘅外形仲加埋JCW運動化元素，包括外觀相當凶狠嘅黑色車頭面罩同埋車身側裙腳，仲有19吋專屬合金輪圈、JCW運動型剎車卡鉗同埋相當搶眼嘅JCW標誌，紅色車頂及門邊鏡，加上車尾嘅定風翼，可謂非常搶眼。車廂也有JCW運動化元素 前座乘客席位置前方設有JCW特有嘅織物圖案，車廂採用紅黑JCW配色，運動座椅採用合成皮革同針織物料，而且承托力出色。賣相相當搶眼嘅圓形OLED中控螢幕，分別提供無線Apple CarPlay同Android Auto功能，操作簡單直接，但冷氣及大部分控制全靠螢幕進行，使用上需要適應。後座空間一般，膝部空間稍窄，尾箱嘅300公升行李容量只屬中規中矩，算係適合日常使用。可以享受劈彎樂趣 經過JCW調校嘅懸掛系統，係偏向硬朗嘅設定，就算係SUV較長嘅懸掛行程下，走過鋪裝較差路段亦表現穩定，不過在連續S彎時，1,820kg 嘅車重，令車身反應有少許遲鈍，幸好轉向反應非常敏銳，雖然路面感不及Hot Hatch細膩，但作為SUV而言，也可以享受劈彎嘅樂趣。0-100km/h需時6.4 秒 動力來自54.2kWh電池起動嘅單摩打，前輪驅動，輸出258匹馬力及350Nm峰值扭力，在「Boost」模式下，有10秒額外釋放27匹馬力，0-100km/h 加速需時6.4 秒完成，唔算快，不過極速可達200km/h。 事實上，MINI一直強調嘅係Go-Kart駕駛樂趣，所以直路加速並非JCW Aceman強項，而係跑多彎嘅山路時就相當好玩。續航與充電 電池續航里程以WLTP標準計算，只有355公里，有續航力焦慮嘅人未必會滿意。幸好充電方面支援 95kW DC 快充，由10-80%充電， 只需大約31分鐘；11kW AC充電則需5.5小時充至100%。整體評價 五門SUV設計嘅JCW Aceman，車廂空間比三門掀背車型大，用途更適合日常需要。至於港幣$389,800起嘅售價，論設備算豐富，音響係10個喇叭嘅Harman Kardon Surround Sound系統，配備Head-Up Display，以價論車，在熱血電動 SUV市場中亦有競爭力，而且對追求有不一樣設計嘅用家，尤其係小家庭嘅MINI擁躉，會係相當有吸引力嘅選擇。唯一要接受嘅妥協，係續航力在400公里以下。2025 MINI JCW Aceman E 規格表摩打形式：恆磁同步摩打電池容量：54.2kWh鋰離子電池最大馬力：258hp峰值扭力：350Nm續航距離：355km (WLTP)傳動形式：前輪驅動傳動系統：單速直接驅動0-100km/h：6.4秒長x闊x高：4,079 x 1,754 x 1,514mm軸距：2,606mm車重：1,820kg售價：HK$389,800   (one-for-one replacement scheme)

售價超有競爭力嘅廣汽豐田 bZ3X ，售價係經濟型SUV，但車廂裝潢豪華實用，續航力亦令人滿意，仲加埋同先進智能功能，而且後座空間十分寬敞，舒適度一流，適合家庭用，足以威脅 Tesla 及 BYD 等對手。最近在中國市場鋒頭最勁，銷情核爆級嘅，一定係Labubu。不過眼前嘅全新豐田bZ3X純電SUV，差一點搶咗Labubu嘅鋒芒。事緣豐田於今年三月初，在中國市場推出售價由11萬元人民幣起嘅bZ3X純電動SUV，呢口價亦令bZ3X成為豐田史上最平嘅EV。連內地車媒達人袁啟聰都搶先成為車主，佢更專登由廣州揸落香港(事前佢表示要有「盲盒」神秘感，所以見到新車才知道係bZ3X)，搵我們在香港路面試下呢架豐田史上最平嘅電動車，再用香港車主角度去分析，呢款售價由人民幣11萬元起至16萬嘅bz3X，如果有機會來港發售，會唔會都可以在香港搶到少少Labubu鋒芒呢。豐田其實好有市場智慧 面對中國消費市場「內捲」，電動車市場價格戰競爭激烈，既然自己開發電動成本高而無法同內地電動車打價格戰，就一於「以敵之長，攻敵之短」，以扭轉豐田在全球最大汽車市場嘅劣勢。 透過同廣汽集團（GAC）嘅合資企業GAC-Toyota，以廣汽Aion V電動SUV嘅Architecture Electric Platform（AEC純電底盤），推出豐田設計外形嘅bZ3X，採用內地電動車先進技術，透過廣汽供應商採購零部件與電池，其中一個賣點係不使用稀土嘅磷酸鐵鋰（LFP）電池，仲有內地勞動生產成本優勢，再冠上豐田嘅細緻包裝，不但降低成本，頂級型號更擁有內地車主最鍾意嘅智能駕駛及智能車載系統，搭載LiDAR雷射雷達，又有Momenta合作開發嘅ADAS先進駕駛輔助系統，具備NOA導航自動駕駛系統，在導航上設定目的地後能進行自動駕駛操作功能，仲可以對應變換行車線、超車、二線合一線等情況；推出發售一小時就破一萬張訂單，問你服未！豐田最新 EV 設計語言 bZ3X 嘅 SUV 外形，同時又融入了豐田最新 EV 設計語言。對於 bZ3X，豐田似乎決心證明精心校準的駕駛輔助系統。借鑒了 GAC Aion V 的設計，但頭燈更加銳利、棱角分明，車頭造型也更加簡化。較高的車身高度及簡潔的側面線條，設計簡約實用，符合豐田一貫嘅form follows function設計理念。支援 NOA 導航自動駕駛 駕駛位置配8.8吋儀表螢幕，中控台配14.6 吋多功能觸控螢幕，Momenta 5.0 系統加 Nvidia Orin X 晶片，配 29 個感測器同激光雷達，支援 NOA 導航自動駕駛、遠端泊車同 25 項 ADAS，67.92kWh 電池，CLTC 續航 610km，WLTP 約 470km，支援快充 30-80% 僅 24 分鐘，適合香港嘅城市行車需求。智能車載系統 至於已成為內地電動車必備嘅語音識別控制，不但可以連續對話，仲可以一句話有兩種意思，能夠語音控制車窗、冷氣、導航、音樂、藍牙電話等一系列功能。 另外值得一提係自動泊車功能，系統能瞬間掃瞄附近所有停車位，並即時找出可供泊車位置，一切盡在觸控螢幕顯示，駕駛人只須選定要泊嘅車位，系統就會自動完成泊車任務，十分方便又快捷。營造更舒適的乘坐感 定位中型 SUV 嘅bz3X，外形設計動感化，全長4600mm，闊1875mm，高1645mm，車身觀感相當大架，幸好闊度仍維持在1875mm，在香港的狹窄山路上，操控就比較靈活輕鬆；至於軸距 2765mm，令車廂空間十分寬敞。前座椅電動調校，值得一讚是後座空間十分寬敞，而且靠背可手動調節角度，最斜有20度可調節，仲有全景玻璃車頂，營造更舒適的乘坐感。冷氣系統設有PM2.5濾芯，前排係雙區獨立調校溫度，不過後座就只有出風口設計。整體評價 操控上，bZ3X有一貫豐田汽車個性，以實用性及穩定性取勝，加上車廂空間寬敞，駕乘舒適，適合日常駕駛及作為家庭用車，至於追求性能表現，又或者駕駛樂趣，就仍有進步空間。2025 Toyota bZ3X 610 Max規格表摩打形式：恆磁同步摩打電池容量：67.92kWh磷酸鐵鋰電池最大馬力：221hp (165kW)峰值扭力：210Nm續航距離：610km (CLTC) 470km (WLTP)傳動形式：前輪驅動傳動系統：單速直接驅動0-50km/h：4秒極速：160km/hDC直流快充：24分鐘（30-80%）懸掛系統：(前)麥花臣/ (後)扭力桿制動系統：(前/後)碟式輪圈：19吋合金輪胎：(前/後) 225/45 R19 長x闊x高：4,600 x 1,850 x 1,645mm軸距：2,765mm車重：1,835kg售價：RMB159,800