租車奇遇記 (2) - Toyota Prius, 日本

我租車通常唔會揀最平嘅, 通常會揀由尾數起第二、三級個D。 如果係歐洲租, 就更加會make sure唔係自動波。 今次見到Prius都唔係貴Corolla幾多, 咁不如就試吓呢架香港無行貨嘅第五代Prius啦。 我租三日34,188円, total貴過租Yaris一萬円左右。

貴咗喎, 抵唔抵? 請你睇晒呢篇文章。

一款車25年來賣咗五百萬架, 1D都唔簡單! 代號XW60 (ZVW60) 嘅第五代Prius, 保留咗二、三、四代嘅梯形設計, 而車尾稍為以曲線拗平咗少少, 車身亦都長咗, 房車感強咗。 新款成架車大咗一個碼, 全長4,600mm, wheelbase都有2,750mm。 以前一直覺得Prius細過Corolla, 而家反而覺得E210好似縮咗水, XW60變得好明顯大架過E210。 線條靚咗, 貼地得來, 曲線運用上有40系Alphard個種一氣呵成嘅複雜性。 以前Hybrid好似係新世代產物, 好似早幾年D電車咁, 套上個懶係前衛嘅形象可以理解。 今時今日, 連電車都開始要走返貼地路線, 你呢D上一代科技仲邊玩得起前衛呀? 貼地始終都係好事。 

前後座空間無投訴, 內櫳設計唔浮誇, 方便實用。 豪華佢玩唔起, 不過好好睇睇就點都做得到。 我最唔滿意係個錶板, 佢用bZ4X同一設計, 即係要係軚頂望埋去, 不過佢軚位比bZ4X好, 唔會過低。 尾箱容量官方數字話就話有410升, 但外形保留第二代Prius沿用至今嘅斜尾設計, 即係往上發展嘅能力嚴重受限, 空間實性唔及得SUV或者MPV咁強, 形狀亦唔及得傳統三廂式房車咁四正實用。 尾箱仲有兩個問題, 唔夠深! 另外, 尾箱頂個塊拉簾, 租車無跟埋, 即係尾箱裝咗乜, 一眼睇到晒。 我個大喼係28吋, 兩個打直放都好fit, 都叫夠做。 有晚去到酒店, 一個日本大叔見我泊個咁窄嘅位用頭入, 感到好驚奇! 佢用有限英文同我吹水, 問我點解唔用尾入, 我一打開尾箱拎喼出嚟, 唔洗捐去後面攞, 佢就明晒。 

車廂內噪音, 主要來自胎聲。 行石屎路, 嘈得有D離譜, 不過行鋪得靚嘅泊油路, 又好好多。 風聲唔明顯, 引擎聲同震盪亦隔得唔錯, 雖然未至於唔知引擎行緊定熄咗火。 懸掛係前麥花臣、後雙搖臂結構, 彈弓仍覺稍軟, 吸震筒反應尚算跟得上。 如果入彎、cut線手軚太急, 仲會覺得有少少𠺘, 不過TNGA底盤夠晒硬淨, 加上懸掛行程唔算長, 彎路操控已經相當唔錯。

日本本土版本有HEV、PHEV、前驅、E-Four四驅、1.8、2.0等多個配搭。 而今次租呢架係齋版, 195/60R17胎, 鋼鈴膠冚,  車身無任何型號標記, 揭起頭冚睇到引擎係上代嘅2ZR-FXE, 而唔係直噴嘅Dynamic Force引擎。 呢一代轉咗用鋰電池, 儲電量達4.08Ah, 已經比以前大咗好多, 但係高速公路上, 想純粹用電力維持80km/h左右嘅速度, 依然有困難, 否則個EV走行比率就可以更高。

呢副只得98匹嘅1.8偈, 加埋輸出95匹嘅1VM摩打都好夠力, 踩落去個力度令我有D唔敢相信佢總輸出只得140匹、142Nm。 呢個e-CVT波箱非常唔錯, 反應相當好。 新一代電摩打明顯地大力咗, 一起步係電摩打做野先, 純正電車嘅即時爆棚扭力, 低速市區慢溜塞車無敵! 入高速公路繼續加速, 引擎介入點再比以前暢順。 離地個D 0-100km/h唔好理, 係山路上斜盡油過車, 都毫無難度, 輕而易舉。 Once again, 呢架只係140匹嘅1.8齋版。 有電車扭力隨傳隨到嘅優點, 尾段又有油車嘅韌力, 只差在Prius唔出棍波, 否則我都要買返架。

攞車時顯示, 滿油續航力「只」係八百幾公里, 點知一路揸一路升! 大家唔好唔記得, 我係揸開舊式Turbo車嘅慳油王, 繼續奉行唔無需要就唔踩嘅信念, 希望好似LBX同Jazz HEV個兩次咁, 「out揸」廠方數字, 不過結果失敗告終! 有無搞錯呀? 廠手係咪落斜兼且全程行電架? 最後到還車前入油, 行咗705km, 大約一半高速, 一半山路。 錶板顯示剩餘續航距離仲有307km, 即係全缸油可以行到1012km! 拿.... 唔係淨係日產e-Power先行到過千公里架!

32.6km/L耗油量官方數字, 同250cc電單車差唔多, 連我呢個慳油王都做唔到! 友台阿符租個架用2.0偈, 做到24.4km/L。 我租呢架1.8, 廠方數字係慳油過2.0, 我今次做到26.2km/L, EV走行比率更曾經高達90%, 雖然打破唔到廠方數字, 但已經慳油到CLS! 上次試Corolla Cross Hybrid, EV走行比率去到70%已經好impressive啦! Prius係幫Toyota省令招牌嘅代表作, 佢嘅Hybrid技術發揮得好過其他車, 的確不足為奇。 純電續航距離比上代長50%, 實數係幾多就搵唔到資料, 不過返名古屋途中, 有一段長超過十公里嘅塞車慢溜路段, 接近完全行電。 電池行到乘返兩格, 就會著偈叉電。

就算Yaris行到12km/L (公平估計啦), 行705km都要59升油, 實際上可能更多。 再者, 就算你好彩, 租到架Yaris係用1.5偈, 加速力夠唔夠呢架1.8 Prius強先? 揸得開心係Priceless架! 今次只係入咗唔夠24升半油, 即係呢一萬円都大概係油錢方面打和咗。 勁呢? 如果做腳車, 仲要揸得多, 真係小數怕長計。 如果揸得少, 好處更加明顯過揸電車。 講耗油量, Prius真係無得輸! 而且, 齋版X日本賣三百萬円有找, 真係好抵揸, 難怪一街都係!

還車前入油個陣, 見到隔離揸Note e-Hybrid個一男一女係講國語嘅, 去到還車地點, 又見返呢對陳生陳太, 先知原來揀Prius呢一級Hybrid車, 最後都有機會唔係攞到Prius喎🤣! 今次算好彩囉, 到手嘅真係相中個款車!