開乜嘢車，有時會好影響一個人的心情。
有啲會令人好勇鬥狠，有啲會令人心情開朗；
開篷甲蟲，開了五天，心情靚爆！

外父以前就是揸甲蟲，不過當年仲未認識內子，佢有佢生活，我有我忙碌，無機會坐下嗰部經典1300。

引擎唔見咗
甲蟲，細細個已經識，覺得佢外形成隻甲蟲咁，好得意。有次行街見到頭冚打開了，八卦望下，嘩！點解得條「士啤胎」，副機器呢？問老媽子點解會咁，佢例牌又係嗰句：「讀多啲書咪知囉」。
為咗揾答案，於是我真係好勤力讀書，考咗個全級第二名返嚟，但都係唔知點解，莫非好似《聰明笨伯》架車咁，車底穿窿大家一齊用腳行？後來識得有個屋企開車房的同學仔，先知原來甲蟲副機器係放後面，太神奇了！

後驅變前驅
嗰年得小四，鬼識咩叫RR咩！莫講話當時年紀輕吖，家陣有啲「慈母」，咪一樣唔知道有後置引擎這回事！不過咁，新一代甲蟲，已經將副偈搬上車頭；變了最普遍的FF布局，對我這類RR迷來講，係會有點失望。重生之後的第二代新甲蟲，無論硬頂或開篷，線條修飾都比上一代順眼，不過畀我揀，我一定揀開篷。

型的代價
我唔是開篷死硬派，但某類車能夠打開篷，成件事係會型好多；不過香港可以開篷的日子又實在唔多，夏天一定唔使諗，就算立秋後，都仲有幾星期要過着爭秋奪暑的悶焗日子，差不多要到11月尾，氣温與濕度才穩定下來；但不夠一個月又開始入冬，除非你是西伯利亞人，否則十零度打開個篷跑上highway，椅背又無暖風功能，真係隨時吹咗兩行鼻涕出嚟。

窩心功能
今次長測的開篷版甲蟲，雖然座椅唔會為你送上暖風，但有個超窩心的功能，開篷後，若把室温由冷氣調到暖氣狀態，當駛上高速或入隧道需要閂篷，系統就會自動由暖氣轉回開篷前的預設温度；即係話，如果開篷前設定是21度，開篷後把温度調到29度暖風，閂篷後會自動回復21度，再開篷又會自動調上29度，呢項咁正的功能，就算過百萬的開篷跑車都未必有，不過開關軟篷鍵設在車廂睹後鏡下方位置，上身需要輕微向前傾再舉起左手撳住粒掣十幾秒，操作過程有啲「騎呢」。

經典造型
在福士家族中，得這輛新甲蟲完全唔跟家族臉譜玩法，但其造型反而是最經典及最有代表性；內外設計保留了不少懷舊元素，我最鍾意是佢個外露軟篷，摺合之後就咁成個放在車尾，好有feel。甲蟲同迷你谷巴一樣，要鮮色，先至襯，好似呢隻橙色咁，見到佢，已經夠晒開心。

易揸爽快
改為前置前驅，主要是配合共用底盤的節省成本方案，車價會平啲，車廂見使啲，操控又容易啲。1.4 TSI 直四機器，輸出160ps，唔突出，但夠用，過彎好定，轉向敏捷，話晒都係Golf底，操控唔會令人失望。長測5日，平均耗油7.2L/100km；間唔中爽兩轉，耗油升上10.6L/100km，是合理水平；如果嫌佢加速欠爆炸力，就係你揀錯車，真係想快的話，$36萬呢個價位，我建議你補多一萬出部Golf GTI，放過呢隻可愛的甲蟲。

Volkswagen Beetle Cabriolet 1.4 TSI 規格表
引擎：L4 DOHC 16V Twin-Charger
容積：1,390c.c.
馬力：160ps@5,800rpm
扭力：240Nm@1,500-4,500rpm
傳動：前置引擎/前輪驅動
波箱：7前速雙離合配軚盤+/-轉檔
0-100km/h：8.6秒
極速：205km/h
懸掛：(前)麥花臣支柱/ (後)四連桿
制動：(前/後)通風碟
輪圈：19吋合金
輪胎：(前/後)235/40 R19 Michelin Pilot Super Sport
長x闊x高：4,278 x 1,808 x 1,473mm
軸距：2,540mm
車重：1,468kg
油耗：6.4L/ 100km (Combined)
廢排：147g/km
售價：$359,980