啱啱先在9月尾在網上發布嘅AMG C63 S E Performance，宣布推出 F1 Edition，包括房車及旅行車型號。

雖然唔係限量生產，不過F1 Edition只會在投產第一年製造；車內車外都加咗獨特嘅F1元素設計，包括獨特嘅灰色，又按照現行 GT 63 S F1 醫療車上嘅設計，全車連啞黑輪圈都綑上醒目嘅紅線；車門下方又加上AMG字樣裝飾。

除此之外，全車配備 AMG 擾流包圍，包括更大更惡嘅前分流器及下唇擾流、更霸氣嘅後擴散器； AMG Night Package I 及 II 已係標準配備，令到全車都係型爆嘅暗黑。至於車廂就以紅黑配搭，黑色nappa皮革AMG Performance 座椅，配紅色對比色縫線，頭枕加上 AMG 標誌，安全帶都係紅色。

性能其實同標準車相同，都係2公升4汽缸渦輪增壓引擎配電動摩打嘅混合動力，總輸出 680 hp 馬力及1020 Nm峰值扭力，引擎驅動前輪，摩打驅動後輪，0-100km/h加速只需 3.4 秒。

最窩心係每位客戶都會收到一個帶有 F1 標誌嘅 AMG 室內車罩，而且透氣嘅外層，係採用防撕裂合成纖維織物製成，內層係抗靜電嘅絨織物，既可以防塵，兼可防刮花車身。

相關內容：Mercedes-AMG C 63 S E Performance