全新第6代BMW M3，動力依然係車迷熱愛嘅雙渦輪增壓直6引擎，但就以8前速自動波取代7前速雙離合器，而且有6前速手波可選！

全新第6代M3，廠方編號G80，同時推出仲有編號為G82嘅M4。對一直備受車迷及車主關注嘅M3來講，更新換代，設計師嘅壓力肯定好大， 理論上蕭規曹隨係最明智又最簡單嘅選擇，但係寶馬今次選擇係激進嘅大面罩，賣相凶猛咗，不過就引起唔少車迷劣評。

除咗車頭面罩變大之外，動力依然係車迷熱愛嘅雙渦輪增壓直6引擎，依然係後輪驅動布局，依然係四門房車設計。想要更好劈嘅四驅版，就要等7月生產嘅型號。

仲有乜嘢係全新？就係以8前速自動波取代7前速雙離合器，而且有6前速手波可選，不過暫時只有M3基本型號才可選配手波。至於我哋測試性能最強嘅M3 Competition，就只配8前速自動波，據稱係因為要配合即將推出全時四驅版嘅原因。

進入駕駛座，首先係發覺座椅位置有改進，比以前低得多又唔影響視野，感覺更有跑味，對肩部及腰背都有更好嘅承托；如果想更有跑車化表現，可以落track day玩得更盡慶，仲可以選配碳纖維嘅桶形座椅。至於後座空間算係寬敞，腳部空間合理，乘坐感亦相當舒適。

第二樣會立即發現，就係轉向非常靈敏而銳利，而且比上代更快速準確將車頭指入彎角。在山路上，雖然唔係熱血嘅手波，又唔係出名好feel嘅雙離合波箱，但係呢副8前速嘅自動波簡直順滑過絲襪奶茶，你都幾難有投訴。

操控好正！轉向好sharp！加埋前19吋、後20吋鍛造輕合金輪圈，而且配埋賽道規格輪胎，非常咬地！非常好劈！至於馬力510hp嘅直6雙渦輪增壓引擎，高轉火爆，中段雄渾，最正係低轉已經好生猛。揸住呢架新M3，只要你夠膽踩油，650Nm嘅強大扭力就會不斷刺激你嘅腎上腺素急升 ，而且只需3.9秒，就可完成0至100km/h加速。

值得一提係 M3 其實重達 1,805 公斤，但係踩油時完全唔覺架車係咁重，反而感覺好輕盈，而且冇咗以往 M3 在狂野時會出現無法控制嘅表現，可見下盤功架非常了得，原因係寶馬用咗新嘅 M Drive Professional 系統，其中嘅 M Traction 牽引力控制可以更細緻無縫控制行車穩定性，最好玩係仲可以設置由1至 10 級嘅牽引力，決定後輪嘅側滑程度，操作又非常順滑，令駕駛人可以漸進地摸熟架車嘅操控反應，然後可以更盡情發揮 M3 嘅性能。

優點
・更加平衡更加面面俱圓，但依然可提供M系列的威猛性能
・加速凌厲，下盤功架出色

缺點
・軚感好電子化

2021 BMW M3 Competition 規格表
引擎：直6 TwinPower turbo
容積：2,993c.c.
馬力：510hp@6,250rpm
扭力：650Nm@2,7500 – 5,500rpm
傳動：前置引擎，後輪驅動
波箱：8前速M Steptronic配軚盤+/-轉檔
0-100km/h：3.9秒
長x闊x高：4,794 x1,903 x 1,433mm
軸距：2,857mm
車重：1,805kg
售價：HK$1,518,000
查詢：BMW HK