外形唔夠辣，內裝唔夠奢華，加速力唔夠狂野，高轉亦欠扣人心弦的咆哮聲.....

還有的，0-100km/h加速要花上8.4秒，沒變形尾翼，無硬頂電摺篷，以上都是Passat 280的「終極缺點」，但係咁嘅身世，都可以打低C-Class奪得歐洲年度風雲車2015，你話奇唔奇？

唔好當係跑房車
以上欠缺是真的，攞獎都係真的，只是這堆所謂缺點，對一輛唔使40萬的房車嚟講，係雞蛋裡面挑恐龍骨；不過咁，呢個世界乜人都有，對一輛房車要求有豪華跑車的裝備與性能一啲都唔奇，所以Performance Car先會有佢嘅生存空間。雖然今次長測這部Passat 280 TSI加裝了R-Line配件，又有4種自選行車模式，但如果真係需要一部高性能房車的話，就未必啱你要求。

低容積高輸出
一般用家買車都會考慮引擎容積，明嘅，只係相差0.1公升，每年牌費就要畀多千幾蚊，好唔抵；不過咁，引擎容積1.5公升以內，輸出得百零匹，坐住幾個谷上斜路，會係一件幾拉牛上樹的事。睇番這副1.4公升直四TSI渦輪增壓引擎，馬力有150ps，扭力250Nm，換轉是NA心臟，1.8公升都未必有咁的性能表現。

首創ACT系統
如果有人用到澎湃又或者推背呢類形容詞，肯定係「滾」你，不過配7前速雙離合半自動波箱，加速的敏捷度，緊湊度，係會有一啲驚喜。內藏的Active Cyclinder Management系統 ，只要啱時候，系統會不動聲色折斷中間兩個汽缸的燃料供應，換句話，呢副心臟係主攻慳油。自選ECO模式，代價是降低油門敏感度，起步有點慢，但每一段都行得好順好滑；當行駛進入一定的慣性速度時，儀表板會顯示只有兩個汽缸運作，代表幫你荷包慳緊錢；四日三夜長測，錄得平均耗油6.9L/100km。

配備齊全
福士嘅強項，唔是超級豪華超高科技，而是整合各項技術，平衡性能與舒適，以最相宜的車價配搭最多設備，製作出大眾化的德國車。正如呢部Passat，標準已配備ACM系統、3區恆温、胎壓監察、電動尾窗簾、電動按摩座椅、遙控開啟行李艙等，雖然呢啲唔是乜嘢新設備，但36萬之內想揾部有咁齊裝備的德國房車，除咗佢，真係諗唔到仲有邊部。

電椅有來頭
全車最正的，係前排兩張經德國脊骨健康協會認證的電動按摩座椅，優點係長時間駕駛都唔會搞到你腰骨赤，雖然長測期間最長的一次車程只有45分鐘，但承托力唔錯。唯一不足的，係停車熄匙後，駕駛席唔識自動退後；如果想進出車廂方便啲，可以利用一下座椅記憶功能，setting 1用作日常的駕駛坐姿，setting 2就把坐椅移後，咁就可以解決呢個不足問題。

多功能儀表板
加咗R-Line的車身擾流飾件連18吋輪圈之後，外觀醒目咗而唔會畀人覺得浮誇。全新的12.3吋Active Info Display取代咗傳統的機械式指針儀表板，雖然無咗立體感，但勝在可以顯示更多行車資訊。R-Liine配件還包括Head-up Display投射式儀表， 撳一撳軚盤後右下方的按鍵，一塊透明儀表板就會升起，用同一粒掣扭兩扭，可調校投射高低，有咗佢，上到公路就更加方便睇實有無超速。至於後排空間夠唔夠寬敞，我就唔太清楚，只知長測嗰幾日狄Sir都係撓住腳嚟坐。

2017 Volkswagen Passat 280 TSI ACT R-Line Sport SE 規格表
引擎：L4 DOHC渦輪增壓
容積：1,395c.c.
馬力：150ps@5,000-6,000rpm
扭力：250Nm@1,500-3,000rpm
傳動：前置引擎‧前輪驅動
波箱：7前速雙離合半自動
0-100km/h：8.4秒
極速：220km/h
懸掛：(前)麥花臣/ (後)四連桿
制動：(前)通風碟/ (後)實心碟
輪圈：18吋合金
輪胎：235/45 R18
長x闊x高：4,767 x 1,832 x 1,456mm
軸距：2,791mm
車重：1,413kg
油耗：5.1L/ 100km (Combined)
廢排：179g/km
售價：$359,980