法拉利於今年4月發布嘅296 Speciale，今日正式在香港推出，新車售價由HK$6,680,000 起。更專注賽道嘅296 GTB進化版 法拉利嘅Speciale特別版，一貫都係以更高性能、更輕量化同埋更專注賽道表現為宗旨，作為296 GTB嘅進化版，296 Speciale 就成為更專注賽道表現嘅極致版，同時亦要延續法拉利經典Speciale車型嘅使命，例如360 Challenge Stradale、430 Scuderia、458 Speciale 同埋 488 Pista嘅傳承，仲融入埋法拉利最新賽車技術及現代混能科技。減磅又提升性能 要成為 Speciale，首要係輕量代，所以廠方將已經好fit，完全唔肥嘅296 GTB再地獄式減磅60kg。 重量嘅減輕，係透過大量引用法拉利賽車領域嘅技術，除咗車身部件採用更多碳纖維之外，3.0公升雙渦輪增壓120度V6引擎內部亦零件減輕9kg，其中有源自296 Challenge嘅鈦合金連桿，源自F80嘅活塞連桿，以及更輕嘅曲軸及渦輪增壓器，仲有採用曾問鼎2023年、2024年及2025年利曼24小時耐力賽嘅499P賽車引擎汽缸體及曲軸箱嘅先進賽車技術，令全車減磅60kg，馬力重量比達到1ps/1.6kg。0-100km/h加速只需2.8秒 296 Speciale嘅混合動力系統，包括中置雙渦輪V6增壓引擎及一個位於引擎及波箱之間嘅電動摩打，結合源自F1嘅爆震控制系統， 令呢副V6引擎最大馬力，比標準GTB高出37匹，達到700匹馬力。同時，法拉利為8前速雙離合器波箱進行升級，有效縮短換擋時間，提升整體性能及駕駛體驗。此外，升級嘅電動摩打再進一步增加180匹馬力，令總輸出馬力達到880匹，比GTB高出50匹馬力，是現時法拉利後輪驅動車型中最高馬力嘅車型。動力透過8前速雙離合波箱驅動後輛，0-100km/h加速只需2.8秒，極速330/h。擾流設計參考296 Challenge賽車 在時速達到250km/h時，296 Speciale能產生435kg下壓力，相較296 GTB提升20%。車頭前艙蓋兩側各設有一組源自296 GT3賽車嘅百葉窗造型通風口，能有效降低輪拱罩內部氣壓，改善高速下壓力表現。尾部最引人注目嘅空氣動力學設計，融合源自法拉利FXX K賽車嘅兩大設計元素，包括垂直翼片及小翼設計，兼具雙重空氣動力學功能：垂直翼片可提升車尾氣流管理以降低風阻，而水平翼面輪廓則產生下壓力作用。296 Speciale嘅擾流板，透過全新執行器控制進行管理，不但將低風阻（LD）模式與高擾流下壓力（HD）模式兩項不同設置嘅切換時間縮短50%，仲新增埋中度擾流下壓力（MD）模式，有效提升新車在高速行駛時嘅車尾穩定性。簡約車廂設計 為咗要盡可能輕量化，車廂採用專精簡設計，大量採用碳纖維，門壁亦係輕量化碳纖維製作，可調靠椅背傾斜度嘅Carbon Tubular Frame Bucket seats賽車化座椅，亦以碳纖維管框製成，總之一切都以減磅及提升性能為目標。電子控制系統及懸掛設置 新車具備最新一代法拉利ABS Evo動態控制系統，除此之外，廠方又針對彈簧及減震器設置進行細致調校，底盤離地距相較於296 GTB降低5mm；此細微變化將轉彎時的最大傾角減少13%，提升過彎極限駕駛性能表現。同場展示兩款296賽車仲有499P Modificata賽車快閃展出 除咗主角296 Speciale之外，本港代理仲展示296 Challenge及296 GT3賽車，另外仲有296 GTS開篷跑車。 值得一提係，有法拉利V6頂級之作稱號的499P Modificata，翌日亦突發來港加入快閃展出！499P Modificata係一款專為非賽車賽事賽道駕駛而設嘅限量版跑車，亦係慶祝法拉利於2023年賽季，歷史性重返Le Mans利曼24小時耐力賽嘅頂級組別而生。限量版跑車499P Modificata，以法拉利在2023至2025賽季，參加利曼大賽嘅499P賽車作藍本並加以改良。搭載於車上的混能系統，應用沿自296 GT3嘅V6引擎，又採用中後置布局和加以改良。結合可輸出272ps馬力嘅前置摩打、7前速序列式波箱，令整套混能系統最大馬力輸出達870ps。 值得留意係應用於混能系統的電房摩打，配有差速器及可於減速、制動過程中，為電池充電嘅ERS能量回收系統。而800V電池組，則係基於法拉利豐富嘅F1賽車經驗開發而來。

根據每款入圍新車的性能與操控表現、整體設計和裝備配搭、乘坐舒適度跟整體實用性，以至是否物超所值等多個環節，編輯部按不同類型車種，評選出《Car Of The Year Awards 2024》得奬車款。2024年新車登記數目有46,709部，比起2023年的44,169部，錄得2,540部增長，但增長幅度明顯放緩。儘管如此，受惠於政府的「一換一」電動車稅務寬減優惠，電動車仍在本港市場佔有領導地位。去年本港新登記的電動車數目有33,206部，比汽油車的13,503部，多出達19,703部，故入選並奪得《Car Of The Year Awards 2024》的車款，都是以電動車為主。Electric Hot Hatch of the YearABARTH 500e Hot Hatch以細小輕巧性能強作賣點，而走這路線的ABARTH 500e，更多加電動車零排放這項優點。雖然跟FIAT 500e由同一底盤發展而成，但馬力、扭力分別調升至155hp和235Nm，0-100km/h加速可在7秒內完成。如此表現令ABATH 500e優於同級對手，因而獲選為「Electric Hot Hatch of The Year」。Electric Large Luxury MPV of the YearDENZA D9 主攻電動豪華MPV市場的DENZA D9，有單摩打前驅、雙摩打四驅兩個版本選擇，馬力高達369hp，結合103kWh BYD刀片電池，WLTC續航距離最多有520km。在氣派十足的造型內，豪華配備一應俱全，中排是獨立大班椅，兼具記憶、按摩和通風功能，而具備冷凍和保溫功能的雪櫃、以中控台15.6吋觸控屏幕為中心的DENZA Link超智慧互動座艙，都是DENZA D9的標準配備，也是被評為「Electric Large Luxury MPV of the Year」的必要條件。Electric Performance Car of the YearHyundai Ioniq 5 Ioniq 5是備受本港市場歡迎的韓國電動車之一，配備應有盡有，又有三個版本供選擇。其中頂級四驅版馬力有325ps，扭力61.7kgm，5.3秒就可以完成0-100km/h加速，性能之強更勝同級，甚至是汽油車對手，獲選為「Electric Performance Car of the Year」更是當之無愧。Luxury Urban SUV of the YearLexus LBX 在市場一片支持電動車的聲音中，凌志卻以配備Hybrid混能系統的LBX，成功擄獲車迷歡心。全線三個版本均以1.5公升三汽缸引擎，配第五代hybrid混能系統，動力充沛兼錄得5.1L/100km平均耗油紀錄。極富動感的造型，加上豪華設備的車廂，令LBX成功獲選為「Luxury Urban SUV of the Year」。Electric Premium 4x4 SUV of the YearMercedes-Benz G580e 面世已有50年的平治G-Class，素以剛猛形象示人，而G580e更加入如G-TURN、G-STEERING等多項新技術，令它更切合車系的剛強越野個性。四組獨立控制的電動摩打，最大馬力587hp，0-100km/h只需4.7秒，性能僅次於平治AMG的G63。結合車廂內的多項豪華配備，G580e獲選為「Electric Premium 4x4 SUV of the Year」可謂實至名歸。Electric Performance SUV of the YearPorsche Macan Turbo Electric 搖身一變成為純電動車的保時捷Macan Turbo Electric，屬Macan系列的第二代型號，並發展自最新的PPE電動車底盤。搭載的前後摩打，構建成四驅系統外，更帶來639ps最大馬力，還有1,130Nm峰值扭力，0-100km/h加速只需3.3秒，極速260km/h。單憑以上數字，加上操控出色，已足夠讓Macan Turbo Electric奪得「Electric Performance SUV of the Year」奬項。Electric Luxury Coupe of the YearRolls-Royce Spectre 長近五米半的Spectre，既是一款電動雙門Coupe，也是勞斯萊斯涉足電動車界別的首個車型。充滿貴氣的造型，擁有一對電動輔助，廠方稱之為Effortless Doors的車門，即使長達1.5m，乘客仍可輕鬆開關，而且是勞斯萊斯首款配備「星光車門」的量產車型，而氣派車廂亦加入了大量數碼配備，享受程度更上一層樓，加上由前後雙摩打帶來584hp總馬力，總扭力900Nm，令重近三噸的Spectre，0-100km/h加速僅需4.5秒，全都是「Electric Luxury Coupe of the Year」獎項得主的必備條件。Electric SUV Coupe of the Yearsmart #3 轉型成電動車生產商的smart，儘管旗下車型已不再是fun car，但新登場的#3，卻以近年市場熱捧的Coupe SUV形態示人。#3全長4,400mm，軸距2,785mm，尺碼比同門的#1大，造型亦富動感得多。車系頂級的BRABUS版本，具備跑車化的外觀和車廂配備外，前後雙摩打輸出馬力428ps，0-100km/h加速只需3.7秒，66kWh電池則可帶來415km續航距離，令smart #3 成為「Electric SUV Coupe of the Year」首選。Electric Urban SUV of the YearXPENG G6 XPENG G6是首款採用一體式壓鑄車身的國產SUV，好處是電池同車廂地板融為一體，可助降低車身重心和提升車廂空間。4.8m車長結合XPILOT 2.5智能駕駛系統、360鏡頭，以及31個感應器，令G6可輕鬆於城市內遊走。另外，輸港G6分有標準和長續航兩個版本，其中775 Pro長續航版，後置馬達馬力285ps，配87.5kWh電池，WLTP續航距離570km。車輛本身又支援280kW直流電快充，20分鐘就可以由10%回復至80%電量，適合日常通勤使用，故G6獲評為「Electric Urban SUV of the Year」可謂當之無愧。Best Electric Vehicle Charging Service ProviderHalo Energy Limited 電動私家車在本港的數量愈來愈多，對充電設施的需求亦相應提升。以香港為基地的Halo Energy Limited，自2021年起為本港的電動車用家，提供適切的充電設施和方案，並特別在茘枝角開設Halo Hub電動車充電體驗中心，讓電動車持份者提供充電製作訓練、使用體驗分享和推廣，藉此提升巿場對電動車，以及相關充電設施的認識之外，並已開拓商用車，包括旅遊巴、的士及貨車的充電服務設施。

三款新增車型分別為：Carrera 4S、Carrera 4S Cabriolet及Targa 4S，包括Coupé、Cabriolet及Targa型號，合共已有六款911四輪驅動車型登場，同時今年亦係911 Targa面世60周年。偏重後輪駕駛動態 廠方表示，約一半嘅911 Carrera S銷量都係選配四輪驅動，再加上唔少設備升級，定位可謂僅次於配備T-Hybrid嘅911 GTS。而Carrera S車型亦採用偏重後輪駕駛動態，必要時保時捷牽引力控制管理系統 (PTM) 會將更多扭力傳遞至前軸，繼而提升抓地力與行車穩定性。與前代車型一樣，前差速器中嘅水冷離合器仍以電機機械方式操控，只有齒輪比略經調整。911 Targa就只提供四輪驅動版本。駕駛性能提升 機械方面，採用3.0公升雙渦輪增壓水平對向6汽缸引擎，最大馬力馬力480ps，比舊款多30ps。廠方宣稱搭載 Sport Chrono套件，911 Carrera 4S Coupé嘅0-100 km/h加速只需 3.3秒，極速就可達 308 km/h。不過，無手波選擇，只有8前速雙離合自動波。售價方面：911 Carrera 4S：HK$ 3,001,000 起911 Carrera 4S Cabriolet：HK$ 3,224,000 起911 Targa 4S：HK$ 3,264,000 起標準設備較前代大幅提升 包括最新設計嘅 20/21 吋Carrera S輪圈、保時捷扭力分導升級系統 (PTV+)、配備911經典排氣系統聲音。GTS車型嘅煞車系統現為標準配置，前輪配備紅色煞車卡鉗及408毫米制動碟，後輪煞車碟尺寸則為380毫米。911 Targa 4S亦標準配備後輪轉向。Cabriolet 及Targa車型均配有後座，而coupé則標準雙座位設計，想要後座嘅話，亦係免費配備。911 Targa面世60周年 911 Targa車型嘅典故，其實係保時捷回應當時美國市場上有關傳統開篷車安全性嘅設計。Targa車型於1965年9月法蘭克福車展首度亮相，被稱為safety cabriolet，配備可拆卸車頂及可折疊後窗，至於「Targa」名稱則源於西西里耐力賽 — Targa Florio。 發展到1993年，已無需再手動拆卸車頂；由2006起只有四輪驅動版本。2014年起，採用玻璃後窗向後折疊嘅全自動車頂機械操作，車頂收摺只需19 秒，硬頂跑車即可化身為開篷跑車。

在2025年英國 Goodwood Festival of Speed 首度亮相嘅MCPURA ，延續咗推出已有五年嘅MC20經典設計，仲有外觀上嘅微調，車頭稍微尖咗，新嘅前後泵把，車廂用咗更多Alcantara，全新嘅軚盤，又有新油漆顏色選擇。車頭採用咗同 GT2 賽車一樣嘅設計語言，前包圍兩邊嘅進氣口線條更硬朗，低重心及低風阻顯得更有動感，全車用上碳纖維複合材料製成嘅單體式車身。 車側用咗一體式車身顏色，銳利嘅車頭帶出強烈動感。深色調嘅新款輪圈，隱約閃耀藍光，既唔係金屬鏡面亦唔係啞光黑。與 MC20 一樣，MCPura 也提供硬頂跑車及Cielo開篷版本；至於可摺疊玻璃車頂十幾秒就可開關，透光度亦可即時調節。車尾後擴散器造型激進，中置排氣同後窗散熱口突顯強大動力，下部線條更犀利簡潔。新增車身顏色有魔力橙，連同神秘灰、隱秘灰、純粹黑、冰川皓白、無界曜藍、烈焰紅、絕塵黃、皇家綠同靈動黑，選擇多咗。 駕駛席換咗設計靈感源自GT2 Stradale嘅新款平頂軚盤，而且可選Alcantara材質，加強觸感；又或者選擇軚盤頂部及底部用碳纖維，手握位置用Alcantara。儀錶板同車門壁上部以Alcantara取代傳統皮革，展現可持續理念之餘，品質一樣唔妥協。MCPURA 採用中置後驅佈局，重量功率比 2.33kg/匹，0-100km/h 只需 2.9 秒。搭載自研 3.0T 「Nettuno 海神」V6 引擎，輸出 630 匹馬力，每公升輸出功率210 匹/升；關鍵部件如支撐結構及懸掛支架，都用上輕量化又堅固嘅航空材料。 香港代理透露，Maserati MCPURA到港車價預計會平過 MC20。

受惠於當局接受左、右軚新車登記出牌，澳門車市比香港熱鬧得多，供用家選擇的品牌和車款亦明顯較香港多。其中跟吉利集團關係密切、份屬Zeekr姊妹車廠的Lynk & Co，便以純電和左軚駕駛的Z20，成為進軍當地新能源汽車市場的新力軍。

鍾情燃油車的你，以下將會是喜訊一則，皆因平治將新版Mercedes-AMG CLE 53 4MATIC+ Coupe帶到香港。更具肌肉感的車身線條 跟標準版的CLE作比較，新版平治AMG CLE 53 4MATIC+ Coupe的造型明顯吸引得多。所指的除了令賣相變得更具肌肉感的車身線條外，還有19吋AMG十幅式輪圈，連前265/40 R19、後295/35 R19輪胎作標準配備。另為滿足車迷需要，廠方特別為新版CLE 53 4MATIC+ Coupe度身訂造多套包圍配件、碳纖車身飾件，以及多種顏色選擇的20吋AMG輪圈供選配。車廂充滿戰鬥味 以黑色皮革包裹的座椅，襯以紅色縫線和紅色安全帶，加上前座頭枕壓印有AMG廠徽，令車廂充滿戰鬥意味。車廂四周有Nappa皮革，以及高光碳纖飾件配襯，中控台有大大個高清觸控屏幕，AMG軚盤還設有兩個旋鈕，讓駕駛者可以隨時轉換駕駛模式，又或懸掛設定。0-100km/h加速4.2秒 動力結構以3.0公升直六Twin Turbo引擎，配48V輕混能系統作組合，馬力、扭力分別是449hp和560Nm。按鍵啟動Overboost功能，扭力會增至600Nm，並維持10秒。至於車上的輕混能系統，亦可以短暫提供額外23hp和205Nm扭力。搭配AMG SPEEDSHIFT TCT 9G九前速自動波箱，0-100km/h加速僅需4.2秒。有如此吸引的外觀和性能，而且是近年少有的高性能燃油車，新版平治AMG CLE 53 4MATIC+ Coupe你會感興趣嗎？售價：1,150,000港元起查詢：Mercedes-Benz Hong Kong電話：2504 6140網址：www.mercedes-benz.com.hk

由內地新能源車廠Seres Group及華為合作開發嘅AITO (問界) M9豪華SUV，在澳門正式推出市場。配備自動感應氣壓懸掛 廠方宣稱M9設計理念係重新定義大型豪華電動SUV標準，車身採用全鋁合金一體化壓鑄技術製造，配備自動感應氣壓懸掛，及一系列智能輔助駕駛系統，仲有係內地豪華車現時不可缺少嘅小型雪櫃，及具備按摩功能嘅零重力座椅。試車前亦有專人為我哋介紹M9多項智能化設備，包括非常花巧、配備HUAWEI xPIXEL嘅智能投影大燈，除咗係車頭燈，仲具備投影功能，可在路面上投射警示信息或者迎賓圖案，又可以用手機在車外啟動智能自動泊車，車廂又配備智能激光投影幕，將車廂變成音樂廳或影院。最玩嘢係為中排座椅嘅老闆而設嘅私隱設計，老闆開啟私隱模式，司機座椅頭枕內嘅喇叭，就發出特別嘅噪音，令司機聽唔到車廂中後排乘客嘅對話。我哋在澳門小試咗一段市區及山路，由於係電動車，加上車廂隔音亦出色，行車的確係寧靜舒適。最特別係全長超過5米嘅M9，轉向半徑非常短，在雙線行車路面，可以一手軚U-turn調頭。由於試車時間及路程都比較短，只算係初體驗嘅駕乘感受。問界澳門代理係捷成汽車，相信廠方推出右軚時，捷成香港亦可能成為代理。詳細嘅試車，要等問界在香港推出時再進行。 售價方面，澳門電動車係免稅的，旗艦型號M9 Ultra六座版，售價由澳元$ 680,584起，M9 Ultra五座版由澳元$ 659,954起；M9 Max 六座版由澳元$ 618,694起。

浙江國際賽車場的AMG體驗中心，係全球首個AMG體驗中心，位於中國紹興，2020年8月21日開幕，旁邊就係浙江國際賽車場全長3.2公里嘅FIA二級賽道，提供專門為賽道而設嘅體驗。專為車迷而設的體驗中心AMG體驗中心設施，包括透過VR裝置，配合四軸動態賽車模擬器，體驗賽道飛馳；又可以選擇試聽多款AMG車型嘅引擎聲浪，中心又設有Café 63咖啡店及AMG配件專門店，滿足車迷消費欲望。不過重點當然係可以體驗不同嘅AMG車型，而且可以在AMG駕駛學院車手指導下，試駕最新AMG車型，體驗賽道駕駛樂趣，而且仲有專屬賽道日供車迷參與。亞洲首個G-Class體驗中心 至於緊貼AMG體驗中心而建嘅G-Class體驗中心，係亞洲首個G-Class體驗中心，2023年4月開幕。中心入口展示一輛停泊在傾斜45度牆上嘅G-Class，顯示其45度爬坡能力及強勁越野性能。場內設有專業越野試駕場地，模擬不同嘅陡坡、側傾斜坡、碎石路及大石坑等極端地形，在專業教練指導下試駕G-Class車型，感受其在賽道與越野場地的性能讓訪客體驗G-Class的越野能力。揸G 63鬥直路加速 進入賽車場第一項體驗係揸G 63鬥直路加速，呢個雖然只係簡約版G 63 Drag Racing，不過平時好難有機會用到硬派越野車玩直路加速鬥快，同時亦可以體驗一下G 63嘅AMG 4.0 公升 V8 雙渦輪增壓引擎加速威力。講到加速，G 63嘅0-100km/h加速只係4.3秒，加埋V8引擎咆哮聲浪，係幾過癮的。AMG Experience 首先試駕嘅AMG Experience環節，就係駕駛AMG CLA 45 S 4MATIC玩slalom (繞椿)，要用最短時間完成繞椿，並且整架車完全停在藍白色方陣之內。一起步就係一連串S彎，然後向左J-turn，需要準確地控制着油門，以最高速度出彎，接着又係連續幾個左和右彎，最後一小段直路加速，然後急煞車進入藍白色方陣之內。 這個環節其實也是玩操控體驗，如何在高速繞椿時不會錯了線道而損失速度及時間，要訣是入彎時已要望向下一個繞椿，還有油門嘅控制，最後要掌握Late Braking力度及煞車點，才能準確停在藍白色方陣之內。賽道激試AMG跑車 我哋試咗五款嘅AMG跑車，包括性能最勁，最大馬力816hp，0-100km/h只需2.8秒嘅AMG GT 63 S E Performance；然後係最大馬力585hp，0-100km/h加速3.6秒，外形好靚嘅開篷跑車AMG SL 63 4Matic+；仲有最大馬力449hp，0-100km/h加速4.2秒嘅AMG CLE 53 4Matic+  Coupe；最大馬力367hp，0-100km/h加速5秒嘅AMG GT 50 (中國版)；同埋最大馬力421hp，0-100km/h加速3.9秒嘅AMG A 45 S 4 Matic+。最鍾意其中兩架 激劈完幾款AMG跑車，我最鍾意其中兩架，第一架就係AMG GT 63 S，點解鍾意GT 63呢？佢係一架大馬力跑車，車身相當大，但係前後車重平衡做得好好，因為將電池放在車尾，令到重腳煞車時，車頭唔會過度前俯，所以推頭情況大幅減少了，入彎就會更精準。在賽道嘅彎路上，發覺可以好激烈咁在賽道上駕駛，GT 63 S依然好穩定；至於AMG SL 63始終係一架開篷跑車，車架係會冇咁剛硬，你會感覺到架車在彎路上，扭曲程度會比GT 63明顯，所以冇咁好彎。 另外一架我鍾意嘅就係A 45 S，在賽道上表現好劈得，操控反應係介乎前驅同後驅之間，雖然整體上都係前驅感覺多些，但係又因為咁而比較易操控 ，你轉彎太急太快，它有機會推頭，但由於車身小巧靈活，就算有少少推頭，都好易補救，所以A 45 S同GT 63 S係今次AMG賽道經驗中，我最鍾意呢两款。G-Trail專門越野挑戰項目 下午係分別以汽油版G 500及電動版G 580 with EQ Technology，挑戰G-Trail，即係G-Class專屬叢林越野體驗基地，總長度雖然只係2.2公里，不過已合共有8個不同難度嘅越野項目，包括涉水、以交叉軸蠕行方式駛過極端起伏坑坡、駛上傾斜32度土坡、碎石路、顛簸起伏路況、爬上極斜坡、顛簸竹林泥石路，最後係電G專場嘅G-Turn。難度最高兩個項目 越野挑戰項目難度最高，係交叉軸，呢個時候就係前、中、後三個差速鎖發揮嘅時間，因為要蠕行駛過極端起伏坑坡，四個車輪都唔可以空轉，先可以在個別車輪凌空時，仲可以維持操控。 另一個對普通車係高難度項目，就係駛上超過45度嘅斜坡，分別係混凝土鋪裝嘅65度斜坡，同埋50度泥石土坡。不過以純電動G 580上斜坡完全係輕鬆容易，只要用咗Low Range駕駛模式，就好似用全自動傻瓜機影相，一切都自動化，無需踩油門，已可以自動慢駛爬上斜坡。  電動G 580做G-Turn無難度 進行G-Turn前，需要選用Low Range及Rock模式，按下G-Turn按鈕，螢幕上會出現確認提示，確認後踩住制動踏板，必須hold實軚盤不能扭軚，想向左轉的話，拉動軚盤上嘅左撥片就會轉左，向右就拉右撥片轉右，同時踩油門到底，就會開始自轉，鬆開油門就會停止。 G-Turn運作原理係透過四個摩打獨立控制每個車輪，使左右車輪能夠以相反的方向旋轉，利用反向旋轉產生軸心自轉效應，令G-Class能夠在其軸距範圍內轉圈。花絮篇 是次活動，仲有一位由廠方邀請嘅嘉賓Tyson Yoshi參與，仲在G-Turn環節率先試做G-Turn。Tyson本身都鍾意車，試完車會唔會上癮買番架G 580 with EQ Technology呢。  鍾意油G定電G？ 試完越野及G-Turn，我都係鍾意汽油版，因為駕駛時那種頓挫感，你會覺得整架車係浪漫一點；至於電G，駕乘係比較舒適，加上電子系統又很厲害，基本上去到一些很高難度45度以上斜坡，你只要按了Low Range模式，鬆開油門，就會自動走上斜坡，我會稱這個為傻瓜機模式，你都不需要識越野，總之有教練或者給你一句指示，，它就自動用一個很緩慢安全爬行的模式，很安全地上斜坡。 駕駛汽油版G-Class，你的右腳要控制得油門及制動好好，尤其係起伏好大嘅泥石路，只要大力一點油門都會挫一挫；衝一衝，所以控制上你需要多些技術， 我哋呢啲自認有少少技術嘅，梗係鍾意汽油G，但係對普通用家來講，電G就可以好輕鬆易控，最重要係唔需要花錢入油。值得車友參加的駕駛體驗活動 今次嘅試車，我個人覺得好值得有興趣知多些、學多些駕駛技巧嘅車友報名參加，在賽道及越野場地都有專業教練，教大家如何開得順啲， 開得好玩啲。 AMG在內地開了這兩個中心，交通相當方便。將來我想很多車主，或者廠方會搞一些活動，大家都可以來這裏玩玩。如果大家對AMG及G-Class活動有興趣，可以透過以下電郵：mbhk_marketing@mercedes-benz.com 索取資料。

平治在豪華車領域一直處於創新的領先地位，不過近年豪華MPV成為熱潮，顯得由商用Van發展而成的V-Class及Vito落後於對手。Vision V概念車，則表明平治要在豪華MPV市場也要搶佔創新的領先地位。Vision V Concept預覽了將採用非商用的，全新VAN.EA底盤高規格量產MPV設計，並配備傳統平治轎車及SUV的豪華配備。 全新VAN.EA底盤將採用800V電力架構，支援高達320kW的快速充電，可配單摩打或雙摩打，續航里程至少為498公里。即將量產的平治MPV，平治稱為Grand Limousine，將被命名為 VLE 和 VLS。 新車也可配備氣壓避震及後輪轉向等高端技術，還有不同尺寸及各種裝備的車型，從超豪華的四座CEO級別座駕，到入門級的七人家庭車，還有豪華VIP專車。