假如你喜歡較smooth的駕駛方式， 這部被極端化的四驅版Q30 2.0t Sport或者會令你愛不惜手。

收音機久唔久就會傳來翻唱別人作品的歌聲，老實講，嗰種故意唱慢半拍及唱到好似好有爵士味的演繹手法，我真係唔識欣賞。係的，可能先入為主的關係，翻唱別人的歌從來都是吃力不討好的。

同一底盤下
為了節省開發成本及時間，近年車廠流行一招共用底盤，同一副底盤甚至分派到其他車廠發展出多款不同的車系，呢種玩法，等於兩個人用唔同的演繹技巧唱同一首歌，高下立見。今次長測的Infiniti Q30，就正正與Mercedes-Benz GLA採用同一副MFA底盤，論兩者資歷，平治隨時贏9條街，起碼試車之前，我係咁樣諗的。

外形煞食
呢部2.0t Sport係屬於Q30系列中的頂級型號，跟GLA 250採用同一副2.0公升渦輪增壓引擎及7前速雙離合半自動波箱，雖然車廂某啲細節位及電子元件都沿用GLA系，但我無諗住遂樣數晒出嚟。成個車型，你可以隱約睇到GLA的骨骼，不過經過Infiniti重新設計之後，Q30嗰種double-arch與亂中有序的骨線就極具時代感，觀感上自然亦更加年青，再配合埋這款金屬藍，光影之下使車身更加玲瓏浮凸。

放棄得宜
好多車，外表滿分，內櫳就扣晒分，不過呢部Q30所用的asymmetric設計就非常配合車身風格，一啲都唔馬虎。而最特別之處，係座椅、車頂連柱位及門壁等分別用咗Nappa、Dinamica及自家研發的Sofilez柔軟物料製作，無論設計或觸感，比很多高價歐洲車更有誠意。
我一向都唔係幾like新一代平治的「軚波」，所以當見到Q30無用到GLA呢份硬件，而換上一支自家設計的波棍仔時，真係感動到眼角幾乎咇咗半滴眼淚出嚟，不過呢支咁「啲骰」的波棍，因為係用操作比較輕巧的電子感應裝置，加上沒有機械保險掣，所以入咗D波之後，左手最好乖乖放番上軚盤，唔好繼續摸住支波棍，否則上身一旦受顛簸路面影響，就會好容易拍錯入N波。

以最温柔的方法演繹動力
講咗咁耐，到底點解我會話喜歡用smooth揸法的駕駛人一定會like爆呢部Q30呢？
是咁的，我相信揸開車嘅人，一旦跳上Q30的駕駛席踩過第一腳油之後，心裡面都會有個問號：「部車唔肯行嘅喂？」因為呢部Q30用咗一種類似四驅越野車的調校方式，把油門、軚盤及制動的敏感度降低；越野車採用呢種設定，是希望攀山涉水時，顛簸的路面回饋唔會咁容易因為駕駛人的肢體擺動而影響軚盤、油門及制動的正常操作，以前平治的高級車系為了提升乘坐質素，都用咗呢類降低敏感度的調校方式。

感覺如坐飛氈
至於今次呢部Q30好明顯比越野車更甚，所以你會發現油門加速及制動力度被調校得非常非常漸進，轉向的敏感度亦較低，你需要比一般車踩深一啲，軚盤扭多一啲，即使把自選駕駛調校到sport mode，相對於GLA都係較為温柔漸進；試過跑山時，一腳把油門質到底都唔會有突兀感，但feel到扭力會源源不絕緩緩送上；制動方面，亦可以容許駕駛人踩深一點都不會出現突兀感，而扭軚的速度就算快咗，車身都唔會發生重心急速轉移外側的情況，呢種調校取向，相信車廠係想全面提升乘坐質素，這種演繹方法，我幾like。
試了幾天，內子分別坐過領航席及後座，畀咗一句comment：「感覺似坐飛氈！」妳坐過飛氈咩？「發夢時坐過囉！」

好易變高手
我經常話，要睇一個人駕駛技術得唔得，唔係睇佢揸得有幾快幾狼，而係睇下對方減速及停定時的制動表現，如果減速及停車時可以做到完全沒有半點返擢的感覺，呢位駕駛人對距離的預測、制動時機、力度的運用及制動力鬆緊調節就有非常充分的掌握；跑山時，如果又能同時做到加油及減速流暢，唔會令乘客嘅上身有向前擢呢類急劇性前後重心轉移的感覺，呢位一定係一等一的高手。而Q30因為有先天嘅線性優勢，如果再遇上一位咁高明嘅駕駛人，就可以將部車發揮得更加淋漓盡致。長測5天，累積總計巿區平均耗油量為9.0L/100km，單次計算巿區及高速混合路段為7.6L/100km，以一輛四驅車嚟講，比預期中慳油。

Infiniti Q30 2.0t Sport AWD 規格表
引擎：L4 DOHC Turbocharger
容積：1,991c.c.
馬力：208hp@5,500rpm
扭力：350Nm@1,200-4,000rpm
傳動：前置引擎‧四輪驅動
波箱：7前速雙離合半自動配軚盤+/-轉檔
0-100km/h：7.3秒
極速：230km/h
懸掛：(前)麥花臣/ (後)多連桿
制動：(前)通風碟/ (後)實心碟
輪圈：19吋合金
輪胎：(前/後)235/45 R19
長x闊x高：4,425 x 1,805 x 1,475mm
軸距：2,700mm
車重：1,545kg
油耗：6.9L/ 100km (Combined)
廢排：156g/km
售價：$419,800