焦點就係4公升自然吸氣水平對向6汽缸引擎,另一個焦點就係6前速手波,加埋就成為死硬派波子迷嘅甜蜜焦點!
當保時捷宣佈為Cayman GTS改配可以發出轟天動地嘅自然吸氣水平對向6汽缸引擎,而且係來自Cayman GT4相同嘅4公升引擎,波子迷肯定笑到合唔埋口;而且GTS只係性能略為調得冇咁火爆,例如最大馬力由420ps調為400ps,而引擎每分鐘轉速就由7,600轉調到7,000rpm,不過紅區就可去到7,800rpm,0-100km/h加速由4.2秒略增到4.5秒,0-200km/h亦只係14.1秒,可見呢副被稍為收歛咗嘅自然吸氣水平對向6汽缸引擎依然係幾咁好氣好力。
只係好氣力其實仲未夠嘅,自然吸氣引擎最緊要係聲靚,要做到聲靚,就一定要低中高轉都要好靚聲,呢副引擎由撻匙嘅轟然沉厚有勁嘅一聲起已經好sexy。呢副本來只係留畀Cayman GT4及718 Spyder用嘅保時捷撒手鐧,由撻匙到加速提升轉數時嘅轉波排氣聲都非常扣人心弦,由1波起步加速到要轉2波時,眨眼已催谷到7,800rpm引擎紅區,隨住令人心動嘅引擎聲變尖銳狂野,轉2波時由高頻轉調為中頻,再加速再向上急升準備轉3波嘅變調聲,已足以令人腎上腺急升!
引擎夠晒sexy都未夠嘅,按照GTS的常規做法,行車離地高度已降低20毫米,再配合主動式吸震懸掛,中置引擎後輪驅動,同埋後輪差速鎖。至於錦上添花嘅Sport Chrono配件,除咗增設儀表板上嘅計時表,仲有係可以在軚盤上按鈕進行選擇4種駕駛模式。
外觀方面,GTS嘅標記就係好多啞黑色,分別布置在前後車燈,20吋啞黑色合金軨,及前後泵把下嘅啞黑色擾流器。 至於車廂就布滿碳纖維及Alcantara賽車皮革,盡可能提供接近賽車化嘅感覺,不過同更賽車化嘅GT4最明顯分別,係仲有正常嘅開門把手,而唔係拉索帶。
老實講,保時捷嘅自然吸氣水平對向6汽缸引擎及6前速手波組合,係會揸一次就令你上癮,尤其在多彎嘅山路上,由軚盤傳來嘅堅實而充滿路面感嘅轉向反應非常敏銳,而車架就扎實到任何急彎都唔會覺得有任何不安表現,加上沉厚結實嘅引擎呼吸聲,係一定會令人沉迷的。值得一讚係保時捷對底盤嘅調校唔係單純硬,而係在各方面都有好出色嘅平衡,例如制動系統係非常高效但同時又提供好強烈嘅溝通感覺。以上種種嘅過癮感覺加埋一齊,就係令你上癮嘅原因。
講到平衡,Cayman GTS 4.0的確係一架平衡得好完美嘅跑車,雖然底盤設定非常跑車化,當斯文地駕駛,又可以相當寧靜舒適,狂野一些駕駛,又可以陶醉於完美嘅中置引擎後輛驅動布局及銳利而準確嘅轉向,加上穩如泰山嘅底盤,好似將你緊緊地釘在座椅劈彎嘅感覺,又點會唔令人上癮。
整體而言,改配4公升自然吸氣引擎嘅718 Cayman GTS,可以話係一種昇華,對唔係追求要絕對賽道感受嘅用家來講,無需去到終極嘅Cayman GT4,就可以獲得6汽缸引擎加手波嘅享受,絕對係近年最出色嘅保時捷跑車之一。 至於143萬起嘅車價,加埋options就超過160萬係咪好貴?如果你熱愛駕駛,就唔會覺得貴,甚至會認為係物有所值。
2021 Porsche 718 Cayman GTS 4.0規格表引擎:F6 DOHC 16V 容積:3,995c.c.馬力:400ps@7,000rpm扭力:420Nm@5,000-6,500rpm傳動:中置引擎‧後輪驅動波箱:6前速手動0-100km/h:4.5秒極速:293km/h制動:(前/後)通風碟輪圈:20吋合金輪胎:(前)235/35Z R20 / (後)265/35Z R20 長x闊x高:4,405 x 1,801 x 1,276mm軸距:2,475mm車重:1,405kg (Din)油耗:10.8L/ 100km (Combined)廢排:246g/km售價:HK$1,430,310起 (測試車連options HK$1,623,795)
上一篇
下一篇
曾任車主雜誌主編、電台及電視台客席主持、出版駕駛指南,以及車書編輯顧問等等。多年來在汽車傳媒圈慢活,從編輯車書發展至網上平台,邊做邊學做更好的汽車傳媒人。
狄港生