售價HK$321,300，呢個就係2026款 Tesla Model 3 最平入門版嘅入場費。面對大堆頭平價中國電動車「圍攻」嘅今日，呢部曾經嘅「科技新貴」都用「新低價」迎戰，究竟佢憑住 534km 嘅續航力、滿瀉嘅科技配備同可靠嘅駕駛感，仲保唔保得住佢「電動車大佬」嘅地位？One-Pedal 似高手過招，懸掛就有啲「硬朗」 雖然佢唔似 Performance 版 0-100km/h 3.1秒咁，可以幫你重新整理面部肌肉，但 RWD 版嘅 6.2秒加速，其實已經夠你喺告士打道起步時，將隔離部燃油車放甩於後視鏡。 Tesla 玩神秘唔肯公布電池容量，網上搵EV資料係 64kWh ，廠只提供最大續航里程為 534km ，雖然是整個車系中最短的， 但勝在 Supercharger 網絡夠大，15分鐘就充到 270km，買杯咖啡嘅時間又可以行多轉屯門。 同競爭對手相比，仍然相當不錯。 油門（電門）反應精準到令人忍唔住讚，即使喺旺角塞車，你都可以靠一隻腳掌嘅微調，令架車行得順滑到令人以為係禮賓車司機。至於動能回收（Re-gen）大部分時間可以取代迫力踏板，慳電之餘仲幫你慳埋換迫力皮嘅錢。 山路上劈彎，車身沉穩靈活，雖然軚感一般，但轉向夠敏銳，即時以為自己係F1車手韋斯塔本。 不過，Tesla 工程師對「路感」嘅執著，懸掛調校偏硬，喺香港啲爛路上低速行駛，你會好清晰咁感受到路面嘅「起伏」。好在遇到大坑洞時佢都可以應付得到，未至於令你嘅脊椎受內傷。  隔音大幅進化：世界靜到剩返胎噪 中期改款最成功嘅地方，莫過於車廂精緻度嘅提升。全車玻璃、改良懸掛襯套同密封件真係無白費。廠方話風噪低咗 30%，實測下在公路行車，車廂靜到你開始會嫌棄輪胎傳入嚟嘅低沉摩擦聲。冇辦法，當你將所有雜音消滅晒，剩低嗰少少缺點，就會好似黑夜中嘅螢火蟲一樣咁鮮明。 極簡主義，定係「慳物料」？ 15.4吋中央觸控螢幕：控制晒全車靈魂。如果你未俾呢種極簡（甚至近乎修行）嘅內裝嚇親，你會發現系統其實算幾好用。但係！Tesla 似乎對「實體波棍」有某種創傷後遺症。新車完全取消咗實體波棍同按鈕，轉波要喺個大螢幕右上方「向上滑、向下滑」。如果你行車時個螢幕突然「罷工」藍畫面，你可能會好懷念以前嗰支雖然老土，但永遠喺度無言支持你嘅機械桿。 車廂整體質感雖然有進步，但對比起完美無瑕、充滿德式工藝嘅 BMW i4 或者 Mercedes-Benz CLA，Model 3 嘅內裝頂多只能算是一件「剪裁不錯的快時尚服飾」。後排空間對比 後排地板完全平坦，的確有利於五人同坐，不過座位偏低，中間嘅朋友，大腿支撐不足，坐姿幾乎似蹲凳仔。尾箱實用性容積有682L，不過房車式（Sedan）尾箱略窄，搬大行李要考技術。 總結 Model 3 入門版用超值車價、頂級科技與出眾續航力捍衛其中型房車王者寶座。雖然無實體波棍需要適應，且後座大腿支撐稍遜，但依然是市面上性價比最高的家庭電動車，尤其係sedan車型的首選。 2026 Tesla Model 3 RWD 規格表 車型：四門四五座位電動房車摩打類型：永磁同步摩打數目：1最大馬力：283hp峰值扭力：350Nm傳動：前置摩打, 前輪驅動 單速自動 0-100km/h：6.2秒電池類型： 鋰離子電池電池容量：64kWhDC直流快充：15分鐘(270km)續航距離(WLTP)：534km車輪：18吋合金車身長 x 闊 x 高：4,720 x 2,089(連側鏡) x 1440mm軸距：2,875mm車重：1,772kg售價：HK$321,300

以往，Long Wheelbase 只會出現喺 Luxury Sedan 身上，不過隨着消費者的欲望增加，長陣版早已殺入 Sedan 甚至 Compact SUV 界別。 於2022年面世的 iX1，採用跟同廠第三代 X1 相同的 FAAR 前驅底盤，而今次測試的長陣版 iX1，是由華晨寶馬位於瀋陽市鐵西區的廠房生產，除了內銷之外，亦外銷到其他東南亞國家。長陣版的車身比標準版長了116mm，軸距亦增加了110mm，闊度及高度不變，而拉長的車身，除了為後座乘客額外提供多81mm的腳部空間之外，亦同時增加了105L的行李艙容量。動力配置方面，長陣版跟標準版亦有分別。標準版 xDrive30 採用雙摩打四輪驅動，輸出313ps，長陣版 eDrive20 則採用單摩打前輪驅動，輸出204ps，性能明顯不及標準版。至於電池方面，容量大家都是 64.7kWh，但由於長陣版是單摩打的關係，耗電量較四驅的雙摩打低，所以續航距離比標準版多了20-81km。快速充電支援 DC 130kW，29分鐘可由10%充至80%，此外亦支援AC 11kW，充電時間為6.5小時。為了對應加長了的軸距，避震亦作出較柔韌的設定，以提升更舒適的乘坐質素。雖然有別於標準版的硬朗，但長軸距並沒影響彎路靈活表現，比較有明顯分別是加速力較為溫和，出彎前大腳把電門踩到底會出現輕微推頭，整體上是少了點運動氣息。Regenerative Braking 同樣分為 Adaptive、High、Medium 及 Low，如果沒有駕駛電動車的經驗，選擇 High mode 需要改變一下收油減速的習慣。另設B檔屬於 One-Pedal Driving，放開電門後會立即產生強烈的減速，要減低這種突兀的拉扯感，就需要有更高的電門控制技巧及路面判斷力。標準配備10.25吋數碼儀表及10.7吋中央觸控顯示屏、BMW Operating System 9 操作系統、QuickSelect 同時支援語音操作，還有耗電情況、續航距離及 G-force 監察資訊。除此之外，IconicSounds Electric 亦為這輛 Long Wheelbase 的電動 iX1 提供一點生氣，系統由BMW 工程師與奧斯卡金像獎最佳原創配樂大師 Hans Zimmer 大師攜手研發的模擬電門音效，聲音有別於傳統引擎排氣聲，而是充滿科幻味的電子聲浪。輔助安全系統方面，包括 Driving Assistant Plus 駕駛輔助、Parking Assistant Plus 泊車輔助連主動線道維持功能及360度環視鏡頭、Front Collision Warning 前撞警示及自動煞車、Lane Departure Warning 離線警示連扭軚輔助、Side Collision Warning 盲點警示連扭軚輔助等，可按需要逐一設定敏感度。 2026 BMW iX1 xDrive20L M Sport 規格表摩打形式：恆磁同步摩打電池容量：64.7kWh鋰離子電池最大馬力：204ps峰值扭力：250Nm續航距離：458-539km (WLTP)傳動形式：前輪驅動傳動系統：單速直接驅動0-100km/h：8.6秒極速：175km/h懸掛系統：(前)麥花臣支柱/ (後)三連桿制動系統：(前/後)通風碟輪圈：19吋合金輪胎：(前/後) 245/45 R19 GoodYear Electric Drive長x闊x高：4,616 x 1,845 x 1,616mm軸距：2,802mm車重：2,024kg電耗：15.4-17.2 kWh/ 100km售價：HK$469,900

 Cayenne係保時捷最賺錢、賣得最好的車款之一，保時捷靠 Cayenne 賺到盆滿缽滿已經唔係秘密。來到第四代，終於為呢隻金蛋推出 Cayenne Electric 純電車型。其中最頂級嘅 Turbo Electric 版本，號稱係保時捷史上最強嘅 Turbo 量產車，數據直情係超跑級數，彈射起步爆出 1,156匹最大馬力，2.6 噸重嘅巨獸 0-100 km/h 只要 2.5 秒。聽落係咪好血脈沸騰？不過，買得波子嘅客，從來都唔止要直線快，而係「人車合一」的操控感。呢部入電嘅 Cayenne，到底係換湯不換藥的電子玩具，定係真真正正嘅的保時捷？動力：數字遊戲定係真材實料？ 聽落係咪好血脈沸騰？不過，買得波子嘅客，從來都唔止要直線快，而係「人車合一」的操控感。呢部入電嘅 Cayenne，到底係換湯不換藥的電子玩具，定係真真正正嘅的保時捷？ 講真，今時今日電動車要做超跑級加速，根本毫無技術難度，大把國產電動車幾十萬就有幾百匹。Cayenne Turbo Electric 賣到呢個價位，如果只得「一鼓作氣」嘅直線狂飆，就真係要打手板。好在，波子無令一眾死忠失望。呢部車最聰明嘅地方，係佢將馬力封印得好有層次。你平時在市區開 Normal 模式，佢會將馬力收斂在 857 匹。雖然聽落依然好多，但起步果吓唔會好似其他電車咁，一踩就成個人撞落椅背。佢個油門踏板調校得極之有心思，完全無嗰種「非開即關」嘅電子開關感，而係需要你隻腳施少少力，隨住深度增加而循序漸進咁釋放動力。呢種傳統油車嘅「漸進實在感」，先至係考功力嘅地方。想搏命咩？擰去 Sport Plus 模式，1,019 匹馬力即時解封，嗰種將你成個人吸入時空隧道嘅推背感，確實無愧「 Turbo」之名。操控：2.6 噸重嘅「靈活重量級」？ 電動車最大嘅致命傷通常係車重。呢部 Cayenne 重量接近 2.7 噸，照道理入彎應該好似推鉛球咁。但波子在底盤調校上確實係武林高手。新車標準已配置了雙氣倉氣壓懸掛同雙活瓣自動感應吸震器。在香港「補完又補」、凹凸不平嘅爛路上試車，路面起伏你依然感覺到，但嗰種令人煩躁嘅碎震同顛簸感，居然被過濾得乾乾淨淨。 更加令人驚喜嘅係佢在山路嘅表現，雙摩打嘅動力分佈明顯偏向後驅，配合後輪轉向系統，在大帽山或者石澳呢類窄彎，部車靈活到完全唔似一架大件頭 SUV。當你高速出彎，你可以好清晰咁感受到後輪牢牢咬緊地面，底盤對車身外傾嘅封印直情可以用「精妙」來形容。高速行車時穩如泰山，風噪同路噪都隔絕得極好，長途駕駛嘅舒適性，居然無因為運動化調校而妥協，呢點非常難得。內籠與實用性：科技感滿瀉，但... 入到車廂，全新的曲面觸控螢幕，分別是橫向曲的儀表板，及非常獨特的直向曲中控台螢幕，視覺效果確實震撼，資訊娛樂系統介面亦係業界頂級水平。不過，功能實在太繁複，如果你唔係科技達人，交車頭幾日相信要交唔少「學習成本」先搵到所需功能。好在波子保留了控制冷氣的實體固定按鈕，開車時要調節冷氣都方便得多。至於可調節透光度嘅全景天窗係一個亮點，香港夏天咁曬，呢個功能非常實用。  空間方面，後座空間絕對夠大，長途坐兩位成年人都好鬆動。不過要挑剔嘅係，後座雖然坐得好舒服，但直接犧牲了中間位的舒適。呢部車本質上只係一部「四人豪華SUV」，夾硬塞五個人嘅話，中間果位絕對會詐型。充電：快到可以忽略續航焦慮   既然係電動車，就要講充電鬥快。800V 電力架構，直流快充功率最高可以去到 400 kW。只要充電樁配合到，10% 充到 80% 只需 16 分鐘，10 分鐘就補給到 315 公里續航力， 飲杯咖啡就充完。基本上只要你屋企或公司附近有超充，續航焦慮在佢身上係唔成立的。   整體評價 Cayenne Turbo Electric 完美展現保時捷頂級底盤調校功力，成功將2.6噸巨獸化為山路利器。漸進式油門 (電門) 保留波子油車味道精髓， 動力兇猛，底盤調校仍有保時捷風味，市區及山路都輕鬆易控；充電極快，不過後排中間乘客位不舒服，仲有係大部份功能要在螢幕操作難免減分。  2026 Porsche Cayenne Turbo Electric 規格表摩打形式：永磁式同步摩打電力架構：800V電池容量：113kWh鋰離子電池最大馬力：857ps ( with launch control：1,156ps)峰值扭力： 1,500Nm  (with launch control)DC直流400kW快充：16分鐘 (10-80%) 續航距離：623km (WLTP Combined)耗電量： 22.3 – 20.4 kWh / 100 公里0-100km/h：2.5秒0-200km/h：7.4秒極速：260km/h傳動形式：前後摩打/四輪驅動傳動系統：前單速/ 後單速 電動摩打懸掛系統：(前) 五連桿 / (後)多五連桿 附設自動感應氣壓吸震及升降系統輪圈：22吋合金輪胎：(前) 245/40 R21 / (後) 285/35 R21 長x闊x高：4,985 x 1,980 x 1,674mm軸距：3,023mm車重：2,525kg售價：$2,568,000 起

已經第三次進行變臉的 IS300h，雖然心臟不變，但外觀及內裝的改動，還是有煥然一新的感覺。 第一代IS系列，始於1998年，主攻歐美巿場，IS300 採用代號 2JZ-GE 的3公升直六引擎，輸出220匹。2005年推出的第二代 IS 加入了更多先進及豪華設備，包括 SmartAccess 免匙系統、藍芽、導航、泊車鏡頭及 Mark Levinson 音響組合等，IS300 採用代號 3GR-FE 的3公升自然吸氣V6引擎，輸出228匹。從第三代開始，IS 系列開始配上油電混合引擎，2013年推出的 IS300h，採用一副編號2AR-FSE 的油電混合的2.5公升直四引擎，引擎與摩打混合總輸出為220hp，雖然跟第一代輸出無異，但卻大幅降低耗油量。至於今次測試的 IS300h F Sport，是建基於代號 XE30 的第三代 IS 車系，F Sport 就如Mercedes-Benz的AMG、BMW的M Power、Audi的RS及Alfa Romeo 的Quadrifoglio，代表着 Lexus 的高性能系列，當中同樣涉獵強化機械配件及流體動力學裝備等，而「F」則取自孕育這個高性能系列的日本靜岡縣的富士國際賽車場 Fuji International Speedway，從2007年展出的高性能代表作 IS F 及隨後於SEMA車展推出的 F Sport 套件開始，便正式揭開 Lexus 挑戰歐洲高性能車種的序幕。 車頭泵把是全新設計，個樣惡咗，凸出的底邊擾流令車身總長增加了10mm。車尾換了一條緊貼車身的全黑鴨尾翼，19吋 BBS 襯埋紅色卡鉗，是經典的歐日跑房味。今次 Facelift 的重點來自車廂，中控台、儀表板、軚盤、冷氣出風口、門把手等，都是全新設計。前座椅、軚盤6點位置、油門與制動踏板、門檻等，都可見 F Sport 徽章。     Drive mode 有 Eco、Comfort、Sport S、Sport S+ 及 Custom，對 IS300 F Sport  來講，會把她變成一輛普通房車的 ECO 及 Comfort 是一項封印模式。只要切換到 Sport S 或 Sport S+，就即時變回一輛跑房車，前者會提升引擎效率及波箱反應，後者則同時加重軚感及懸掛硬度，駕駛人亦可透過 Custom mode 去自訂特性。200hp的輸出唔算強，頭段加速亦無強烈推背感，但有非常穩定的爬升力量及速度。我沒試過第二次 facelift 的 IS300h，所以比較唔到今次換上全新 AHB-G 電子控壓煞車系統的分別，不過這套 AHB-G 就好有預見性，而且可以做到好細微的減速與制動動作，腳感非常清晰，無論快車或慢車，都能精準配合當時駕駛的需要，制動力度恰到好處，這些追求極致的精神，真的不能不佩服凌志的工程師們。被更新的還有 Adaptive Variable Suspension 可變避震系統及 Variable Gear-Ratio Steering 可變齒比電子轉向。今代的 AVS 以 Linear Solenoid Actuator 線性電磁閥取代舊款的摩打驅動旋轉閥，反應速度快了4倍，能更有效率地處理路面碎震，維持車身平穩及行車舒適；而 VGRS 則能夠依據車速與實際行駛情況，自動調整軚盤的轉向比例，達到低速靈敏，高速穩定的效果，配合 AVS 懸掛特性，為駕駛人提供更線性及準確的過彎體驗。Lexus IS300h F Sport規格表引擎形式：L4 DOHC 16V汽缸容積：2,493c.c.最大馬力：176hp@6,000rpm峰值扭力：221Nm@4,200-4,800rpm電動摩打：恆式同步摩打最大馬力：140hp峰值扭力：300Nm混合動力總馬力輸出：220hp傳動形式：前置引擎‧後輪驅動傳動系統：E-CVT 電子無段變速配軚盤+/-轉檔懸掛系統：(前)雙搖臂/ (後)多連桿制動系統：(前/後)通風碟輪圈：19吋合金輪胎：(前) 235/ 40 R19 (後)265/35 R19長x闊x高：4,720 x 1,840 x 1,435mm軸距：2,800mm車重：1,680kg0-100km/h：8.4秒極速：200km/h耗油量：6.9L/100km售價：HK$549,815  

比亞迪又有新搞作，今次準備在香港推出的，是中大型 MPV 定位的 BYD M9 DM-i（即是內地叫「比亞迪夏」的右軚海外版）。車身長 5,145mm、闊 1,970mm、高 1,805mm，走高級 MPV 路線。尺碼看似剛剛好，但入香港地獄停車場要小心？ 雖然車廠包裝到M9這個尺碼「大得來又唔係太大」，但實際上近 2 米的車闊（1,970mm），在香港那些幾十年前興建的「地獄停車場」或者窄路單線泊車，其實頗為考技術。稍為不留神，兩邊倒後鏡隨時與旁邊的柱位「接吻」。 比亞迪夏內地售價人民幣大約 22.98 萬至 24.98 萬，來到香港折算港幣再加上首次登記稅，預計大約港幣 40 多萬至 50 萬元有找。單看車價確實比日系保姆車平一大截，但「一分錢一分貨」的定律是否適用？這個定價競爭力又是否會做成市場震盪？中排兩張「零重力」大班椅：舒服，但第三排會被犧牲？ 買得這類車，最緊要睇中排。 冇錯，M9 的最大賣點，是中排那兩張看起來極之豪華的大班椅，有滾輪按摩、又有一按自動伸展成「零重力」半躺姿態全部齊備。不過，當你真的在香港日常用車，就會發現問題：當一按掣進入「零重力」模式，中排大班椅向後移各前伸，基本上會直接壓縮甚至犧牲了第三排的腿部空間。如果真的是「大家庭用車」坐足 7 個人，中排根本不可以隨便開啟這個全躺模式，否則本來第三排都有電動調校椅背傾斜度，坐得好舒服的乘客，一定會「頂腳」到叫救命。要考慮埋充電是否方便 動力心臟方面，M9 搭載了比亞迪最新第五代 DM-i 插電式混合動力系統（PHEV）。由一副 1.5 公升渦輪增壓汽油引擎（最大馬力 150ps、扭力 225Nm）加上前置電動摩打（最大馬力 272ps、扭力 315Nm）組合而成。0-100km/h 加速只需 8.5 秒，推動這部大車絕對是綽綽有餘。 作為一部 PHEV，你可以自由切換 EV 純電或 HEV 混合動力模式。駕駛模式備有經濟、舒適、運動及雪地四種，動能回收也有標準和較強兩級，隨你駕駛心水調校。 大電版採用 36.6kWh 的刀片電池，純電續航里程 CLTC 標榜有 218 公里，但在香港日常開冷氣、塞車、上斜的真實環境下，打個 7 折可能只有百多公里。它雖然支援 73 kW 直流快充，30% 充到 80% 只要 25 分鐘。不過在香港，PHEV 能否輕易用到純電充電站仍是未知之數；如果純粹當汽油車開，要有心理準備油耗表現未必如預期般咁低。主動電子懸掛過彎穩健靈活 操控方面，M9 搭載了雲輦主動式電子懸掛，跑連續 S 彎，確實比傳統一轉S彎就搖頭擺尾的小巴好得多，吸震功夫又的確幾好。但車身重心始終高，當你自私自利激進少許過彎，車身的物理慣性依然存在，後座乘客一樣會覺得「搖到頭暈」。仲有，雖然配備了電子睹後鏡來解決後方盲區，但這類電子螢幕在夜間或大雨時的炫光和畫質噪點，對於習慣看傳統後鏡的香港駕駛人來講，仍然需要時間去適應，未必每個人都接受得到。總結： 「性價比」背後的魔鬼細節  M9 整體走的是「性價比豪華」路線，表面配備給得很足（按摩椅、大螢幕、電子懸掛），但細節上的造工、隔音和質感，與真正的百萬級豪華 MPV 還是有距離。它適合那些想要大空間、預算有限、不太介意品牌面子和細緻度的小型公司客或家庭。如果香港正式售價敢定在 40 萬以下，肯定可以做成市場震盪；如果高過 50 萬，面對Denza D9 或者日系對手，挾重點裝備而來的M9，就難免要面對激烈的市場競爭了。 2026 BYD M9 規格表 車型：五門七座位插電式混合動力MPV引擎：1.5公升直4渦輪增壓,油電混合動力馬力：110kW (約147hp)扭力：220Nm電池類型:BYD Blade鋰離子電池電池容量：20.39kWh摩打：恆磁同步摩打功率：200kW(馬力)約268hp / (扭力)315Nm傳動：前置引擎，單摩打混合動力，前輪驅動純電續航 （ WLTP ）： 80km (Advanced) / 145km (Premium)綜合續航距離（WLTP） : 1,163kmDC直流充電功率：41kW / 73kW0-100km/h：8.4秒(Premium)；8.5秒(Advanced)懸掛系統：(前)麥花臣/ (後)多連桿，智能感應吸震系統制動系統：(前/後)通風碟長x闊x高：5,145 x 1,970 x 1,805mm軸距：3,045mm車重：2,450 (Advanced)；2,650kg (Premium)油耗 (WLTP) ： 7.1L/ 100km(Advanced)，7.3L/ 100km (Premium)廢排：148-133 g/km售價：Premium：HKD596,900(意向價)；Advanced：HKD458,800 (意向價)   

以前想買架平平地、好玩又「劈得」嘅細車，大家都會諗起Ford Fiesta或者Mazda 2。可惜時代變咗，呢類親民細車已經買少見少，甚至在香港市場已消失。依家想搵架有啲個性嘅揭背車仔，望吓望吓，好似得返身價唔平嘅Mini選擇。通脹咁勁，預算有限嘅車迷唔通注定無得揀？ 比亞迪（BYD）即將推出嘅 ATTO 1，或者就係打破呢個悶局嘅答案。雖然香港最終規格同定價仲未公佈，我們估計市場起步價大約在15至16萬港元關口(最後廠方公布意向價：HK$169,360)。 平實外表下的驚喜坦白講，第一眼睇 ATTO 1，外觀普普通通，車廂陳設亦帶點廉價感。開上快速公路，輕微嘅風噪同路噪會傳入車廂，聽覺上確實有啲美中不足。不過，當你靜下心來感受，會發現佢嘅懸掛系統有驚喜。雖然車身小巧，但吸震能力出奇地好。除了少許噪音，路面嘅劇烈震動基本上都被隔絕喺車廂之外。這種穩定感，喺細車仔身上非常難得。大帽山上的熱血靈魂為咗試真佢嘅底蘊，我哋特登帶 ATTO 1 踩上大帽山。多彎嘅山路，最能夠考驗細車嘅基因。基於四輪被推至車身四角嘅設計，ATTO 1 喺蜿蜒曲折嘅急彎中，操控起來既輕鬆又極具趣味。當你稍為激進少少入彎，車輛會出現細車常見嘅轉向不足（推頭），但呢種極限邊緣嘅反饋，恰恰就是細揭背車最迷人、最純粹嘅駕駛樂趣！車仔細細空間充足ATTO 1 採用 e-Platform 3.0 底盤，車仔細細， 前排座位在預期之內，空間充足，可以好輕鬆搵到最舒服嘅坐姿。 至於後排就塞入三個位，坐兩名成年人尚算舒服，而且後排對6呎高人士居然完全唔覺逼，頭部同肩部空間極佳，坐三人就會擠迫了。至於尾箱容量為230公升，後排座椅放低後更能擴展至 598 公升，也算實用。 設備方面， ATTO 1 支援無線 Apple CarPlay 與 Android Auto，又支援 NFC 手機/卡片鑰匙、Keyless 進入及 V2L外放電功能，仲有360泊車鏡頭。 便宜又好的東西，很少能兩者兼得。比亞迪 ATTO 1 電動小車，證明兩者可以同時兼得之外， 預算有限嘅車迷也有得揀 (雖然廠方公布意向價比我們預期最高的16萬貴咗差不多一，但市場終於都有更多小型揭背車選擇) 。 2026 BYD ATTO 1 規格表 車型: 五門四座位電動揭背電動車摩打類型: 永磁同步摩打數目: 1最大馬力: 55kW (約74hp)峰值扭力: 135Nm傳動: 前置摩打, 前輪驅動波箱: 單速自動0-50km/h:4.9秒電池類型: BYD Blade鋰離子電池電池容量: 38.88kWhDC直流快充：45.22分鐘 (10-80%)續航距離(NEDC) :380km懸掛：(前)支柱式 (後)扭力桿制動：(前)通風碟 (後)碟車輪：16吋鋁合金輪胎：185/55/R16車身長 x 闊 x 高: 3,780 x 1,715 x 1540mm軸距: 2,500mm車重: 1,280kg售價: HK$169,360 ( 意向價 )

係嘅，零跑的B05及B10確實有好多相似的地方，不過B10係SUV，B05係Hatchback，兩者的性格就好唔同。繼 T03、C10 及 B10 之後，B05 是零跑第四款抵港的純電車；五門斬尾加後驅的設定，令我想起 BMW 的初代 1 Series，揭背 FR 布局，前後重量比例仲要係50：50，巿場可謂絕無僅有。不過隨着電動車的出現，其超簡單的傳動方式，造就了 MG4 EV、VW ID.3 這類後驅 Hatchback 的開發，選擇亦愈來愈多。標榜 Fun to Drive 的 B05，除了尾轆與Hatchback 的好玩元素之外，因着零跑跟 Stellantis 集團的關係之便，還請來三叉戟一班工程團隊為 Leap 3.5 底盤進行調校，不過 Maserati 本身並沒 Hatchback 型號。採用 CTC 2.0 電池底盤一體化技術的 B05，鋰離子電池容量 67.1kWh，WLTP 續航力 482km，後置單摩打輸出 214hp，扭力240Nm，0-100km/h加速7.5秒，雖然性能唔算好強，但前後重量比例可以做到 50:50。加速及轉向同樣有  Comfort、Standard、Sport 3個選項；Regenerative 分為 Weak、Medium 及 Strong，不過要在中控平板選擇，如果行車途中想加強效果，就沒軚盤撥片咁方便。Brake Pedal Feel 都有 Comfort 及 Sport 兩級調校，效果一般。東廊高速駕駛表現平穩，路噪風噪都在合理水平；轉向準繩，Sport mode 的軚感比較實在；跑山靈活，但並非 Hatchback 那種頭尾呼應，步法較似 Fastback，彎路有種揸四驅的感覺。避震對應迂迴山路高速飛馳，消化力唔夠徹底，但平穩度尚好，亦有足夠抗側力。駕駛樂趣是有的，但 仲未達到 歐洲 Hatchback 那種明快爽朗。車廂設備跟 B10 非常接近，以一部 Hatchback 來講，空間感算闊落。座椅同樣由環保皮革包裹，配備多功能皮軚盤、8.8吋LCD儀表及14.6吋觸控中央屏幕、支援 Apple CarPlay、12揚聲器音響、手機無線充電及360泊車鏡頭等。充電方面，支援 174kW 直流快充，17分鐘可由30%充至80%電量。 2026 Leapmotor B05 規格表摩打形式：恆磁同步摩打電池容量：67.1kWh磷酸鐵鋰電池最大馬力：214hp峰值扭力：240Nm續航距離：482km (WLTP)傳動形式：單摩打後輪驅動傳動系統：單速直接驅動0-100km/h：7.5秒極速：170km/h懸掛系統：(前)麥花臣/ (後)多連桿制動系統：(前/後)通風碟輪圈：19吋合金輪胎：(前) 225/ 45 R19 (後) 235/ 45/ R19 Hankook ION evo長x闊x高：4,430 x 1,880 x 1,520mm軸距：2,735mm車重：1,837kg電耗：15.9 kWh/ 100km售價：HK$249,900

對香港人來說， 尤其是追求靈活功能的家庭買家， GLB是一款極有吸引力的七人家庭SUV，而且緊湊的車身尺碼，仍然可以很鬆動的泊在較狹窄的停車位。雖然第三排座椅只適宜小孩乘坐，但售價在平治車系中也相對「經濟」，而且設備也相當豐富。外形也相當醒目，既有靈活的彎路操控性能，又有寧靜舒適的公路巡航表現，內飾亦精美， 新的 MBUX Superscreen 科技感十足， 而且新增設人面辨識功能，也足以成為住家男人的大玩具。方正線條增加車廂空間 新款GLB的外觀與舊款車型非常相似，因為它沿用比較方正的車身輪廓，而這種設計卻有助 車內空間最大化。新車長度增加了近100mm，軸距也加長了60mm，為GLB帶來更寬敞的空間，尤其是第二排乘客，就算身高六呎的成年人，也能在中排舒適地伸展雙腿。 進入車廂第一眼就是一整幅由右至左十分醒目的Superscreen，但同時也要用觸控方式在螢幕操作冷氣等功能，幸好仍保留駕駛模式以傳統按鈕操作。 至於全景玻璃天幕更增添了空間的開揚感，但就不設遮陽簾，純粹靠玻璃的防UV功能。試車時陽光猛烈， 但只要開了冷氣， 隔熱效果也相當明顯，不會影響駕乘舒適。不過追求美白的女士，就可能不習慣了。 靈活的座椅及空間運用 第二排座椅的設計也更靈活，可以折疊和滑動， 移動也非常便捷，進入第三排座椅也毫不費力。不過，第三排的空間仍然不足以讓大多數成年人舒適地乘坐，腿部空間是最大的限制因素，比較適合兒童乘坐。 在七張座椅全滿的情況下，新款 GLB 的行李廂容積就只有 145 公升，只能容納幾個購物袋或隨身背囊。需要更大行李空間的話，可摺平第三排座椅，就能騰出 480 公升的行李廂空間，而且第二排座椅還可以向前滑動最多 140 mm，從而額外提供 140 公升的行李廂空間；如果將中排座椅都摺平，則可獲得 1605 公升的超大空間。 操控靈活加速爽快 新款 GLB 也採用 CLA 相同的全新 MMA 底盤，GLB 220 配的是1.5公升渦輪增壓引擎及 48V Intelligent Hybrid系統，行車完全由電動摩打連接波箱起動，整個  Intelligent  Hybrid 系統特點，是電動摩打連同逆變器已整合於全新的eDCT八前速雙離合波箱，令體積更緊湊之外，因為電動摩打直接在波箱內聯動兩副離合器， 在均速或無需加速的情況下會關上引擎，系統為了慳油及節能， 會滑行或以摩打驅動，行車同樣都順滑到令駕駛人感覺不到動力的切換。 雖然1.5公升渦輪增壓引擎只有190ps馬力，不過在非常智能化的  Intelligent  Hybrid 系統配合下，無論是起步還是要超車，加速反應十分靈敏，操控也輕鬆容易。在山路上快跑，也靈活穩定。 售價方面，基本的GLB 220由港幣$569,000起，而AMG Line就由$599,000起。 售價在平治車系中也相對「經濟」，而且設備也相當豐富。 如果不是經常都要乘七名成年乘客，擁有七座位的GLB，是物有所值而且用途靈活的家庭七人SUV選擇。  2026 Mercedes-Benz GLB 220 AMG Line規格表 引擎：渦輪增壓直列式四汽缸 48V Mild Hybrid容積：1,499 cc馬力：190HP@5,500rpm扭力：300Nm@2,000-3,500rpm電池：1.3kWh鋰離子摩打輸出：(馬力)22kW / (扭力)160Nm綜合輸出：(馬力)211ps / (扭力)380Nm傳動：前置引擎，單摩打前輪驅動波箱：eDCT 8前速雙離合自動0-100km/h：7.9秒極速：217km/h懸掛：(前)麥花臣支柱 / (後)多連桿制動：(前)碟 / (後) 通風碟輪圈：19吋輕合金輪胎：(前 / 後) 235/50 R19長x闊x高：4,732 x 2,209(連鏡) x 1,681mm軸距：2,889mm車重：1,840kg油耗：6.5-5.8L/ 100km廢排：148-133g/km售價：HK$599,000起

香港豪華六/七座MPV市場一直是豐田Alphard及Villfire天下，造工也十分精緻的日產Elgrand也未能成為主流，不過自從電動車有一換一稅項寬減，內地新崛起的Denza D9純電MPV立即成功搶佔市場，然後又有Zeekr 009及Xpeng X9加入戰場，令到售價在50萬至90萬港元之間的電動MPV市場競爭日益激烈。至於小改款的Xpeng X9，由於標準已配備主動式後輪轉向系統，開起來感覺比實際尺寸小得多，轉向靈活，如果將懸掛調到最硬最低矮，在山路上暴走，甚至有少許Driver's Car味道。小改款後的小鵬X9，外觀改動主要變化集中於全新前泵把，以及重新設計的20吋合金輪圈，並採用類似勞斯萊斯的懸浮式Logo蓋，配上Michelin 235/50 R20 e-Primacy輪胎。整體外觀改動不大，但這套輪胎配合主動後輪轉向系統，令行山路時更加靈活，穩健感亦明顯提升。 事實上，氣壓懸掛對車身動態的控制更見平順穩定。除了有效吸收路面顛簸，亦能將彎路引起的車身外傾抑制得更加穩固、沉穩，整體行車舒適度明顯改善。動力及充電方面，新車配備800V電力架構與5C超充技術，充電效率大幅提升。快充約12分鐘即可將電量由10%充至80%，WLTP續航力535km。以香港日常路面環境來說，充一次電基本上足夠一星期使用，相當實用。 廠方標榜X9是現時唯一採用三排電動三摺疊座椅設計的車型，座椅佈局可靈活安排為4、5、6或7座。前排配備雙側靜音電索門，前座及中排共四張座椅均設有冷暖氣通風，冬暖夏涼；中排兩張captain seat更配備零重力（Zero Gravity）座椅。車頂設有摺合式21.7吋螢幕，配合27個揚聲器帶來媲美劇院級的聽覺體驗，車內亦配備同級車必備的冷熱一體式電動開關小冰箱。尤其值得一讚的是，只需按下中排座椅上的掣鈕，座椅便會自動移前、椅背同時前傾，出入第三排非常方便。 車廂亦配備主動降噪技術（Road Noise Cancellation），系統會即時監測行駛時產生的路噪，並透過車內音響發放反向聲波進行抵銷，有效降低低頻路噪，進一步提升行車寧靜度。 總結：小改款X9外觀改動輕微，但輪胎、主動後輪轉向與氣壓懸掛的配合，令操控與舒適度同步提升；800V+5C快充與535km續航對香港使用足夠實用，而三排電動摺疊座椅、零重力座椅、劇院級音響與主動降噪等配置，則繼續強化其豪華MPV的定位。  2026 Xpeng X9 Standard Range 規格表摩打形式：恆磁同步摩打電池容量：94.8kWh磷酸鐵鋰電池最大馬力：320p峰值扭力：450Nm續航距離：535km (WLTP)傳動形式：單摩打前輪驅動傳動系統：單速直接驅動DC快充：12分鐘 (10-80%)0-100km/h：8.2秒極速：200km/h懸掛系統：(前)雙搖臂/ (後)H臂多連桿 氣壓懸掛制動系統：(前/後)通風碟輪圈：20吋合金輪胎：(前/後)  235/50 R20 Michelin e-Primacy 長x闊x高：5,316 x 1,988 x 1,785mm軸距：3,160mm車重：2,555kg售價： HK$799,900