當MPV與SUV大行其道，Estate還有生存空間嗎？

雖然SUV問世初期在美國掀起了一場道路安全風波，但最後還是取代了旅行車的地位，成為新一代家庭車。

源自美國
旅行車，唔同車廠有唔同叫法，Audi有Avant、Alfa Romeo有Sportwagon、BMW有Touring、Ford有Sportbreak、Opel有Caravan、Renault有Grand Tour、Saab有Sport Combi、Jaguar有Sportbrake、VW有Variant，還有Mercedes-Benz的Estate，呢堆名，大家應該唔會感到陌生；不過阿爺年代，源自美國的旅行車係叫Delivery，經典例子有Oldsmobile Delivery，呢個名，已充份反映當年旅行車的主流用途。

由歐洲發揚光大
後來美國人發現，這類Delivery唔只載貨一流，原來用佢載住一家大細帶埋隻拉布拉多出去野餐仲正喎；呢個開心大發現亦迅速傳遍歐洲，仲幫佢改咗個好warmth嘅名 - Familiale，而Opel更成為第一家推出旅行車的歐洲車廠。
但好景不常，上世紀80年代，Chrysler整咗一部Minivan出嚟之後，旅行車在美國的地位就開始動搖；鬼咩，車廂空間大咁多，仲要載到六、七個人兼夾趟門設計咁方便，一家之主見到點會唔流口水。MPV的出現，原本已經好傷，後來還殺出一輛Cherokee，其高載量與媲美越野車的機動性，迅即風靡整個北美。為了迎接這股SUV浪潮，唔只歐洲車廠陸續增設生產廠房，就連旅行車發源地的美國，亦全面暫停生產旅行車，以騰出廠房生產SUV。

延續旅行車精神
至於歐洲方面，由於路面舖裝較為完善，唔似北美咁多未開發的郊區小徑，所以SUV對佢哋嚟講作用唔大；反觀旅行車無論在耗油、操控以至車價方面都比SUV優勝，所以在歐洲依然有一定叫座力，這亦解釋了為何英法德意在一片SUV浪潮中，仍堅持推出一系列以房車為發展基礎的旅行車。

高性能旅行車抬頭
唔好睇少呢類其貌不揚的旅行車，上世紀90年代，Volvo就膽粗粗把850 Estate送上英國BTCC賽道；面對Alfa 155、BMW 318i、Ford Mondeo、Renault Laguna及Peugeot 405等合共33輛強勁對手，雖然在21場賽事中最好成績都只係跑第五，但已經要對手們重新估計旅行車的戰鬥力。係嘅，有邊個會估到車廠會派部旅行車出戰吖，呢個安排，就連當年負責駕駛850 Estate出征的車手Rickard Rydell都嚇咗一跳，仲話如果加盟TWR之前知道要揸呢部怪車出戰，佢未必會動筆簽約囉！

扮豬食老虎
Volvo 850 Estate挑戰BTCC呢單嘢，最成功係引起車迷對高性能旅行車的興趣，當年最大得益的，一定係德國Audi的RS2 Avant及RS4 Avant。至於走高級豪華路線的Mercedes-Benz，現在除了新上場的5款Shooting Brake及7款Estate之外，還有一款由Mercedes-AMG主理，性能媲美超跑的CLS 63 Shooting Brake，5.5公升V8 turbo機器可輸出高達557hp！可以話啱晒鍾意「扮豬食老虎」的用家。

巿場偏向
睇返香港，都係MPV同SUV的天下，不過購買理由就跟外國有啲唔同，揀MPV的，主要係等價考量，即是在相若車價的情況下，大部分人會放棄房車而選擇載運量較高的MPV；至於選擇SUV的，則主要跟型格有關，講真，有幾多個會用得着佢嘅機動性能吖。面對兩款咁有條件的對手，旅行車的巿場真係愈嚟愈窄，不過咁，當個個都攞住部iPhone玩selfie嘅時候，都總有人唔鍾意隨波逐流的。

喜好與實際
有位揸開歐洲兩門掀背車的朋友，最近心郁郁想換部SUV，問我有乜好介紹。朋友已婚，上有高堂，下有一頭三年零八個月的雪橇；原本plan緊生育，但自從3條7當選之後，佢哋覺得人生已經再無幾多個5年，於是打消念頭，決定餘生以吃喝玩樂為己任。根據以上嘅個人私密資料，離地較高的SUV，對老人家來講係會有啲heavy，再加埋朋友本身揸開掀背車，我認為旅行車會比較適合，例如今次長測的C 200 Estate。

好使好用行李艙
除了C 200 Shooting Brake之外，呢部C 200 Estate是平治旅行車系列裡面售價最相宜；講外形個性，佢未必及得Shooting Brake，但勝在行李艙夠實用。與同系的C 200 Sedan比較，Estate的車尾長了16mm，高了15mm， 加埋平頂斬尾的設計，行李艙就比房車版多咗10L容量，整體容積其實唔會輸比中型SUV；後座及尾廂有粒銀色掣，撳一下，後座就會成排摺埋，尾廂容積立即由490L擴大至1,510L；不過，最正係用來遮隔行李艙與捲篷，會跟住行李艙蓋一齊開關，再加埋按鍵式關閉及遙控開啟行李艙蓋功能，用起上嚟真係方便好多。

中性的操控表現
今代的平治家族臉譜後生咗唔少，呢部旅行版C 200仲配埋AMG的車身擾流配件及輪圈，賣相唔錯；車廂設計及配備跟Sedan一樣，由於大部分功能已被電子化，如果是第一次開今代平治，就需要花一點時間去適應各項行車資訊，但難度唔高，算易用易掌握。懸掛setting屬於中性偏向舒適，軚感與轉向反應適中，是一輛可以開得好輕鬆又坐得舒服的旅行車。長測4天，以ECO模式行車323km，巿區平均時速24km，耗油10.1L/100km；巿區與公路混合路段平均時速54km，錄得耗油6.9L/100km。

My Opinion 狄港生
旅行車的最大優點，是比傳統房車大得多而又方便裝卸行李的尾箱。就像這趟長測，我們去了南生圍一天遊，帶了頭小狗，還帶了個航拍機玩具及小量行李放在尾箱，提存方便容易。最重要是車廂駕乘空間雖然不是非常寬敞，但已足夠喜歡戶外活動的小家庭舒適出遊。

Mercedes-Benz C 200 Estate 規格表
引擎：L4 DOHC 渦輪增壓
容積：1,991c.c.
馬力：184hp@5,500rpm
扭力：300Nm@1,200-4,000rpm
傳動：前置引擎‧後輪驅動
波箱：7G-Tronic Plus全自動配軚盤+/-轉檔
0-100km/h：7.5秒
極速：235km/h
懸掛：(前)四連桿/ (後)五連桿
制動：(前)通風碟/ (後)實心碟
輪圈：18吋合金
輪胎：(前/後)225/45 R18
長x闊x高：4,702 x 1,810 x 1,457mm
軸距：2,840mm
車重：1,525kg
油耗：5.5-5.9L/ 100km (Combined)
廢排：128g/km
售價：$465,000