繼 Touran 之後,Sharan 是第二款推出 Team 型號 的 MPV,而且喺保留7座位的同時,車價比之前的6座版更便宜。
考慮緊買部中型7人車的話,不妨先問問自己,到底有哪些設備你係一定需要的。首先,我認為一定要有的是雙電趟門,因為車門咁大塊,唔好講小朋友或者老人家,遇啱路面向上斜,就算食飽飯的後生女,都未必夠力閂好度門;撞啱全車得你一個男人,下下落車開門閂門你都咪話唔煩,所以有對電趟門就真係方便好多。至於今次長測的 Sharan Team 唔只有齊一對「電趟」,就連行李艙門都係電動開關,有咗呢兩項電動機關,其實已經方便好多。
另一項不可少的設備就係天窗,近4米長的車廂,如果有個巨型天幕的話,感覺會開揚好多開心好多,但考慮到巨型天窗會在炎夏為車廂升温,所以 Sharan Team 的天窗及側窗同時有埋遮陽簾,玩到攰,就可以趁回程時關上窗簾,校斜椅背休息一下,標準配備有埋3區獨立冷氣出風口,就算坐到最後排都唔使驚焗親。