中庸多一啲 Honda Freed

 3984
 2

唔使大,唔使豪,性能唔使特別好,Just right for everybody,全新Freed,到底做唔做到呢種點到即止的境界?

這句英語口號,唔是我講的,係廠方今次對第二代Freed的祈望同祝福,用中文作最簡單的翻譯,就係兩個字 - 中庸。

中庸多一啲 Honda Freed

一款車三類人
首先,撇除嗰啲乜都要睇乜都想知的八卦車迷,我估入得嚟睇呢篇試車報告,不外乎幾類人,第一類:考慮緊買部MPV,第二類:想換部MPV,第三類:想換過另一部MPV。講到呢度,我開始feel到有啲蕉皮雞蛋乳罩底橫人字拖飛緊埋嚟。是嘅,表面上,三類人都係同一類人,都係想買MPV渣嘛,典解要搞到咁複雜喎;不過咁,第一類駕駛人可以係「第一次買車」,第二類車主係想「轉揸MPV」,第三類是MPV車主想「換過另一部MPV」,雖然大家都係望住同一部車,但眼神,可以完全唔一樣的。

中庸多一啲 Honda Freed

入門七人車
如果屬於第一類,呢部全新Freed,值得你mark低在頭3位,但要記住,我經常講的,唔好信晒我哋,一定要親自約試車,自己比較一下。第二類,都值得你考慮下,約車試下,話唔定一拍即合。至於第三類,係最最最最最醃尖挑剔的,你都不妨約車試下先,不過我會建議你同時約多部Stepwgn甚至Odyssey,因為呢部Freed未必滿足到你嘅要求。

中庸多一啲 Honda Freed

第一代車主應該要升呢
我唔知有幾多個揸開上一代Freed嘅車主,換車時會考慮番第二代Freed,換轉係我,就會「升呢」換部Stepwgn,正所謂人望高處嘛,我都希望各位可以做個升級車主,況且呢部又唔是波子911,無必要對呢款車系咁長情吖;不過咁,循例都要比較下兩代分別。

中庸多一啲 Honda Freed
中庸多一啲 Honda Freed

第三排坐得人
我沒試過第一代Freed,所以無辦法在實用性及駕乘感方面作兩代compare,因此只能提供廠方公布數字畀大家參考。車長,比上一代多咗50mm,實際上車廂空間有幾多進賬,就要睇設計師點樣去運用呢50mm,如果門壁飾件同椅背偷薄啲,兩邊側窗垂直啲,中控台造斜啲,加多個巨型天窗的話,視覺上的空間感自然大好多,至於實際上係點,上一代Freed車主一定比我更清楚。作為第一次接觸呢款車系的我,覺得新一代Freed的實用面積唔算特別出色,無天窗,唔知會唔會成為佢嘅致命傷;第三排座椅,好ok喎,唔係嗰啲夾硬在尾廂搭幾塊門板坐到你腰酸背痛嗰種。中排可作大幅度前後移動,加埋一個尚算合理的車廂高度,摺起中排之後,一般成年人高度進出後排唔會有難度。

中庸多一啲 Honda Freed

中門大開唔離地
好了,再嚟一堆具體得來又好空泛的數字。左右電趟門,打開之後的開口闊度有665mm,比上一代增加了20mm;高度有1,165mm,增加了40mm;車廂地台與路面離地390mm,比上一代降低了15mm;揭起行李艙蓋,開口闊1,080mm,高1,110mm,地台與路面離地480mm。如果你現在攞住把拉尺度緊位,我除咗讚你一句kawaii,都真係唔知講乜好了;即係咁,其實直接落showroom睇真車會簡單實在好多的。個人認為,趟開側門之後,就算3歲豆釘或者耋老長輩,都會出入平安;最正係有埋遙控趟門,當你同愛人傍住兩老,兩個小朋友一支箭跑埋架車度,離遠揸住遙控一撳,呢啲咪叫做實用方便囉。

中庸多一啲 Honda Freed

六種自選燈色
車廂2+3+2的座椅布局,可以前中排或者中後排瞓低組合成一張類似牀的物體, 到底咁的設計用嚟做乜,呢個係我多年來的謎團,歡迎貓貓讀者提供答案。相比之下,我反而認為後排分成左右摺起,配合埋低地台的設計非常實用,搬重物或大型行李上車都方便好多。
儀表板有6種顏色任你揀,啟動引擎之前,撳下軚盤後面trip clock呢個掣,可以用顏色話畀乘客知,你今日的心情係開朗、憤怒、呆滯、忐忑、勇武、還是咸濕。開車之後再撳同一粒掣,就變咗選擇耗油顯示、行車哩數及續行距離。車廂還有大量儲物格,個個都好用實用;軚盤後方那個要用手背維持開蓋狀態的儲物格,咁嘅設計,其實係為咗安全,因為如果用彈弓維持開蓋狀,又或者因鎖扣損壞而自動彈開,就會擋住行車儀表及前方路面。

中庸多一啲 Honda Freed

無段變速緊湊又滑溜
動力方面,上一代用的是1.5公升SOHC i-VTEC,輸出118ps,今代換了Jazz RS那副1.5公升DOHC i-VTEC,輸出131ps,唔使計減數,一望就知比上一代好力。不過我比較欣賞佢副跟Jazz一樣的CVT無段變速,緊湊得嚟幾順滑,縮油唔會拖住部車;雖然無+/-換檔功能,但載滿人落類似花園道這類長命斜,可以先用制動減速,再拍入S檔來達到engine brake的效果。前支柱配後扭力桿,跟上一代設計一樣,不過做了部分補強;底盤用多咗高強度拉力鋼材,硬度比上一代提升了22%,抗扭能力亦提升了28%。

中庸多一啲 Honda Freed

超出預期的性能
上面已經提過,我無試過上一代Freed,所以比較唔到分別,但我認為咁樣比無乜參考價值,最重要係呢一刻佢畀到啲乜嘢我。懸掛唔算特別舒適,但唔差,經過路面凹凸位,我會嫌吸震筒上得有啲快,回落又慢咗啲,所以感覺上會有輕微跳動。正常車速,整體行車表現唔錯,隔音都可以,不過估唔到跑山都ok喎,雖然衝入急彎時,車身會側咗啲,輪胎會有啲響,軚感一般,但無推頭,亦無驚險鏡頭,以一輛入門級MPV來講,有咁嘅循跡能力算是中上貨色,已經唔是中庸咁簡單。

中庸多一啲 Honda Freed

優點
・空間實用唔花巧
・循跡性比預期高
・中門夠闊地台低

缺點
・無天窗

[taq_review]

2017 Honda Freed 規格表
引擎:L4 DOHC i-VTEC
容積:1,496c.c.
馬力:131ps@6,600rpm
扭力:155Nm@4,600rpm
傳動:前置引擎‧前輪驅動
波箱:無段變速全自動
懸掛:(前)麥花臣支柱/ (後)扭力桿
制動:(前)通風碟/ (後)鼓式
輪圈:15吋合金
輪胎:(前/後)185/65 R15 88S Yokohama BlueEarth E50
長x闊x高:4,265 x 1,695 x 1,710mm
軸距:2,740mm
車重:1,365kg
油耗:5.2L/ 100km
售價:$249,880

Land Rover Discovery 猶他州試車記

 上一篇

玩個性 Audi Q2

下一篇