雖然升級設備唔多，但由於標準配備齊全，再加埋一個靚價，喺中型 SUV 巿場仍有一定吸引力。 為了配合節能減排，近年有車廠開始把引擎容積進一步降低；不過亦有人擔心，細容積引擎未必夠力應付有番咁上下噸位的 SUV。 時代唔同咗，以前出名食油的美國車，家陣都要講節能減碳，正如這部第二代 Kuga，由最初1.6公升降到1.5公升，雖然容積縮咗水，但輸出維持不變。180匹馬力當然唔可能要求加速洶湧澎湃，不過由於最大扭力可以在二千轉之前爆發，所以上斜比很多兩公升MPV還要好力。相對於時下的 SUV，Kuga 的軚感相當充實，懸掛設定偏向運動化，路面的過濾適中，操控有點粗獷的質感。 今次測試的改良版，換了新設計的雙間電鍍面罩及智能 Bi-Xenon HID 頭燈，車身顏色亦新增了 Blue Metallic 及 Diffused Silver。軟件用上新一代 SYNC 3，輕觸屏幕亦加大至8吋；標準配備還有多功能連轉檔撥片軚盤、雙區獨立恆溫、全景天窗、車頂行李架、行李艙門開啟感應、免匙開鎖、HSA 斜坡起動輔助及EBA 緊急剎車連警示系統等，加多一萬就可以升級至真皮座椅及電動控制駕駛席。 車廂空間及行李艙容積都非常夠大，布置並非像德裔 SUV 走精緻路線，設計是帶肌肉型的立體感，用料唔玩花巧，整個車廂都很有美式的粗獷氣氛，是一輛抵食夾大件的實用型四驅 SUV。 Ford Kuga Titanium規格表 引擎：L4 Turbo Charger 容積：1,498c.c. 馬力：180ps@6,000rpm 扭力：240Nm@1,600-5,000rpm 傳動：前置引擎‧四輪驅動 波箱：6前速全自動配軚盤+/-轉檔 0-100km/h：9.7秒 極速：200km/h 懸掛：(前)麥花臣/ (後)多連桿 制動：(前)通風碟/ (後)實心碟 輪圈：17吋合金 輪胎：(前/後)235/55 R17 Michelin Latitude 長x闊x高：4,524 x 1,838 x 1,760mm 軸距：2,690mm 車重：1,686kg 油耗：13.5km/L 廢排：173g/km 售價：$289,900