姑勿論Evoque Convertible是唔是全球首輛開篷SUV，但就一定係開篷車的不一樣選擇，而且更擁有現在越來越受歡迎的SUV設計，仲有名牌包裝的越野性能。

身形魁悟的大隻佬，在鬧巿中突然停下來脫去上衣露出一身橫練肌肉，場面到底有幾爆？開篷Evoque或者可以幫你親身體驗一下。

開篷越野，其實唔是甚麽新玩意，20世紀的Willys Jeep，唔只無頂，連兩道門都慳番。至於開篷SUV，21世紀的今天，日產都有部Murano，不過，香港無份。

開篷SUV
點都好，姑勿論Evoque Convertible是唔是全球首輛開篷SUV，我相信影響唔大，鍾意就鍾意。
開篷版Evoque，由日內瓦車展的概念車開始、路測間諜照的流出、再放上洛杉磯展台，到今日正正式式試車，前前後後足足4年，對於唔是跑車就是轎跑車的沉悶開篷巿場，這部開篷Evoque絕對是另類刺激。

德國天幕專家主理
拆走硬頂之後，織布軟篷由著名汽車天窗及摺篷專家的德國Webasto製作，防水、隔音、隔熱是指定動作。敞篷掣，好隱蔽，要先推開轉波旋鈕下方的儲物格敞門，就會見到點煙位下方有個設計類似電子泊車手掣的敞篷鍵，拉起開篷，按下關篷；只要行車時速唔過48km，軟篷就可以邊行邊開關，開篷18秒，關篷21秒，合理時間。
可能有人會問，電摺硬頂不是比電摺軟篷更吸引嗎？
唔是唔得，之不過由於SUV的車頂體積較大，摺合硬頂加上全套電動機關之後，會進一步增加整體重量，衍生的問題，就是影響操控質素及增大引擎負荷；對於Evoque這種具備攀山涉水功能的SUV來說，就算解決了底盤剛性及引擎輸出問題，亦會進一步削弱載運空間及影響駕駛質素，最終只會吃力不討好。

靚的代價
有研究指，如果另一半係大美人，拖住佢出街，男人會有種飄然感；其實車都一樣，揸部靚車四圍去，人都精神啲、開朗啲。今次測試 Evoque Convertible的顏色本身已經好搶，開埋篷，收視率隨時高過同色開篷狂牛。
要型要靚，當然有代價。由Evoque Coupé進化而成的Evoque Convertible，換了電動軟篷之後，為了容納篷頂，行李艙容積由原本420L減至251L，但開篷後不會影響空間；而開篷車必須具備的翻滾防護安全機關、軟篷電動裝置及A柱補強等，使總重由1,655kg增加至1,936kg，相當於坐滿一車人。

開篷新體驗
跟開篷跑車比較，由於Evoque Convertible的離地距較高，所以開篷後的駕駛視野，是一次很新鮮的體驗。關上兩邊側窗，風噪唔大，聽緊收音機的，音量亦無需扭大1度。打開側窗，相對於後座，捲入車廂前座的氣流只屬微量，如果有女士set好靚頭準備去ball，最好都係關篷開車。改成四座布局之後，少了一個後排中座，多了橫向伸展空間；兩門設定，外觀瀟灑了，如果想出入後排都瀟灑啲，只要打開軟篷，就算企直行入車廂都無問題。

食水深
Evoque Convertible跟硬頂版同樣被列入Land Rover中最高級別的Range Rover系列，以一輛SUV來講唔只外形睇得，越野配備更是冠絕同級。智慧型四驅系統，可按車速及路況於0.3秒內自動轉換FWD、RWD或AWD驅動模型式；玩越野，有對應Grass/Gravel/Snow、Mud＆Ruts及Sand三種不同路況的Terrain Response system，還有HDC自動控速下坡系統作後援；遇上瀑布級暴雨，高達50cm的涉水深度夠你衝出重圍。唔知水氹有幾深？唔緊要，慢慢駛埋去，車底感應器自然會透過中控台的輕觸螢幕話你知水位高度，萬一探測到水深接近極限亦會自行發出警報。

全新資訊裝備
車重增加而動力輸出不變，很正常，頭段加速自然慢了，0-100km/h所需的時間亦多了。底盤反應跟硬頂型號相同，與其他SUV比較，不是那種被跑車化的操控感，設定偏向越野，懸掛硬度亦唔算好sport，以舒適為主。
車廂變化不大，豪華而不俗氣。原本中控台的8吋顯示屏被換上10.2吋的輕觸屏幕及InControl Touch Pro最新資訊系統。雖然由13枚喇叭組成的Meridian 660W頂級環迴音響非常吸引，不過我還是享受無頂迎風的駕駛滋味。

2016 Range Rover Evoque Convertible HSE Dynamic 規格表
引擎：L4 DOHC 16V Turbo-Charged
容積：1,999c.c.
馬力：240ps@5,800rpm
扭力：340Nm@1,750rpm
傳動：前置引擎/四輪驅動
波箱：9前速自動配軚盤+/-轉檔
0-100km/h：8.6秒
極速：209km/h
懸掛：(前)麥花臣支柱/ (後)四連桿
制動：(前)通風碟/ (後)實心碟
輪圈：20吋合金
輪胎：245/45 R20
長x闊x高：4,370 x 1,985 x 1,609mm
軸距：2,660mm
車重：1,936kg
油耗：8.6L/ 100km (Combined)
廢排：149g/km
售價：$898,000