海神呼嘯 Maserati Levante S GranSport

除了外形，無論底盤以至引擎的調校根本就不像一輛SUV。

七年前在Frankfurt Auto Show展出的概念車Kubang，其實已經估到呢部即將成為Maserati的首款SUV一定好跑得，問題係，正式量產的Levante到底有幾辣。

純意大利血統
坊間盛傳，Levante的底盤是借調Chrysler旗下的SUV，呢個傳聞某程度上是跟Fiat及Chrysler的交情有關；事實上，Levante的底盤是由Quattroporte發展而來，引擎由Maranello生產，全車組裝在Mirafioli完成，是百份百made in Italy。

慢爬一樣得
鬥平路，就算對手是Ferrari都未驚過，但講到越野，Maserati幾乎係零經驗。齋睇數據，標準配備的Q4四驅系統，on-road時，前後驅動比例為10：90，高速巡航更會自動變成全後輪驅動；選用off-road模式，前後驅動比例會由20：80開始，再視乎路面情況而自行調整，最高可達50：50，配合埋機械限滑差速、涉水深度由250mm至500mm、22度進坡與26度離坡角度，要玩攀山涉水，只要你捨得，基本上都難唔到佢。不過我更佩服係佢的on-road表現。

聲底雄厚
3公升V6雙渦輪增壓配8前速ZF全自動波箱，馬力430hp，扭力580Nm，同級嚟講，輸出唔算特別標青，但跑起上嚟，排氣聲就好震撼。自選駕駛模式除了越野mode之外，仲有3種，I.C.E是慳油mode，油門敏感度較低，轉波次數比較頻密；Normal mode，懸掛設定跟I.C.E一樣以舒適為主，軚感適中，油門敏感度提升咗，波箱反應快咗，收油拖波嗰下排氣聲變大；轉換Sport mode之前，要有心理準備每次轉波時，排氣喉都會爆出一串令人亢奮的炮仗聲，要抵抗呢份加速誘惑，唔易！

操控如跑車
廠方強調，Levante是「lowest centre of gravity in SUV class」，駕駛人絕對可以從Sport mode感受得到。高速衝入S彎，落brake減速，等ZF自行降低兩檔，兩下爆喉聲，好high！頭轆沿住外線指向彎心之後再扭入右彎，尾轆擦過雙白線邊緣，轉向好準好利，敏捷得嚟又唔會令車身左搖右擺，馬步好穩好紮實，Skyhook電子避震的硬度與韌性恰到好處，果然唔似揸緊高重心的SUV，而且好impressive，好到肉。

黏性十足
加速力，頭段唔及現役Cayenne GTS勇猛，但中至尾段的爆發力，就完全進入意大利跑車嗰種淋漓奔放，呢副極之享受停留在高轉的渦輪增壓引擎，調校上有點點自然吸氣的影子，唔錯。相比懸掛硬橋硬馬的Cayeene GTS，Levante S的剛韌會有高一分的路面黏度，底盤極限非常高。
測試的S版，標準配備全景電動天窗、8.4 吋 Maserati Touch control Plus中央觸控屏幕、360度泊車視像、可預設前車距離自行加減速度的自動適應巡航控制、盲點警告、車道偏離警告及前方撞擊警告等，是一輛科技、配備及性能都極之全面，令人一試難忘的跑車型SUV。

Maserati Levante S GranSport 規格表
引擎形式：V6 Twin Turbo
汽缸容積：2,979c.c.
最大馬力：430hp@5,750rpm
峰值扭力：580Nm@4,500-5,000rpm
傳動系統：8前速全自動配固定式+/-轉檔撥片
懸掛系統：(前)雙搖臂/ (後)五連桿
制動系統：(前) 380mm通風碟/ (後) 300mm通風碟
輪圈：20吋合金
輪胎：(前) 265/45 R20 / (後) 295/40 R20 Pirelli P Zero
長x闊x高：5,003 x 1,968 x 1,679mm
軸距：3,004mm
車重：2,109kg
0-100km/h：5.2秒
極速：264km/h
耗油量：10.9L/100km (Combined)
碳排量：253g/km
售價：HK$1,488,000