售價HK$321,300，呢個就係2026款 Tesla Model 3 最平入門版嘅入場費。面對大堆頭平價中國電動車「圍攻」嘅今日，呢部曾經嘅「科技新貴」都用「新低價」迎戰，究竟佢憑住 534km 嘅續航力、滿瀉嘅科技配備同可靠嘅駕駛感，仲保唔保得住佢「電動車大佬」嘅地位？One-Pedal 似高手過招，懸掛就有啲「硬朗」 雖然佢唔似 Performance 版 0-100km/h 3.1秒咁，可以幫你重新整理面部肌肉，但 RWD 版嘅 6.2秒加速，其實已經夠你喺告士打道起步時，將隔離部燃油車放甩於後視鏡。 Tesla 玩神秘唔肯公布電池容量，網上搵EV資料係 64kWh ，廠只提供最大續航里程為 534km ，雖然是整個車系中最短的， 但勝在 Supercharger 網絡夠大，15分鐘就充到 270km，買杯咖啡嘅時間又可以行多轉屯門。 同競爭對手相比，仍然相當不錯。 油門（電門）反應精準到令人忍唔住讚，即使喺旺角塞車，你都可以靠一隻腳掌嘅微調，令架車行得順滑到令人以為係禮賓車司機。至於動能回收（Re-gen）大部分時間可以取代迫力踏板，慳電之餘仲幫你慳埋換迫力皮嘅錢。 山路上劈彎，車身沉穩靈活，雖然軚感一般，但轉向夠敏銳，即時以為自己係F1車手韋斯塔本。 不過，Tesla 工程師對「路感」嘅執著，懸掛調校偏硬，喺香港啲爛路上低速行駛，你會好清晰咁感受到路面嘅「起伏」。好在遇到大坑洞時佢都可以應付得到，未至於令你嘅脊椎受內傷。  隔音大幅進化：世界靜到剩返胎噪 中期改款最成功嘅地方，莫過於車廂精緻度嘅提升。全車玻璃、改良懸掛襯套同密封件真係無白費。廠方話風噪低咗 30%，實測下在公路行車，車廂靜到你開始會嫌棄輪胎傳入嚟嘅低沉摩擦聲。冇辦法，當你將所有雜音消滅晒，剩低嗰少少缺點，就會好似黑夜中嘅螢火蟲一樣咁鮮明。 極簡主義，定係「慳物料」？ 15.4吋中央觸控螢幕：控制晒全車靈魂。如果你未俾呢種極簡（甚至近乎修行）嘅內裝嚇親，你會發現系統其實算幾好用。但係！Tesla 似乎對「實體波棍」有某種創傷後遺症。新車完全取消咗實體波棍同按鈕，轉波要喺個大螢幕右上方「向上滑、向下滑」。如果你行車時個螢幕突然「罷工」藍畫面，你可能會好懷念以前嗰支雖然老土，但永遠喺度無言支持你嘅機械桿。 車廂整體質感雖然有進步，但對比起完美無瑕、充滿德式工藝嘅 BMW i4 或者 Mercedes-Benz CLA，Model 3 嘅內裝頂多只能算是一件「剪裁不錯的快時尚服飾」。後排空間對比 後排地板完全平坦，的確有利於五人同坐，不過座位偏低，中間嘅朋友，大腿支撐不足，坐姿幾乎似蹲凳仔。尾箱實用性容積有682L，不過房車式（Sedan）尾箱略窄，搬大行李要考技術。 總結 Model 3 入門版用超值車價、頂級科技與出眾續航力捍衛其中型房車王者寶座。雖然無實體波棍需要適應，且後座大腿支撐稍遜，但依然是市面上性價比最高的家庭電動車，尤其係sedan車型的首選。 2026 Tesla Model 3 RWD 規格表 車型：四門四五座位電動房車摩打類型：永磁同步摩打數目：1最大馬力：283hp峰值扭力：350Nm傳動：前置摩打, 前輪驅動 單速自動 0-100km/h：6.2秒電池類型： 鋰離子電池電池容量：64kWhDC直流快充：15分鐘(270km)續航距離(WLTP)：534km車輪：18吋合金車身長 x 闊 x 高：4,720 x 2,089(連側鏡) x 1440mm軸距：2,875mm車重：1,772kg售價：HK$321,300

以往，Long Wheelbase 只會出現喺 Luxury Sedan 身上，不過隨着消費者的欲望增加，長陣版早已殺入 Sedan 甚至 Compact SUV 界別。 於2022年面世的 iX1，採用跟同廠第三代 X1 相同的 FAAR 前驅底盤，而今次測試的長陣版 iX1，是由華晨寶馬位於瀋陽市鐵西區的廠房生產，除了內銷之外，亦外銷到其他東南亞國家。長陣版的車身比標準版長了116mm，軸距亦增加了110mm，闊度及高度不變，而拉長的車身，除了為後座乘客額外提供多81mm的腳部空間之外，亦同時增加了105L的行李艙容量。動力配置方面，長陣版跟標準版亦有分別。標準版 xDrive30 採用雙摩打四輪驅動，輸出313ps，長陣版 eDrive20 則採用單摩打前輪驅動，輸出204ps，性能明顯不及標準版。至於電池方面，容量大家都是 64.7kWh，但由於長陣版是單摩打的關係，耗電量較四驅的雙摩打低，所以續航距離比標準版多了20-81km。快速充電支援 DC 130kW，29分鐘可由10%充至80%，此外亦支援AC 11kW，充電時間為6.5小時。為了對應加長了的軸距，避震亦作出較柔韌的設定，以提升更舒適的乘坐質素。雖然有別於標準版的硬朗，但長軸距並沒影響彎路靈活表現，比較有明顯分別是加速力較為溫和，出彎前大腳把電門踩到底會出現輕微推頭，整體上是少了點運動氣息。Regenerative Braking 同樣分為 Adaptive、High、Medium 及 Low，如果沒有駕駛電動車的經驗，選擇 High mode 需要改變一下收油減速的習慣。另設B檔屬於 One-Pedal Driving，放開電門後會立即產生強烈的減速，要減低這種突兀的拉扯感，就需要有更高的電門控制技巧及路面判斷力。標準配備10.25吋數碼儀表及10.7吋中央觸控顯示屏、BMW Operating System 9 操作系統、QuickSelect 同時支援語音操作，還有耗電情況、續航距離及 G-force 監察資訊。除此之外，IconicSounds Electric 亦為這輛 Long Wheelbase 的電動 iX1 提供一點生氣，系統由BMW 工程師與奧斯卡金像獎最佳原創配樂大師 Hans Zimmer 大師攜手研發的模擬電門音效，聲音有別於傳統引擎排氣聲，而是充滿科幻味的電子聲浪。輔助安全系統方面，包括 Driving Assistant Plus 駕駛輔助、Parking Assistant Plus 泊車輔助連主動線道維持功能及360度環視鏡頭、Front Collision Warning 前撞警示及自動煞車、Lane Departure Warning 離線警示連扭軚輔助、Side Collision Warning 盲點警示連扭軚輔助等，可按需要逐一設定敏感度。 2026 BMW iX1 xDrive20L M Sport 規格表摩打形式：恆磁同步摩打電池容量：64.7kWh鋰離子電池最大馬力：204ps峰值扭力：250Nm續航距離：458-539km (WLTP)傳動形式：前輪驅動傳動系統：單速直接驅動0-100km/h：8.6秒極速：175km/h懸掛系統：(前)麥花臣支柱/ (後)三連桿制動系統：(前/後)通風碟輪圈：19吋合金輪胎：(前/後) 245/45 R19 GoodYear Electric Drive長x闊x高：4,616 x 1,845 x 1,616mm軸距：2,802mm車重：2,024kg電耗：15.4-17.2 kWh/ 100km售價：HK$469,900

作為法拉利首款採用四門五座佈局嘅純電動跑車，廠方強調Luce揉合咗逾60項專利技術，將法拉利嘅人車合一激情、極致性能與舒適行車質感融為一體，同時亦係法拉利歷史上，爭議性最大、但又最震撼嘅超跑！售價由港幣$8,990,000 起。 法拉利嘅電動化技術，最早可追溯至2009年源自F1賽車嘅混合動力方案。此後，由2010年嘅599 HY-KERS原型車、2013年嘅神級超跑LaFerrari，到首款量產混能超跑SF90 Stradale，以及緊隨其後嘅296 GTB、499P賽車，以至近期問世嘅849 Testarossa，均為今次嘅純電架構奠定咗紮實根基。 Luce動力系統由四組源自旗艦F80嘅徑向磁通永磁同步摩打組成，前軸摩打最高轉速高達30,000rpm，後軸摩打亦達25,500rpm。全套系統建基於800V高壓架構，並注入大量源自賽道嘅頂尖科技。高壓電池組由馬拉內羅總部團隊全自主研發、驗證及製造，由210枚串聯電芯組成，總容量達122kWh，並支援最高350kW直流快充。值得留意的是，電池組更兼任車身結構件功能。此外，電子系統整合咗結構緊湊嘅逆變器（Inverter），並為主動懸掛系統配備DC/DC諧振轉換器，令全套系統嘅運作效率突破98%，創下廠方歷史新高。性能表現方面，新車最大馬力高達1,050ps，0-100km/h加速僅需2.5秒，0-200km/h亦只需6.8秒，極速超過310km/h，續航距離超過530km。賽道級底盤科技 為確保純電身軀依然保有純正躍馬操控DNA，法拉利Luce嘅每個車輪均配備三個獨立執行器，分別負責牽引力與再生制動、轉向角度控制，以及垂向運動調節。全靠呢套強大硬件，新車能夠根據路況變化同駕駛者狀態，實時調整扭耗矢量分配（Torque Vectoring），帶來極之精準敏捷嘅動態反應，賦予駕駛者極大信心。與此同時，全新嘅扭矩切換介入功能（Torque Shift Engagement）與增強型能量再生制動系統協同運作，模擬出媲美傳統汽油超跑嘅線性扭力輸出同制動質感。最特別係駕駛者只要撥動軚盤右側嘅轉檔撥片（Paddle Shifter），就可以喺提升可用扭力嘅同時，保持到循序漸進嘅線性加速感；而撥動左側撥片，則可增強能量回收並強化減速感，重新定義純電超跑嘅動態操控體驗。底盤管理方面，新車搭載主動懸掛控制3.0系統（Active Suspension Control 3.0），除咗兼顧行車舒適性，更能夠喺適當時機將車頭降低10mm以提升空氣動力效率，甚至利用車輪與車身嘅相對運動進行動能回收。另外，車輛側滑角控制系統10.0（SSC 10.0）亦首度整合咗源自F80嘅法拉利集成車輛預估系統（FIVE）。呢套系統基於「數字孿生（Digital Twin）」概念，能夠重構出無法直接量化嘅關鍵參數，而Luce所搭載嘅版本更比最新一代超級跑車更進一步，科技成分極高。純粹機械聲浪 法拉利工程師堅持Luce嘅電動摩打聲浪必須真實、並非虛假電子音效。研發團隊喺車軸中心安裝咗一個已獲得專利、自主研發嘅精密加速度傳感器，工作原理與電結他放大器如出一轍。它能直接捕捉機械部件旋轉時嘅真實物理振動與音效紋理，再經過過濾、均衡同放大處理，喺絕不干擾駕駛安全嘅前提下，激發最熱血嘅駕駛氣氛。此外，廠方亦將其喺阻隔噪音、振動與衝擊感（NVH）方面嘅尖端研究成果全面應用，令Luce成為法拉利史上最舒適嘅車型。LoveForm 跨界設計極簡玻璃座艙 外觀與設計美學同樣迎來突破，由設計大師 Jony Ive 爵士與 Marc Newson 聯合創立嘅 LoveForm 團隊深度參與咗法拉利Luce嘅整體設計。新車嘅外觀、內飾與交互界面完美遵循極簡主義設計語言。當中最具標誌性嘅視覺特徵，莫過於其開創性嘅玻璃座艙設計（Glass Capsule），而車尾標誌性嘅圓形尾燈，則是向法拉利 360 Modena 與 458 Italia 嘅經典美學致敬，揉合未來感與傳承。  

 Cayenne係保時捷最賺錢、賣得最好的車款之一，保時捷靠 Cayenne 賺到盆滿缽滿已經唔係秘密。來到第四代，終於為呢隻金蛋推出 Cayenne Electric 純電車型。其中最頂級嘅 Turbo Electric 版本，號稱係保時捷史上最強嘅 Turbo 量產車，數據直情係超跑級數，彈射起步爆出 1,156匹最大馬力，2.6 噸重嘅巨獸 0-100 km/h 只要 2.5 秒。聽落係咪好血脈沸騰？不過，買得波子嘅客，從來都唔止要直線快，而係「人車合一」的操控感。呢部入電嘅 Cayenne，到底係換湯不換藥的電子玩具，定係真真正正嘅的保時捷？動力：數字遊戲定係真材實料？ 聽落係咪好血脈沸騰？不過，買得波子嘅客，從來都唔止要直線快，而係「人車合一」的操控感。呢部入電嘅 Cayenne，到底係換湯不換藥的電子玩具，定係真真正正嘅的保時捷？ 講真，今時今日電動車要做超跑級加速，根本毫無技術難度，大把國產電動車幾十萬就有幾百匹。Cayenne Turbo Electric 賣到呢個價位，如果只得「一鼓作氣」嘅直線狂飆，就真係要打手板。好在，波子無令一眾死忠失望。呢部車最聰明嘅地方，係佢將馬力封印得好有層次。你平時在市區開 Normal 模式，佢會將馬力收斂在 857 匹。雖然聽落依然好多，但起步果吓唔會好似其他電車咁，一踩就成個人撞落椅背。佢個油門踏板調校得極之有心思，完全無嗰種「非開即關」嘅電子開關感，而係需要你隻腳施少少力，隨住深度增加而循序漸進咁釋放動力。呢種傳統油車嘅「漸進實在感」，先至係考功力嘅地方。想搏命咩？擰去 Sport Plus 模式，1,019 匹馬力即時解封，嗰種將你成個人吸入時空隧道嘅推背感，確實無愧「 Turbo」之名。操控：2.6 噸重嘅「靈活重量級」？ 電動車最大嘅致命傷通常係車重。呢部 Cayenne 重量接近 2.7 噸，照道理入彎應該好似推鉛球咁。但波子在底盤調校上確實係武林高手。新車標準已配置了雙氣倉氣壓懸掛同雙活瓣自動感應吸震器。在香港「補完又補」、凹凸不平嘅爛路上試車，路面起伏你依然感覺到，但嗰種令人煩躁嘅碎震同顛簸感，居然被過濾得乾乾淨淨。 更加令人驚喜嘅係佢在山路嘅表現，雙摩打嘅動力分佈明顯偏向後驅，配合後輪轉向系統，在大帽山或者石澳呢類窄彎，部車靈活到完全唔似一架大件頭 SUV。當你高速出彎，你可以好清晰咁感受到後輪牢牢咬緊地面，底盤對車身外傾嘅封印直情可以用「精妙」來形容。高速行車時穩如泰山，風噪同路噪都隔絕得極好，長途駕駛嘅舒適性，居然無因為運動化調校而妥協，呢點非常難得。內籠與實用性：科技感滿瀉，但... 入到車廂，全新的曲面觸控螢幕，分別是橫向曲的儀表板，及非常獨特的直向曲中控台螢幕，視覺效果確實震撼，資訊娛樂系統介面亦係業界頂級水平。不過，功能實在太繁複，如果你唔係科技達人，交車頭幾日相信要交唔少「學習成本」先搵到所需功能。好在波子保留了控制冷氣的實體固定按鈕，開車時要調節冷氣都方便得多。至於可調節透光度嘅全景天窗係一個亮點，香港夏天咁曬，呢個功能非常實用。  空間方面，後座空間絕對夠大，長途坐兩位成年人都好鬆動。不過要挑剔嘅係，後座雖然坐得好舒服，但直接犧牲了中間位的舒適。呢部車本質上只係一部「四人豪華SUV」，夾硬塞五個人嘅話，中間果位絕對會詐型。充電：快到可以忽略續航焦慮   既然係電動車，就要講充電鬥快。800V 電力架構，直流快充功率最高可以去到 400 kW。只要充電樁配合到，10% 充到 80% 只需 16 分鐘，10 分鐘就補給到 315 公里續航力， 飲杯咖啡就充完。基本上只要你屋企或公司附近有超充，續航焦慮在佢身上係唔成立的。   整體評價 Cayenne Turbo Electric 完美展現保時捷頂級底盤調校功力，成功將2.6噸巨獸化為山路利器。漸進式油門 (電門) 保留波子油車味道精髓， 動力兇猛，底盤調校仍有保時捷風味，市區及山路都輕鬆易控；充電極快，不過後排中間乘客位不舒服，仲有係大部份功能要在螢幕操作難免減分。  2026 Porsche Cayenne Turbo Electric 規格表摩打形式：永磁式同步摩打電力架構：800V電池容量：113kWh鋰離子電池最大馬力：857ps ( with launch control：1,156ps)峰值扭力： 1,500Nm  (with launch control)DC直流400kW快充：16分鐘 (10-80%) 續航距離：623km (WLTP Combined)耗電量： 22.3 – 20.4 kWh / 100 公里0-100km/h：2.5秒0-200km/h：7.4秒極速：260km/h傳動形式：前後摩打/四輪驅動傳動系統：前單速/ 後單速 電動摩打懸掛系統：(前) 五連桿 / (後)多五連桿 附設自動感應氣壓吸震及升降系統輪圈：22吋合金輪胎：(前) 245/40 R21 / (後) 285/35 R21 長x闊x高：4,985 x 1,980 x 1,674mm軸距：3,023mm車重：2,525kg售價：$2,568,000 起

係嘅，零跑的B05及B10確實有好多相似的地方，不過B10係SUV，B05係Hatchback，兩者的性格就好唔同。繼 T03、C10 及 B10 之後，B05 是零跑第四款抵港的純電車；五門斬尾加後驅的設定，令我想起 BMW 的初代 1 Series，揭背 FR 布局，前後重量比例仲要係50：50，巿場可謂絕無僅有。不過隨着電動車的出現，其超簡單的傳動方式，造就了 MG4 EV、VW ID.3 這類後驅 Hatchback 的開發，選擇亦愈來愈多。標榜 Fun to Drive 的 B05，除了尾轆與Hatchback 的好玩元素之外，因着零跑跟 Stellantis 集團的關係之便，還請來三叉戟一班工程團隊為 Leap 3.5 底盤進行調校，不過 Maserati 本身並沒 Hatchback 型號。採用 CTC 2.0 電池底盤一體化技術的 B05，鋰離子電池容量 67.1kWh，WLTP 續航力 482km，後置單摩打輸出 214hp，扭力240Nm，0-100km/h加速7.5秒，雖然性能唔算好強，但前後重量比例可以做到 50:50。加速及轉向同樣有  Comfort、Standard、Sport 3個選項；Regenerative 分為 Weak、Medium 及 Strong，不過要在中控平板選擇，如果行車途中想加強效果，就沒軚盤撥片咁方便。Brake Pedal Feel 都有 Comfort 及 Sport 兩級調校，效果一般。東廊高速駕駛表現平穩，路噪風噪都在合理水平；轉向準繩，Sport mode 的軚感比較實在；跑山靈活，但並非 Hatchback 那種頭尾呼應，步法較似 Fastback，彎路有種揸四驅的感覺。避震對應迂迴山路高速飛馳，消化力唔夠徹底，但平穩度尚好，亦有足夠抗側力。駕駛樂趣是有的，但 仲未達到 歐洲 Hatchback 那種明快爽朗。車廂設備跟 B10 非常接近，以一部 Hatchback 來講，空間感算闊落。座椅同樣由環保皮革包裹，配備多功能皮軚盤、8.8吋LCD儀表及14.6吋觸控中央屏幕、支援 Apple CarPlay、12揚聲器音響、手機無線充電及360泊車鏡頭等。充電方面，支援 174kW 直流快充，17分鐘可由30%充至80%電量。 2026 Leapmotor B05 規格表摩打形式：恆磁同步摩打電池容量：67.1kWh磷酸鐵鋰電池最大馬力：214hp峰值扭力：240Nm續航距離：482km (WLTP)傳動形式：單摩打後輪驅動傳動系統：單速直接驅動0-100km/h：7.5秒極速：170km/h懸掛系統：(前)麥花臣/ (後)多連桿制動系統：(前/後)通風碟輪圈：19吋合金輪胎：(前) 225/ 45 R19 (後) 235/ 45/ R19 Hankook ION evo長x闊x高：4,430 x 1,880 x 1,520mm軸距：2,735mm車重：1,837kg電耗：15.9 kWh/ 100km售價：HK$249,900

香港豪華六/七座MPV市場一直是豐田Alphard及Villfire天下，造工也十分精緻的日產Elgrand也未能成為主流，不過自從電動車有一換一稅項寬減，內地新崛起的Denza D9純電MPV立即成功搶佔市場，然後又有Zeekr 009及Xpeng X9加入戰場，令到售價在50萬至90萬港元之間的電動MPV市場競爭日益激烈。至於小改款的Xpeng X9，由於標準已配備主動式後輪轉向系統，開起來感覺比實際尺寸小得多，轉向靈活，如果將懸掛調到最硬最低矮，在山路上暴走，甚至有少許Driver's Car味道。小改款後的小鵬X9，外觀改動主要變化集中於全新前泵把，以及重新設計的20吋合金輪圈，並採用類似勞斯萊斯的懸浮式Logo蓋，配上Michelin 235/50 R20 e-Primacy輪胎。整體外觀改動不大，但這套輪胎配合主動後輪轉向系統，令行山路時更加靈活，穩健感亦明顯提升。 事實上，氣壓懸掛對車身動態的控制更見平順穩定。除了有效吸收路面顛簸，亦能將彎路引起的車身外傾抑制得更加穩固、沉穩，整體行車舒適度明顯改善。動力及充電方面，新車配備800V電力架構與5C超充技術，充電效率大幅提升。快充約12分鐘即可將電量由10%充至80%，WLTP續航力535km。以香港日常路面環境來說，充一次電基本上足夠一星期使用，相當實用。 廠方標榜X9是現時唯一採用三排電動三摺疊座椅設計的車型，座椅佈局可靈活安排為4、5、6或7座。前排配備雙側靜音電索門，前座及中排共四張座椅均設有冷暖氣通風，冬暖夏涼；中排兩張captain seat更配備零重力（Zero Gravity）座椅。車頂設有摺合式21.7吋螢幕，配合27個揚聲器帶來媲美劇院級的聽覺體驗，車內亦配備同級車必備的冷熱一體式電動開關小冰箱。尤其值得一讚的是，只需按下中排座椅上的掣鈕，座椅便會自動移前、椅背同時前傾，出入第三排非常方便。 車廂亦配備主動降噪技術（Road Noise Cancellation），系統會即時監測行駛時產生的路噪，並透過車內音響發放反向聲波進行抵銷，有效降低低頻路噪，進一步提升行車寧靜度。 總結：小改款X9外觀改動輕微，但輪胎、主動後輪轉向與氣壓懸掛的配合，令操控與舒適度同步提升；800V+5C快充與535km續航對香港使用足夠實用，而三排電動摺疊座椅、零重力座椅、劇院級音響與主動降噪等配置，則繼續強化其豪華MPV的定位。  2026 Xpeng X9 Standard Range 規格表摩打形式：恆磁同步摩打電池容量：94.8kWh磷酸鐵鋰電池最大馬力：320p峰值扭力：450Nm續航距離：535km (WLTP)傳動形式：單摩打前輪驅動傳動系統：單速直接驅動DC快充：12分鐘 (10-80%)0-100km/h：8.2秒極速：200km/h懸掛系統：(前)雙搖臂/ (後)H臂多連桿 氣壓懸掛制動系統：(前/後)通風碟輪圈：20吋合金輪胎：(前/後)  235/50 R20 Michelin e-Primacy 長x闊x高：5,316 x 1,988 x 1,785mm軸距：3,160mm車重：2,555kg售價： HK$799,900 

樣，唔cute但又唔ugly；續航力，唔長但又唔算短；賣點喺邊？可能就係僅10多萬的車價，而又能配備 Level 2 的智能輔助駕駛系統。成立於2015年的零跑汽車 Leapmotor，自2023年被 Stellantis 注資，成立零跑國際合資公司之後，正式由內銷面向國際巿場。2022年9月先在香港交易所主機板掛牌上市，2025年6月正式進軍香港，先後在太古城及九龍灣開設陳列室；首批新車於同年12月在香港迪士尼樂園酒店舉行交車儀式 ，當中包括 C10 及今次長測的 T03 型號。T03 分為 Comfort 及 Premium 兩個版本，兩者相差七千多元，分別在於使用15吋鋁合金輪圈及多了大天幕連電動遮陽簾，續航距離大家都是 265km。外形，有啲 smart for four 的影子，又有少少日本 K-Car 的線條，設計普普通通，唔會特別討好，亦唔會令人討厭，我估冇幾多個會因為鍾意佢個樣而買。 第一次接觸 T03，五門揭背細車仔，已有晒心理準備車廂同行李艙唔會大得去邊。果然，要放入一支「結他」都要瞓低整排後座，不過210L的容量，勉勉強強都夠打橫放入一個中大型行李箱。前座駕駛席同領航席，外形似曾相識，平治 CLA？還是保時捷 911？總之賣相是帶點德國跑車味，而這股跑味亦延伸至前面的平底軚盤。後排不是完全平地台，不過反正後座只有兩個位，影響唔大。作為後座乘客，只要 under 5呎10，就算 BMI 有啲超標都問題不大，因為左右兩邊有足夠空間寬容你的任性，不過腳位就可能要前面兩位遷就一下。軚盤後方近3點位的轉波棒及電動手掣，又係非常面熟。Drive mode 可選 Standard、Sport 及 Eco，攞車當日已經充飽電，資料顯示續航距離 265km，對於沒有私人充電位的我來說，有 range anxiety 都好正常，所以兩日長測，只係同狄Sir喺上大帽山時，短暫用過 Sport mode，其餘大部分時間都用 ECO mode，正常平順駕駛，都有9成符合廠方公布的265km續航距離。軚盤都有3段重量調校，短軸距再加上略為敏感的轉向反應，用 Comfort  很容易會喺修正航道過程扭多咗軚，就算改用 Standard，情況都係差不多；選用軚感較重的 Sport，就可以減輕這種帶點過敏的神經質。兩日長測，先後行過不同巿區、山路、公路、多條隧道及繞道，一輛10多萬的細車，靈活性及穩定度算唔錯，只係路噪大了一點點，可能同原廠的國產輪胎有關。以高速路段來講，中環繞道及中九龍繞道的行車時最為顛簸，真係唔明兩條時速可達80km的公路點解可以舖得咁差！輸出 94hp，OK夠用，是一般細車仔的動力表現。迂迴山路的表現，正常合理速度是得心應手的，激進啲就會開始出現 understeer；懸掛濾震能力只屬一般平價車仔貨色，原廠設定的 Regenerative，拖慢力度算適中，只要減速時慢慢放開電門，效果就跟燃料引擎車一樣，可完全消除減速時的突兀感，不過無得調節輕重，落斜就要完全依賴制動系統。雖然車價只係10多萬，但 T03 卻配備了同級罕見的 Level 2 智能輔助駕駛系統，由3個鏡頭＋1個毫米波雷達＋11個超音波雷達組成硬體監測系統，負責ACC自適應巡航控制、AEB自動緊急制動、BSD盲點探測系統、DOW車門開啟預警、FCW前碰撞預警、LKA車道維持輔助系統、ADDW高階分心警告及DDAW疲勞駕駛預警系統等，不過就唔知點解無後波偵測警報。 據聞截稿前仲有極少量享有免稅優惠的 Comfort 版 T03， 有愛就衝喇！  2026 Leapmotor T03 規格表摩打形式：恆磁同步摩打電池容量：37.3kWh磷酸鐵鋰電池最大馬力：70kW峰值扭力：158Nm續航距離：265km (WLTP)傳動形式：單摩打前輪驅動傳動系統：單速直接驅動0-100km/h：12.7秒極速：130km/h懸掛系統：(前)麥花臣/ (後)扭力樑制動系統：(前/後)碟式輪圈：15吋合金輪胎：(前/後) 165/ 65R15 Westlake Radial RP18長x闊x高：3,620 x 1,652 x 1,577mm軸距：2,400mm車重：1,175kg電耗：16.3 kWh/ 100km (WLTP)售價：HK$145,854up (Comfort) / HK$153,300 (Premium)

全新 Cayenne S Electric 定位在入門版Cayenne與頂級Cayenne Electric Turbo之間，雙摩打四驅系統可輸出544ps馬力，啟動起步控制功能(Launch Control)後更可達到666ps，在高性能輸出與日常實用性之間，取得更佳的平衡。配備摩打四驅系統 與現有另外兩款Cayenne Electric車型一樣，Cayenne S Electric配備總容量113 kW的高壓電池，在合適的快速充電站以最高400 kW進行充電，只需16分鐘即將充電狀態從10%充至80%。 Cayenne S Electric搭載前後軸雙永磁同步摩打四驅系統，由0加速到100km/h只需3.8秒，最高速度可達 250km/h，綜合 WLTP 續航里程最高 653 公里。可選配多項Turbo型號高級配備  Cayenne S現可選配多項以往只供Turbo型號使用的高級配備，包括保時捷扭力分導升級系統 (PTV Plus)， 進一步提升操控精準度與行駛動態表現。頂級的 Porsche Active Ride 主動懸載系統幾乎可完全抵銷車身運晃動，確保卓越的行車穩定性。高性能的保時捷陶瓷複合煞車系統 (PCCB) 配以黃色制動卡鉗，同樣可用於Cayenne S，亦可選配Sport Chrono跑車計時套件，透過Push-to-Pass (一鍵加速) 功能，可在10秒內提供90 kW(122 ps) 的額外動力，而內置的賽道模式則可針對電池進行預調校，實現最佳賽道性能。香港市場即將開放訂購 外觀上，Cayenne S 標配專屬 Volcano Grey Metallic 前後泵把，配合 20 吋 Cayenne S Aero 輪圈，展現低調卻充滿殺氣的動感姿態。 此外，Porsche 特別推出「Director’s Cuts」系列，由Style Porsche設計部門操刀。首波登場的是適用於全線純電Cayenne的Interior Style Package內飾套件，提供多達13種車色及多種個性化飾件，讓每一位車主都能打造獨一無二的駕駛座艙。香港市場即將開放訂購，各位波子迷準備好未？

線條硬朗同埋都幾有型的Jaecoo J5純電動SUV，係中國奇瑞車廠旗下的新能源品牌，輸出211匹馬力，操控輕鬆容易，WLTP 續航402公里，又附設戶外（V2L）用電 功能，除了可作為平時買菜腳車，仲可以係周末去郊外 Camping，又或者載寵物出遊。至於 （一換一） 售價只需 HK$169,000。市場定位雖然是入門級 SUV，但 J5 在涉水深度、車頭及車尾離地角等規格上，均比一般都市 SUV 更趨向越野設定，並備有德國TÜ V認證寵物防抓耐磨皮革座椅設計，主打「寵物友善」等實用功能。 講到越野設定，J5的涉水深度也有450mm，離地距為174mm，接近角為20°，離去角為29.8° ；從數據上看，Jaecoo J5 的越野幾何參數雖然優於一般城市 SUV，但與真正的「硬派越野車」例如 Suzuki Jimny、Jeep Wrangler或Land Rover，仍有明顯距離。硬派越野車通常至少要有210mm以上，例如Jimny為 210mm，Land Rover Defender更超過 290mm。 至於174mm的 離地距 ，應付亂石路段就較容易碰撞到底盤。標榜戶外活動及適宜寵物設計 全長4,380mm的J5，呎碼介乎於小型SUV和中型SUV之間。內飾走簡潔路線，配備13.2吋直立式觸控螢幕，支援無線 Apple CarPlay 及 Android Auto，啱晒手機不離身的朋友。不過除了行車模式、緊急燈及門鎖仍是實體掣鈕，大部分功能操作都在 觸控螢幕，例如要調校冷氣，就相當不便。 至於J5具備 3.3 kW 的 戶外（V2L）供電功能，這點對於喜歡野餐、需要在戶外使用電器（如咖啡機、寵物美容用品）的用家非常有吸引力。行車寧靜舒適 前排座椅承托不錯，並且是電動調校，又有通風及暖氣功能，後排腳部空間亦寬敞，駕乘十分舒適，車廂的隔音亦令人滿意，廠方更強調前座車窗是雙層玻璃。 車廂也有不同顏色氣氛燈，天幕玻璃頂的設計可為車廂帶來更開揚的天然光，同時也具備電動開關的遮陽簾，是比較體貼的設計。雖然在部分細節處仍可見到較廉價的塑料材質，但整體組裝質量同埋視覺高級感，在同價位中相當具競爭力。整體評價： 偏向都市代步與舒適性  在山路上，J5的操控靈活，加速雖然靈敏，但表現是偏向舒適的溫和設計，優點是乘客會較為舒適，偏向都市代步與舒適性，動能回收（Regen）即使在最強模式下介入也算溫和，對於追求操控感的駕駛人來說，就算選擇了Sport模式，其轉向感偏輕也不夠銳利，駕駛樂趣欠奉。 安全設備方面，J5也和一眾內地電動車一樣，配備多頂駕駛輔助及安全設施，包括自動緊急煞車、車道保持輔助 等十多項功能，而且系統介入相對 比較人性化，不會做成聲音的煩擾。 整體而言，J5是一款針對年輕市場而設計的城市電動SUV，也加入了輕度的越野性能，還有時下年輕人喜愛的寵物友善配備，適合喜愛戶外活動的需求，在入門電動 SUV 市場中極具競爭力。JaecooJ5 規格表摩打形式：恆磁同步摩打電池容量：58.9kWh鋰離子電池傳動形式：單摩打前輪驅動最大馬力：211HP (115kW)峰值扭力：288Nm0-100kmh：7.7sec極速：175km/h懸掛系統：(前)麥花臣/ (後)多連桿續航距離：402公里(WLTP)130kW直流電快速充電時間：28分鐘 (30%-80%)輪圈：18吋合金輪胎：235/55R18長x闊x高：4380 x 1860 x 1650mm軸距：2,620mm車重：1,710kg 售價：HK$169,000 (「一換一」計劃資格)     (# 3月31日之後約：HK$260,000)