新版911，廠方編號為992.2，作為現行992嘅中期改款車型，外觀上只係微調，動力再略有升級，科技配備上進一步提升，同時亦維持經典嘅後置引擎、後輪驅動（或四驅）佈局。至於911 Carrera Cabriolet屬於車系中嘅入門級開篷版本，搭載動力輕微提升嘅3.0公升雙渦輪增壓水平對向6汽缸引擎，輸出389匹最大馬力（比 992.1 增加9 匹），依然以經典設計嘅外觀，性能強悍而又符合日常實用性為主要賣點。992.2 嘅外觀變化不大，驟眼睇難以分辨與992.1嘅分別，但其實車頭指揮燈，已由泵把上整合埋大燈成為一個整體燈組，令前泵把進氣空間比以前大，以提升冷卻效率，同時又令外觀更簡潔。車尾就採用更圓潤及簡潔設計，配備新嘅一字形燈條，視覺上更簡約流暢。線條幾乎與Coupe版冇分別經過微調外形嘅911 Carerra Cabriolet，又的確係漂亮咗的。靚咗，係要歸功於採用咗鎂合金支架嘅嘅軟篷頂，優點除咗輕巧而堅固之外，又可以在車速50km/h以下時，只需12秒就可以開或關；而且關上軟篷時，亦可避免一般軟篷會出現嘅摺合位嘅骨線而影響順滑線條，令關上軟篷時，整體外觀線條，幾乎與Coupe版沒有分別，而且關閉軟篷行車，車內隔音效果亦十分接近硬頂版，只有在高速時略有風噪。首次配備全數碼化儀表板新版992.2亦係911車系首次配備全數碼化儀表板，12.6 吋曲面螢幕嘅駕駛儀表，支援多種個性化功能，提供7種效果，其中包括轉速表在中央嘅經典保時捷傳統五圓表設計，讓死硬派擁躉可以懷緬一下。 中控位置配觸控式螢幕，操作反應流暢，介面也非常合理易用，又可以無線連接Apple CarPlay及Android Auto，全新嘅Porsche Connect亦可使用Spotify及Apple Music等第三方應用程式，也十分方便易用。劈彎都零舍人車合一動力來自水平對向3公升6汽缸雙渦輪増壓引擎，而且採用了Turbo車型嘅中冷器，並配備之前只限GTS車型採用嘅渦輪增壓器，輸出最大馬力394ps，峰值扭力450Nm；配8前速PDK雙離合波箱，後輪驅動。0 - 100 km/h只需4.3秒，有埋Sport Chrono Package就4.1秒。 老實講，實際駕駛時，根本體驗唔到多咗9匹馬力有咩分別。只覺得副8前速PDK雙離合波箱，能夠好順滑就將394匹嘅動力驅動後輪，而且可以好輕鬆咁熨平不同嘅彎路。Cabriolet車型重量雖然比Coupe增加大約80公斤去到1,600公斤，但點都比動輒就兩噸半嘅電動車輕巧得多，所以劈彎都零舍人車合一。山路上快跑已經係樂趣跑車化嘅駕駛位置及座椅依然非常稱心，轉向反應靈敏，劈彎時PASM主動懸掛系統反應乾淨利落，底盤嘅馬步功架又高強，加上 911車系配備越來越寬闊嘅輪胎，加上由軚盤傳來嘅清晰路面感，在多彎嘅山路上快跑，就已經係一種樂趣，唯一覺得不夠過癮嘅係排氣聲浪不夠轟動。 雖然開篷嘅結構剛性會不及Coupe，但整體行車表現依然硬朗穩健，只有在極端顛簸路面，才會感到車身嘅少許多餘震動。整體評價保時捷911獨特之處，在於經典嘅青蛙眼頭燈，後置引擎布局，同埋排氣聲浪誘人嘅水平對向6汽缸引擎，令911車系在跑車市場上可謂無可取代。至於911 Carrera Cabriolet嘅主要競爭對手，其實已越來越少，包括過去嘅Jaguar F-Type、Audi R8 Spyder都已停產。事實上，911 Carrera Cabriolet簡單而直接嘅機械規格，配合順滑流暢嘅雙離合器波箱箱，仲有設計精緻嘅電動軟篷，足以成為令人享受開篷駕駛，又可以符合日用嘅開篷跑車。2025 Porsche 911 Carrera Cabriolet 規格表引擎形式：F6雙渦輪增壓汽缸容積：2,981c.c.最大馬力：394hp@7,500rpm峰值扭力：450Nm@2,300–5,000rpm傳動形式：後置引擎‧後輪驅動傳動系統：8前速PDK雙離合半自動配軚盤+/-轉檔懸掛系統：(前)麥花臣/ (後)多連桿制動系統：(前/後)通風碟輪圈：合金 (前) 8.5J x 20 (後) 11.5J x 21輪胎：(前) 245/ 35 ZR20 (後) 305/30 ZR21長x闊x高：4,542 x 1,852 x 1,301mm軸距：2,450mm車重：1,600kg0-100km/h：4.3秒 (4.1秒with Sport Chrono Package)極速：291km/h耗油量：10.5-10.3L/100km (Combined)碳排量：238-234g/km售價：HK$3,269,352 ( 測試車連額外裝備 ) 

在SUV及MPV當道的年頭, 以房車身份搶攻本港車壇的比亞迪 (BYD) SEAL, 已廣為市場受落。 而SEAL在港上市才一年多, 廠方已替其推出中期升級版本。 上次駕駛SEAL, 是2023年底廠方安排的珠海賽道試駕體驗活動, 但SEAL抵港交車後, 卻未有機會再次體驗它的強悍性能, 在香港路面上的表現如何。 新登場的2025年中期升級版本, 頂級的Performance – AWD型號上, 更特別加添一個重要項目, 就是「雲輦-C」智能懸掛車身控制系統, 以車身多個傳感器的資訊、透過電磁閥控制個別吸震筒的硬度, 令原已出色的運動化操控再度強化, 並提升舒適度。2025年版本的SEAL, 繼續有三個版本供應, 分別是標準續航版、超長續航版、以及今次測試的四驅性能版Performance – AWD。 跟超長續航版一樣, 磷酸鐵鋰刀片電池容量為82.56kWh, 並支援最高150kW快速充電。輸港版本未有跟隨中國內銷版, 升級成更高效能的「e平台3.0 Evo」, 亦未有加入「天神之眼」激光雷達, 可見檔風玻璃頂部沒有貌似倫敦的士頂燈的凸起位置。 那麼, 2025年版本最吸引的是甚麼? 相信就是售價。 不僅沒有加價, 當日的測試型號Performance - AWD的「一換一」售價還酌減至298,000港元, 對高性能純電動房車迷而言, 可會是一個喜訊。 是次更新在於外觀、設備, 以及操控強化上, 而建基於「e平台3.0」的車體尺碼維持不變, 4,800mm車長與2,920mm軸距,   依然提供出色的後座膝部空間。輪胎尺碼依舊, 同配馬牌  (Continental)  EcoContact 6Q輪胎, 但輪圈換上了更富時代感的設計, 再襯上紅色前制動卡鉗, 雖然後卡鉗並沒有特別塗裝, 也巧妙地為造型增添辛辣感, 正好切合SEAL的活躍性格。收納眼鏡的專屬空間, 不少車都有, 位置大都設於方便到最多人的位置, 亦無需顧及左右軚版本生產上的複雜性, 即是離不開車廂中間, 上又好、下也好。 2025年版本的SEAL, 破格地將眼鏡盒裝在駕駛席門框頂部、扶手位置。 方便與否？實屬見仁見智, 但至少毋須佔用中央的空間吧！車內裝備及陳設大致上維持不變, 音響系統同為附設12具揚聲器的DYNAUDIO款式。旋轉式15.6吋中央屏幕, 除可對應無線Apple CarPlay外, 智能底盤的選項目錄, 亦方便地可於少至兩下點擊後開啟, 在駕駛途中即時調校也相當方便。 選項亦基本上只有三項, 除轉向助力模式外, 有主動懸掛模式、制動助力模式, 以及舒適停車。 各項調校除舒適停車為開、關外, 其餘皆是舒適和運動兩個選項, 未如某些車種般可作多段強弱調校。全景天幕照樣提供, 而車廂內重點新設備, 就是為更增設電動遮陽簾。比亞迪自主研發的CTB (cell-to-body) 技術, 配合能量密集的刀片電池, 重量集中而且重心低、車架抗扭性之高, 單靠傳統機械結構的懸掛系統, 原已能交出穩定貼服的彎路表現。 而「雲輦-C」智能懸掛車身控制系統, 更在對抗車身傾側上再下一城。在彎路中, 系統會主動將被慣性壓低的外側吸震筒加硬, 從而更有效地對抗車身傾側, 令這部馬步穩紮的SEAL, 讓駕駛者出彎時可更有信心地提早加速。加速時的「仰頭」動作, 以及煞車時的「點頭」動作, 系統亦會調節吸震筒的硬度去嘗試主動中和, 有助提升乘客的舒適感。 凹凸路面的處理上, 也見系統有所行動。 實測上反應又如何？如屬大面積的「氹」, 又或輕微凹凸仍可有效對付, 但未可以連減速壆、爛泥沙石路也變得如履平地, 反而帶來一份緩緩地「拋上拋落」的感覺, 仿如坐船一般, 未算不舒適, 但感覺並不自然。 概括地說, SEAL身上的「雲輦-C」系統, 能有效提升操控性能, 但在舒適性上效果, 卻未如在性能上發揮得那麼好。 畢竟SEAL是性能系車種, 即使舒適性未達勞斯萊斯級數, 但仍可以接受。2025 BYD Seal Performance - AWD規格表摩打類型：永磁同步最大馬力：530ps (390kW) 峰值扭力：670Nm傳動形式：前後雙摩打四輪驅動傳動系統：單速直接驅動0-100km/h：3.8秒電池容量：82.56kWh續航距離：580km (NEDC) 懸掛： (前) 雙搖臂、 (後) 多連桿制動系統： (前) 鑽孔通風碟、 (後) 通風碟長x闊x高：4,800 x 1,875 x 1,460mm軸距：2,920mm車重：2,185kg最高充電功率：150kW售價：HK$298, 000 (須符合「一換一」資格) 

平治全新純電動嘅 G580，除咗外觀保留經典G-Class風味之外，全車內外都同樣都好有卡士，不過亦同時亦保留埋G-Class相當昂貴嘅傳承。測試嘅G580e Edition One，係第一年生產嘅特別型號，加埋額外設備，售價係港幣$2,920,000；之後生產嘅稱為G580 with EQ Technology，售價係港幣$2,380,000起。無論係邊一款，賺錢能力冇返咁上下，就唔係咁易擁有了。越野車之中，講man、講型，來自德國嘅平治G-Class，一直都係man到爆又型到震。至於外觀保留經典G-Class風味嘅全新純電動G580e，同樣都係man到爆又好型。近年有不少女明星步入50歲，但又keep得好fit仲好靚，娛樂記者就會大字標題稱為凍齡美魔女。至於1979年面世嘅G-Class，也差不多步入50歲，一直都keep住個剛猛外形，又唔玩整容變臉，就算出純電版本，依然維持數十年不變嘅方正剛猛外觀，而且依然威猛有型，係咪都應該稱為凍齡型魔男呢。  高性能硬派越野車外觀保留經典G-Class風味嘅G580e凍齡型魔男，仲擁有非常犀利嘅技術，尤其係關於越野嘅先進功能，更加係令人嘩嘩聲，包括 G-TURN、G-STEERING及智能越野爬升斜坡等功能。不過呢啲勁辣招式，要留返遲啲有越野機會先可以試。 純電驅動嘅G580e，續航力有491公里 (WLTP)，四個獨立控制電動摩打最大總輸出馬力587匹，峰值扭力達到1,164Nm，0-100只需4.7秒。可以話係所有G-Class之中，講威！除咗G63 AMG認咗第一，就到佢最犀利。講到數十年不變，進入車廂前，係要按一下車門把手嘅老式按鈕，而唔係高科技嘅彈出式把手，關上車門時仲要發出堅實沉厚嘅聲音，非有儀式感。車廂佈置精美，用嘅都係高質材料，不過除咗駕駛儀表及中控螢幕係電子化操作，車廂仍然有好多維持實體掣鈕，貫徹越野車嘅硬朗實用神粹。維持G-Wagen駕駛感覺電G嘅0-100km/h加速只需4.7秒，不過操控就唔係超級跑車咁靈敏， 駕駛反應係偏向越野車嘅沉穩，在山路上可以快跑，不過在連續S彎上嘅車身控制反應不夠敏銳。當在彎前重腳減速入彎，就會感到那超過三噸嘅重量，出彎要加速時，就更加明顯感受到超過三噸嘅重量，拖慢出彎嘅速度。 話需如此，但電G嘅操控感覺好堅實，能提供不一樣嘅電動車駕駛樂趣。加上又有特別設計嘅「G-Roar」扮V8引擎音效，能夠跟隨電門加速而變化，製造些微V8引擎氣氛，雖然聲浪不大，但也不會單調而令人厭煩，聽起來又覺得非常合適，亦相當過癮。保留經典梯形越野車底盤由於保留經典嘅梯形框架越野底盤，廠方將116 kWh 電池結合於底盤框架之內；當進行越野駕駛時，車底嘅保護係至關重要，所以又在底盤下方加上碳複合材料防撞裝置。 除此之外，可切換波段嘅波箱，具備Low Range越野減速功能，涉水或越泥功能最深可達850毫米，又可在斜度最高達 35° 斜坡上行駛，前部接近角/離去角為 32°，後部接近角/離去角為 30.7°等等強勁越野功能。擁有硬派越野功能嘅豪華SUV整體而言，電G係我們駕駛過最具機械感嘅電動車，設計出色，電動化高科技中又可維持經典G-Wagen功能，日常駕駛又寧靜舒適，駕駛輕鬆容易，完全可以在硬派越野車中佔有一席地位之餘，亦可滿足豪華SUV嘅需求。2025 Mercedes-Benz G580e Edition One 規格表摩打形式：恆磁同步摩打電池容量：116kWh鋰離子電池最大馬力：587ps峰值扭力：1,164Nm續航距離：491km (WLTP)傳動形式：四摩打四輪驅動傳動系統：單速直接驅動0-100km/h：4.7秒極速：180km/h懸掛系統：(前)雙搖臂/ (後)De-Dion 車軸制動系統：(前/後)通風碟長x闊x高：4,624 x 2,187 x 1,986mm軸距：2,890mm車重：3,500kg快充：200kW (10-80% ) 32分鐘售價：HK$ 2,920,000 / G580 with EQ Technology：HK$2,380,000 起 (意向價格)

外形充滿濃烈意大利設計風格，配合動感設計嘅車廂，而且搭載唔錯嘅數碼技術裝備，車外車內都有明顯又充滿趣味嘅特色設計，車廂空間實用，重點係以駕駛趣味吸引消費者，尤其係一眾Alfa粉絲，十成會中毒。  Alfa Romeo終於打開電動車嘅篇章，全新嘅Junior小型純電 SUV，係Stellantis集團旗下備受好評嘅e-CMP電動車底盤發展而成。經常有人問我買車，到底係日本、德國，定係意大利或法國車好。冇呃你，個順序九成都係日本排先，然後係德國，意大利及法國。會揀意大利或法國車，九成都係中毒。不過中毒嘅唔係毒男毒女，反而係不乏潮人及專業人士。道理好簡單，揀車就好似出街想飲嘢，冇乜idea，穩穩陣陣咪揀茶囉；想有型少少，揀Americano囉，有品味，梗係Espresso啦！不過口感濃烈嘅Espresso，唔係人人都覺得好飲。鍾意嘅人，甚至會講究埋Espresso浮面嘅一層Crema，唔夠濃厚都覺得唔合格。Alfa Romea嘅設計特色，其實真係幾似Espresso浮面嘅一層Crema，不過就唔係人人都識欣賞。 新車原本計劃命名為 Milano，不過由於新車在波蘭廠房生產，雖然在意大利設計，外形充滿意大利風情，但就未能符合意大利政府嘅「made in Italy」規定，廠方就改用曾用於六、七十年代嘅 Alfa GT Junior 轎跑車嘅Junior來命名。Junior係Alfa Romeo第一架電動車，配54kWh電池，採用400V電力架構，用100 kW DC直流快充，可以在30分鐘內將電量由20%充 80%。至於最大馬力就有156匹，峰值扭力260Nm，單摩打，前輪驅動。 主打電動SUV市場嘅Junior，設計團隊似乎不甘心於SUV嘅平淡，於是在車上出現好多Alfa嘅徽章、好似浮雕嘅車尾燈，甚至冷氣風口都有廠徽。車廂設計仍然帶有燃油車味道，如果有支波棍就更加似跑車。前、後座空間不算寬敞，但已可舒適乘坐四名成年人，行李箱空間亦可滿足日用要求。續航距離，以WLTP 標準計算有410公里，城市行車就可以超過592公里。由於電池唔算大，車重可以維持在冇咁重嘅1,545 公斤，所以操控就可以做到比一般超過兩噸嘅電動車靈活敏銳。單睇性能數字，Junior嘅0-100要9秒，幾乎輸晒畀高容量電池嘅內地電動車對手。但車重 1,545 公斤嘅Junior，雖然仍然比同級嘅燃油車要重，但勝在比搭載大電池閒閒地2,000公斤以上嘅對手輕盈，跑山路明顯靈活敏銳得多，相形之下，0-100跑得好快嘅對手，跑山路嘅靈活性就相形見拙了。來港發售嘅Junior有兩個版本選擇，分別為 Launch 版本及 Sport 版本，售價分別為 港幣$359,800 及$429,800，首批預售有得送40,000元嘅「Technology Pack」升級配備，包括LED矩陣大燈、無邊框自動調節光暗車廂後視鏡、無線智能手機充電器、泊車感應系統、導航系統、遙控電動尾門、免匙啟動、車道偏離嘅自動調節巡航控制、後視鏡頭及交通標誌自動識別功能。2025 Alfa Romeo Junior 規格表摩打形式：恆磁同步摩打電池容量：54kWh鋰離子電池最大馬力：156hp峰值扭力：260Nm續航距離：592km (City) 410km (WLTP)傳動形式：前輪驅動傳動系統：單速直接驅動0-100km/h：9秒長x闊x高：4,173 x 1,981 x 1,532mm軸距：2,562mm車重：1,545kg售價：HK$359,800   (Launch Edition)、HK$429,800 (Sport Edition) / (one-for-one replacement scheme)

採用全新純電Pickup底盤嘅T9 EV，係JAC首款雙摩打4X4電動Pickup，高頭大馬嘅外形，提供又高又闊嘅視野，山路上表現比想像中靈活，在市區揸住佢，會有大地任我行嘅感覺，操控亦輕鬆容易。動力來自88.02 kWh磷酸鐵鋰電池，WLTP續航距離340公里，對充電焦慮嘅駕駛人來講係扣分之環節。來自內地嘅JAC T9 EV，以美式Pickup風格包裝，號稱全港首部電動四驅農夫車，售價港幣$368,800，進軍競爭相當激烈嘅香港Pickup商用車市場。乜嘢人會揸呢類車呢？ 講到美式Pickup，T9 EV高頭大馬嘅外形，又真係有啲似來自美國嘅Ford Ranger；不過睇真啲，面積隨時大過勞斯萊斯嘅車頭面罩，又真係幾有霸氣；頭燈及日間行車燈嘅設計，亦採用凌厲風格，加埋尾箱上嘅防滾架，粗獷味爆燈。 Pickup在香港叫農夫車，不過香港農夫其實唔多，乜嘢人會揸呢類車呢？一般會用作工程車，建築地盆腳車，偶然又會有潮人揸Pickup，潮得嚟又真係幾Man。我就覺得冇頂嘅貨斗，揸去滑浪應該幾實用，夠晒吸睛，又唔怕日曬雨淋。大地任我行嘅感覺 高頭大馬四驅底盤設計嘅T9，離地距都相當高，所以車側兩邊踏板唔係扮有型，係真正有需要的。想好有型坐上車的話，最好先拉住A柱上嘅手挽，再按個人身手靈活度，摸索一下用右腳定左腳上踏板最啱自己。 至於又高又闊嘅視野，係幾霸氣嘅。在市區揸住佢，會有大地任我行嘅感覺。燈口起步，前後兩個摩打分別輸出70kW及150kW，夾埋差不多三百匹馬力，加上電動摩打強項就係即時嘅加速，所以驅動3,260公斤嘅T9，依然好爽快。在多彎嘅山路上，揸住車身長5,330mm，軸距有3,110mm嘅T9，比想像中靈活，遇上連續S彎，高離地距嘅車身難免會向外傾，但四個車輪就相當咬地，行車依然平穩，操控輕鬆容易。坐在車廂令人有feel good之感 採用現代化設計風格嘅車廂，配多功能皮革軚盤及數碼儀表，中間係相當搶眼嘅10.4吋觸控螢幕資訊娛樂系統，支援Apple CarPlay及Android Auto智能手機連接，又有無線充電。前座空間相當闊落，後排空間亦令人滿意，配備原廠皮革座椅，仲有一個飲品冷凍格，整體令人有feel good之感。 粗獷味爆燈嘅T9 EV，設備原來都相當豐富。頭燈係自動感光開關，又配備前後霧燈，電動調校嘅門邊鏡可以自動摺合，具備免匙系統及定速巡航，電動調校駕駛座，後座亦有兒童安全座椅扣。安全設備亦十分齊全 包括前座雙安全氣袋、側面安全氣袋及窗簾式安全氣袋，另外仲有一系列電子安全設備：防鎖制動系統、車身穩定系統、制動力分佈系統、斜路起步輔助、循跡控制系統、車輛動態控制、盲點監察、車道預警輪胎氣壓感應等等。2025 JAC T9 EV 規格表摩打形式：恆磁同步摩打電池容量：88.02kWh磷酸鐵鋰電池最大馬力：299ps (前70 / 後150 kW)峰值扭力：516Nm (前176 / 後340 Nm)續航距離：340km (WLTP)傳動形式：雙摩打四輪驅動傳動系統：單速直接驅動極速：140km/h懸掛系統：(前)雙搖臂/ (後)葉片彈簧制動系統：(前/後)碟式車輪；18吋鋁合金輪胎：265/60R18長x闊x高：5,330 x 1,965 x 1,920mm軸距：3,110mm貨箱長x闊x高：1,520 x 1.590 x 470mm車重：3,260kg (G.V.W)淨載重量：800kg快充：DC直流 (15-80% ) 45分鐘售價：港幣$368,800起

面對市場重大變化，在電動車及SUV熱潮衝擊下，重新設計的 Camry，外形煥然一新，動力系統都經過全面革新，後座乘客可自行調節椅背斜度及冷氣系統，豪華設備及安全系統再有提升，無論作為公司車還是家庭車，繼續滿足用家需求。在電動SUV氾濫的年代，油電混合的中型房車還有生存的空間嗎？在香港，只要有一個屬於自己的充電位，相信大部份車主諗都會立即改用電動車，因為電動車不單止每月可以省回大筆燃油費，維修保養的支出亦相對較少，這種經濟上的好處，並非一味駕駛樂趣就可以完全無視，畢竟，巿場上的「用家」比「玩家」還要多。SUV 的出現，幾乎一下子把所有傳統中型房車打入冷宮，原本已經夠慘慘豬，殊不知驚魂未定又來個電動車突襲，對於外型早已失去優勢的傳統中型房車來說，若非如 M5、RS5 或E63S 這類形象鮮明個性極端的跑房車，實在是難以生存。因為咁，不少車廠已靜靜雞把中型房車類別下架，而豐田 Camry 能夠堅持到今天第9代，當然有其過人之處。為了擺脫車款老態的形象，從第6代開始，設計師已不斷嘗試加入創新的車身線條，到了第8代以 Beautiful Monster 作為設計口號的 Camry，外觀就更加是脫胎換骨。至於今代以 Energetic Beauty 作為設計理念的全新 Camry，就更能體驗這種前衛的變化，其造型進化之大，基本上已看不出跟歷代 Camry 有何血緣關係。除了車身之外，動力系統都經過全面革新，全新的第五代THS油電系統，引擎提供1.8L、2.0L及2.5L三種選擇，而Camry則採用一副編號 A25A-FXS 的2.5公升直4自然吸氣引擎，電池組由3.7V 4.08Ah的三元鋰電池組成，電容量為2.72kWh，混合動力輸出可達230ps，7.2秒內完成0-100km/h的加速。行車模式設有 Normal、Sport、Eco及純電EV mode，另設有S檔及軚盤+/-轉波系統。油電同時爆發的動力不算強，若選擇了S檔，大腳踩油還是可以感受到輕微推背的。雖然，外觀上加入了不少跑車化的設計元素，但操控實際上又不見得有甚麼激進的表現；懸掛的濾震力是一貫豐田中型房車的水準，不硬不軟的柔韌度剛剛好，公路定速巡航亦無飄浮感；軚感及轉向反應都是易於掌握，準確而又不會令人心跳加快，操控感紮實中帶輕巧，說到底，舒適、平穩、可靠及安全才是 Camry 的核心價值。相對於動感的外觀，車廂設計會顯得有點保守，不過設計師沒有把所有車廂功能納入12.3吋觸控屏幕之內，應該是為了照顧一類中年用家。個人認為最貼心是後排首次加入的中央手枕控制面板，讓乘客可自行調節椅背斜度及冷氣系統。標準配備還有電子防眩後視鏡、HUD 顯示器、三區恆溫冷氣系統連 Nanoe X 納米離子空氣淨化系統、10 安全氣袋及 Toyota Safety Sense 3.0 主動安全系統，而新增的PDA 防護駕駛輔助功能，更會透過偵測障礙物主動提供轉向及制動輔助，確保行車安全。雖然現今的 SUV 底盤調校技術已非常精良，但基於物理限制，靈活性始終不及 Sedan；而Compact SUV，雖則可提升靈活度，但短軸距又會影響車身穩定度，舒適性自然打折。先天的物理優勢，再加上累積多年路面實戰經驗的 Camry，能夠做到的穩妥舒適與恰當的科技，大概就是 Camry 的存在價值。2025 Toyota Camry HEV 規格表引擎形式：L4 VVT-iE汽缸容積：2,487c.c.最大馬力：187ps@6,000rpm峰值扭力：221Nm@3,200-5,200rpm傳動形式：前置引擎/前輪驅動電動摩打：恆磁同步交流最大馬力：135ps最大扭力：208Nm綜合馬力：230ps傳動系統：E-CVT無段變速配軚盤+/-轉檔懸掛系統：(前)麥花臣/(後)雙搖臂制動系統：(前)通風碟/ (後)實心碟輪圈：18吋合金輪胎：(前/後) 235/ 45 R18 Bridgestone Turanza長x闊x高：4,920 x 1,840 x 1,455mm軸距：2,825mm車重：1,585kg油耗：19.6km/L售價：$395,700 up

新款Taycan Turbo S售價由港幣 $3,368,000起，電池性能及續航力再有提升，加速也快得驚人，是一架擁有保時捷跑車功架的電動跑車。至於320 kW DC直流快速充電功率，亦係一個賣點，加上係四門跑車，續航力亦提升至最高630公里，令新車更加符合日用需求。推出已超過四年的純電動Taycan，我們在2020年尾試初代Taycan Turbo S時，當時已經對其2.8秒0-100的強勁加速，留下深刻印象。 新款Taycan屬於中期小改款，新車外形變化不大，但其實最大變化係內涵，基本上已係全新設計。Taycan係電動跑車，講到內涵，首先係電動性能上，有好大嘅提升。新電池不但有更高容量，仲要輕咗，充電速度亦快咗；800 V 電力架構嘅直流充電系統經過改良，可以提供最高 320 kW 嘅 DC 直流快速充電功率，由10% 充至 80% 只需18分鐘，比初代Taycan嘅37分鐘充電時間減少一半有多，已經更為接近去油站入油嘅時間。新車續航力再有提升，綜合路況係558 – 630 公里，如果係城市駕駛，續航力係更加長嘅612-691公里。事實上，單係綜合路況，已經比初代Taycan嘅388-４12公里行遠咗好多。雖然話新款外形變化不大，其實前後LED車燈係全新設計，新嘅四點式高清矩陣頭燈，造型更加醒目。 值得一提係，所有車型都標準配備經過改良氣流動力性能嘅輪圈，同埋低滾動阻力輪胎，而且仲特別針對 21 吋胎軨，開發咗專用嘅新輪圈及輪胎。最大馬力775匹嘅Taycan Turbo S，加速的確好快。至於Sport Chrono新增好似Formula E賽車嘅 Push-to-Pass (一鍵加速) 功能，有 10 秒提供 70 kW 額外動力，要超車爬頭，其實真係快得嚟又幾過癮。講到快，新車用埋Launch Control起步，最大馬力可標升至952匹，峰值扭力達到1,110Nm，0-100 只需2.4秒，又比初代嘅Taycan Turbo S快咗0.4秒。而且0- 200時速公里，只需7.7秒，比初代嘅9.6秒，再快1.9秒。至於極速就同樣係時速260公里。新款Taycan都標準配備自動感應氣壓懸掛，加上Turbo S又係四輪驅動，在多彎嘅山路上，高速劈彎不但穩如泰山，由軚盤傳來嘅路況感覺清楚又明確，轉向靈活敏銳，而且又可選配全新嘅Porsche Active Ride系統，透過電子液壓控制四個車輪，感覺就好似熨斗咁，熨平不同嘅路面，令行車更順暢之外，快跑劈彎嘅感覺更爽快利落，係現時我們試過最有跑車功架及駕駛樂趣嘅電動車。除咗性能更強加速更快之外，廠方亦強調新車更節能，因為採用了升級軟件嘅脈衝逆變器，加上性能提升嘅電池、改良熱量管理概念、全新熱泵，以及調整過動力回收，於高速下煞車嘅最大動力回收功率，增加超過 30%，從 290kW 提升至最高 400 kW。整體而言，保時捷在電動車最重要嘅環節，尤其係續航力及充電速度，為Taycan進一步改進之外，其跑車化性能依然強橫。儘管電動車市場競爭出現極大變化，但Taycan憑藉出色的運動化駕駛表現，乘坐又舒適，日常使用也方便，令Taycan繼續成為市場上其中一款最出色的電動跑車。2025 Porsche Taycan Turbo S 規格表摩打形式：永磁式同步摩打電池容量：97kWh鋰離子電池最大馬力：775ps ( with launch control：952ps)峰值扭力：1,050Nm( with launch control：1,110Nm)續航距離：558-630km (WLTP Combined)0-100km/h：2.4秒0-200km/h：7.7秒極速：260km/h傳動形式：前後摩打/四輪驅動傳動系統：前單速/ 後雙速懸掛系統：(前)雙搖臂/ (後)多連桿輪圈：21吋合金輪胎：(前) 245/40 R21 / (後) 285/35 R21 長x闊x高：4,962 x 2,144 x 1,378mm軸距：2,900mm車重：2,295kg售價：$3,368,000 up

純電動的保時捷 Macan，雖然欠缺汽油引擎獨有的澎湃加速氣勢魅力，但憑著出色的典型保時捷動態反應，靈敏的軚感，操控敏銳而又容易駕駛，在彎路靈活而穩健的車身控制，依然能夠維持保時捷的一貫跑車化駕乘感覺；再加上電動車的尖端技術、造工一流，精心設計而且華實並重的車廂，令純電動 Macan，成為市場上最出色的電動車之一。由引擎驅動，轉為純電動 Macan，可以繼續成為保時捷最暢銷車系之一嗎？走運動型路線的保時捷 Macan 於2014年推出市場，到 2018 年首次小改款時，全球已售出 350,000 架，成為保時捷最暢銷兩大車系之一，可見幾受市場歡迎。至於全新第二代 Macan 已經轉為純電動，而另一款最暢銷係大哥 Cayenne，亦將會推出純電動新車。 提到 Macan 及 Cayenne 兩款車系，不但暢銷，仲佔廠方總銷量一半以上，即係非常有賺錢能力。講到賺錢，就會意識到全新的電動車底盤，對保時捷未來幾年嘅利潤係幾咁重要，而且係非常有賺錢能力。講到賺錢，就會意識到全新設計的電動車底盤，對保時捷未來幾年利潤係幾咁重要。到底保時捷廠方係點樣研發純電動 Macan 呢？ 首先係採用全新 Premium Platform Electric (簡稱PPE) 電動車底盤開發而成，所以同內燃引擎 Macan，係冇任何一個部件共享，甚至連引擎蓋上的徽章亦都冇共享。雖然都係 Macan 車系，但實際上已經係完全不一樣汽車工程設計的電動車。充電要快！廠方為 Macan 搭載 800V 高電壓電力架構，配總容量 100kWh，可用量為 95kWh 電池，而且充電系統可按充電設施分為 800 V 和 400 V，DC 充電功率分別為 270 kW 和 135 kW， 270kW 的快速充電，可在 21 分鐘內將電池從 10% 充到 80%。 續航力都要夠長氣！香港消費者非常關注的續航力，純電 Macan Turbo 算係幾長氣，WLTP 綜合續航力可以做到 591km，至於市區續航力就有 765km。跑車化的馬力及加速車迷最期待的性能表現方面，Macan Turbo 配前後兩個摩打，構成四輪驅動佈局，最大馬力有 639ps，峰值扭力 1,130 Nm，0-100km/h 係相當快的 3.3秒，極速 260 km/h。數值上，完全係跑車化的SUV。 懸掛系統一直係保時捷的強項，除咗採用雙閥門技術的PASM保時捷主動式懸掛系統，仲配備後軸轉向系統、電子式保時捷牽引力控制管理系統 (ePTM)，最重要係 Turbo 版仲有保時捷扭力分配升級系統 (PTV Plus)，即係話預咗駕駛人會好激進駕駛，底盤都會非常聽話。在路面上，Macan 的軚感，無論是操作力度，轉向敏銳準確的即時反應，都是十分有跑車感。加上電門的操作力度與反應沉穩而線性，懸掛在彎路上對車身外傾的控制，都實實在表現出保時捷應有的跑車風格，駕乘表現比同級的 SUV 對手都要出色。 在日常環境中的駕駛，動力輸出及制動反應都是偏向線性的，所以操控就非常輕鬆容易，不會出現加速及減速時產生的頓挫感。在山路上快跑，Macan Turbo 的性能也是一流的，雖然比汽油版重約400kg，但由於電池在車底，重心低了，轉彎抹角時也一樣平穩流暢。數值上，Macan Turbo 的 3.3 秒 0-100km/h 加速反應，因為沒有了引擎的咆哮聲，感覺好像很斯文，也因為四輪驅動的佈局，又配備了十分厲害的 PTV Plus 保時捷扭力分配升級系統，的確很少機會可以令車輪胎嘶叫，而且整體的氣壓懸掛表現十分出色，令 Macan Turbo 在各方面都有出色的平衡。 如果要揀有典型跑車感覺的 SUV，Macan Turbo 的確係錯不了的選擇。2024 Porsche Macan Turbo Electric 規格表摩打形式：前、後軸配恆磁同步摩打電池容量：100kWh鋰離子電池最大馬力：639ps峰值扭力：1,130Nm續航距離：765km (City) 591km (WLTP)傳動形式：四輪驅動傳動系統：單速直接驅動0-100km/h：3.3秒懸掛系統：(前)多連桿/ (後)多連桿制動系統：(前/後)通風碟輪圈：20吋合金輪胎：(前) 235/55 R20 (後) 285/45 R20長x闊x高：4,784 x 1,938 x 1,621mm軸距：2,893mm車重：2,405kg售價：HK$ 1,448,000 up

並非為速度而生的Abarth 500e，其實是講求操控輕巧矯捷的掀背小鋼炮，至於非常意大利設計的車廂，還有趣緻而令人喜愛，又有少少辣的跑車化外觀，令Abarth 500e係一架令人有驚喜的電動城市小車之外，同時亦係一架非常有玩味的意大利hothatch，雖然售價不及中國電動車便宜，City續航力亦只有336km，但卻具備令人好想擁有的魅力。當歐盟決定2035年起停止銷售引擎車，以推動低碳嘅電動車，車迷最熱愛嘅hot hatch小鋼炮，似乎都難以避免要淘汰汽油引擎的命運。 面對要進入電動車世代，來自意大利的Fiat，對策是將十分受歐洲市場歡迎的500掀背車系，轉型為電動hatchback。但對於專造運動型hot hatch的Abarth來說，沒有了渦輪增壓四汽缸引擎，轉為電動摩打，係咪可以取代汽油引擎嘅駕駛樂趣？複製Abarth汽油引擎聲為了彌補電動摩打欠缺的誘人引擎聲浪，Abarth為500e的車廂及車尾下方，加了稱為sound generator的「發聲裝置」，複製Abarth典型的汽油引擎澎湃聲浪。 啟動了「發聲裝置」而開車的話，無論是車廂內還是車外，都會隨住車速的升降而發出引擎咆哮聲，相當有趣。不過引擎聲浪並無轉波的激烈起伏變化，也不會發出拖波補空油的轟然高鳴的動人音效。開了幾分鐘後，就會覺得沒有激烈變化的引擎聲浪相當沉閃，要關掉的話，更需要把車停下來，才可在選擇項目中取消。 我反而會建議廠方應該為軚盤加上右升左降的regen撥片，不但可模擬在軚盤加減轉波的駕駛樂趣，說不定還可以令「發聲裝置」發出模擬補空油的動人音效，就更為理想了。高性能hot hatch版本Abarth 500e其實係Fiat 500 Electric 嘅高性能hot hatch版本，同樣建基於FCA與PSA合併為Stellantis之前開發的電動車底盤。懸掛只係簡單嘅前麥花臣支柱，後扭力桿。不過彈弓就比Fiat 500e更硬，吸震筒亦經過Abarth重新調校。 老實講，呢個底盤並唔係最新科技，又唔係機械上好高規格嘅電動車底盤，但hot hatch小鋼炮，往往就係因為簡單直接嘅汽車機械工程，而造就輕巧靈活，出色又好玩嘅操控表現。唔係好快  但操控好過癮為了要輕巧，Abarth 500e同Fiat 500e都係配比較細的42 kWh 鋰離子電池，最大馬力由118匹調高至155匹，峰值扭力由220Nm高至235Nm，0-100km/h加速需時7秒。 今時今日一街都係3至4秒就完成0-100嘅電動車，Abarth 500e嘅0-100係7秒，追求速度嘅朋友未必會滿意。不過試完車後，Abarth 500e的確唔係好快，但係操控就非常過癮。馬步穩健的底盤在路面上，車重1,360kg的Abarth 500e，由於車身輕，又比普通500e多咗37匹的馬力及15Nm的扭力，又多得電動摩打的瞬間加速力，無論係燈口起步還是要超車爬頭，不但得心應手，加上短軸距的車身小巧靈活，在山路上快跑，又真係幾過癮的；就算劈彎，馬步穩健的底盤，都幾難令四條Bridgestone Potenza Sport輪胎發出淒厲的嘶叫聲。駕駛模式分別為Turismo、 Scorpion Street及 Scorpion Track。Turismo模式：馬力和扭力會稍為降低，動力輸出柔順些，適合日常用途；Scorpion Street：提供最高性能，並同時提供最強的regen動能再生煞車；Scorpion Track：顧名思義，就係最激進的模式。在Turismo或Scorpion Street模式下，可以用one pedal方式駕駛，右腳離開電門，就會即時減速。 值得一提係，車廂內的門邊手挽內，有特設的500e壓紋圖案，無線充電位置則是都靈市的高樓大廈剪影壓紋，感覺係幾得意又窩心的。至於天窗亦可令車廂多些天然光，後座空間只乘二人，由於單門的設計，出入後座就較為不便。2024 Abarth 500e 規格表摩打形式：恆磁同步摩打電池容量：42kWh鋰離子電池最大馬力：153hp峰值扭力：235Nm續航距離：336km (City) 253km (WLTP)傳動形式：前輪驅動傳動系統：單速直接驅動0-100km/h：7秒懸掛系統：(前)麥花臣/ (後)扭力桿制動系統：(前/後)通風碟輪圈：18吋合金輪胎：(前/後) 205/40 R18 長x闊x高：3,673 x 1,682 x 1,518mm軸距：2,322mm車重：1,360kg售價：HK$399,800 up  (one-for-one replacement scheme)