無論體型、設備及調校都跟 Golf 的距離愈拉愈近，問題是，三個汽缸到底夠唔夠照。

要連續6年蟬聯最佳引擎當然唔容易，要打破紀錄就更加困難；今次測試的 Polo 230 TSI，動力心臟是一副只有 1.0公升的三汽缸直列引擎，剛剛喺今年擊敗了 Ford 的同級 1.0公升 EcoBoost 成為 2018 International Engine of the Year，實力，自然有番咁上下。

改善三汽缸的先天缺點
雖然三汽缸先天較四汽缸慳油，不過亦由於少了一個汽缸的關係，對於四衝程的接力運動中，曲軸旋轉的過程就會產生動力真空期，流暢度自然不及四汽缸引擎。為咗提升曲軸的運轉暢順度及效率，呢副 VW 1.0公升直三引擎的燃油噴射壓力被調校至高達 250bar，而活塞及連桿就由鋁合金製成，好處是減少了慣性運動及振盪之後，可避免使用會降低動力輸出的反向平衡軸。

更適合採用渦輪增壓
實際測試，呢副三汽缸渦輪增壓引擎喺發動及起步初段的反應，的而且確仲有輕微顫動，不過只要轉數上到千多rpm之後就會消失。唔好以為三汽缸的優勢只限於輕同慳油，其實比起四汽缸，佢更加適合使用渦輪增壓，因為四汽缸喺四衝程運動中的排氣時間，對渦輪旋轉的壓力影響會大過三汽缸引擎，簡單啲講，兩副採用低壓渦輪增壓的引擎，三汽缸所產生的 turbo lag 會比四汽缸更小，所以比起四汽缸的 Golf，你更難察覺呢部 Polo 230 TSI 的 turbo lag。

操控貼服又穩定
加速方面，由於車輕，加上扭力高達200Nm，所以表現幾似一副1.4公升直四機器。動力輸出屬於漸進型，中段反應最爽，彎路的熨貼程度很有 Golf 的影子，而且轉向比 Golf 更靈活；雖然沒自選行車模式，但拍入S檔之後，引擎會升上較高轉數才會轉波，動力輸出較為緊湊，但同時亦會較耗油。呢類 power 唔大的車仔，最好玩就係跑山可以輕輕踩住迫力入彎，之後再畀你盡情地板油出彎，有乜「依郁」，Electronic Stability Control 會聯同 ASR、EDL 及 EDTC 等幫你解決過彎時遇到的問題，不過假如感覺到尾轆開始有啲唔聽話，即係話你知，已經到咗極限了。

車細設備齊
跟上一代比較，車身長了81mm，闊了69mm，軸距長了94mm，唯一沒增反減的，是被降低7mm的車高，我唔敢講呢7mm對今代 Polo 的操控有幾大影響，不過高速行車就肯定比上一代穩定。車身大了，除了乘坐空間同步提升之外，行李艙容量亦由280L增大至351L。標準配備6.5吋彩色多功能觸控式屏幕、無線充電、上斜輔助起動等，想要埋 Active Info Display 數碼儀表板的話，就要另外加購；以一輛20萬的德國車仔來講，配備算係咁，至於實際耗油量能否做到廠方公布的4.8L/100km，就有待日後長測報告了。

2018 Volkswagen Polo 230 TSI 規格表
引擎：L3 TSI
容積：999c.c.
馬力：115ps@5,000-5,500rpm
扭力：200Nm@2,000-3,500rpm
傳動：前置引擎/前輪驅動
波箱：7前速DSG雙離合半自動
0-100km/h：9.5秒
極速：200km/h
懸掛：(前)麥花臣/ (後)扭力桿
制動：(前)通風碟/ (後)實心碟
輪圈：17吋合金
輪胎：(前/後) 215/45 R17 Continental Conti Sport Contact 5
長x闊x高：4,053 x 1,751 x 1,461mm
軸距：2,551mm
車重：1,190kg
油耗：4.8L/ 100km
售價：$199,980