又快又慳油 抵港的Infiniti Q30分為1.6t GT Theme、2.0t GT及2.0t Sport AWD合共三款型號,至於今次測試的2.0t GT,輸出跟我哋試過的2.0t Sport AWD同樣都係208hp及350Nm,由於是前輪驅動,體重較四驅版的2.0t Sport輕,所以0-100km/h的加速時間快咗0.1秒,每百公里耗油少咗0.6,最吸引係車價仲要平咗8萬。
大同小異 要從外觀上分辨2.0t GT與2.0t Sport AWD,可留意車頭面罩下方的進氣口,前驅用橫間,四驅是網格。車廂布置大致上跟2.0t Sport AWD一樣,最明顯是座椅放棄了賽車化的一體式設計,視覺上斯文啲,兼且一樣係spinal support零重力脊椎承托設計,長時間駕駛都唔會覺得腰酸背痛。其他配備還有Infiniti InTouch多媒體娛樂系統、導航、泊車鏡頭、車道偏離警示、7吋輕觸式屏幕及Bose音響組合等。
寬容度不變 操控方面,直路一腳把油門「質」到落底,頭段加速唔及四驅版爽勁,但中尾段就上得好快,2.0t GT的0-100km/h可以快0.6秒,相信係靠中尾段呢下加速力。跑山,Sport mode的懸掛反應比四驅版柔軟;高度增加咗20mm,車身傾側多咗少少,雖然貼服感不及2.0t Sport AWD,但遁跡力的寬容度一樣高。