轉子引擎再次浴火重生了！不過唔好開心得太早，因為現實與祈許可能有啲出入。

兩年前，Mazda 發表了自家首部電動車 MX-30，不過鋰電容量只得 35.5kWh，續航距離200km左右，好明顯，心理上唔夠安全感。當然，只要加大電容量，安全感咪返晒嚟囉，但 Mazda 覺得都係唔夠喎，於是除了加大電容量之餘，更索性內置獨立發電機，自行幫鋰電充電。

為了方便擺位及降低重量，車廠就選擇了超級經典的轉子引擎。這副曾經用於 RX3、RX7 及 RX8 的殿堂級機器，具備體積細、高效率的優點，不過就比較嘥油兼且有食偈油的問題，而損耗亦較高，所以一直沒有被廣泛應用。至於今次轉換角色變成一副發電機，相信喺耗油及損耗方面都應該會有很大改善，但由於轉子引擎無配 twinturbo 及不會跟傳動系統連接，所以駕駛感自然不能跟RX系列相提並論。

這部 MX-30 PHEV 原本打算喺今年發表，不過基於各種原因，車廠決定延期至明年三月，唔知轉子迷會唔會覺得把 Wankel 引擎變成一部發電機係一種褻瀆呢？