很多SUV都開始在設計及性能上模仿跑車，
唯Macan GTS完全不用刻意，
因為GTS本身已經是一個跑車靈魂。

Macan共有4款型號，有女性朋友問我，點解入門版Macan跟Turbo版價錢會相差成倍？是咪快好多好多？你覺得我應該揀邊款？

入門版較適合女性
講真，一般女性對性能的要求較低，大嗱嗱四百匹對佢哋嚟講真係意義不大，所以我認為價格相宜的入門版Macan會比較適合。
我知咁講實會刺激到某類人的神經單元，跟住逐個數有幾多個單手都贏我幾條街嘅女車手：例如Touring有德籍烈女Ellen Lohr，F1有金髮美女Susie Wolff，還有令男士尊嚴掃地的紐北女王Sabine Schmitz及亞洲飄移女神Leona Chin。之不過咁，我講緊係「駕駛心態」，跟駕駛技術完全無關。

一部等於兩部
明嘅，連平機會都覺得「女士之夜」有歧視男士成份而提告，我真係好明時下社會點解會變得咁反智，如果有女士提出唔收入場費是歧視女性經濟能力，唔知平機會又會點處理呢？警察招募800米短跑體能測試要求男性比女性跑快78秒，咁又算唔算歧視男性呢？
好了，講番車。入門版Macan假假地都有237hp，其實唔算弱，但如果坐爆人上柴灣道這類長命斜，想趕上燈尾或者超車，對部分男性駕駛人來說就可能未夠乾淨利落，所以輸出有340hp嘅Macan S會較為合適。當然，索性揀400hp的Macan Turbo就唔使煩，不過基本入場費要132萬，幾乎夠買兩部入門版Macan。

力量的代價
至於定位剛好在S與Turbo版之間的Macan GTS，入場費接近1球，輸出比S版多20hp；撇開其他裝備唔計，四捨五入，每增大1匹馬力就需要約1萬大元；反映實際表現，0-100km/h快了0.2秒，極速多了2km/h，你可以話，呢0.2秒，肉體唔易感受到。

配備足料

今次長測的Macan GTS，是追加了15項Optional Equipment的足料版，加埋基本車價要136萬多，雖然比Turbo版還要貴，但GTS勝在標準裝備好足料，如果Turbo版要在配備上跟GTS看齊，連車價隨時要160萬，所以若非極端速度追求者，我認為GTS已經好抵好夠用。

獨門技術
雖然Macan跟Q5採用同一副底盤，但表現卻不盡相同，原因除了底盤經過保時捷工程師重新調校之外，還加入了多項獨門武藝，包括Porsch Doppelkupplung (PDK) 7速雙離合器波箱、Porsche Dynamic Light System (PDLS)動態照明系統、Porsche Torque Vectoring (PTV) 扭力分配系統、Porsche Active Suspension Management (PASM)電子懸掛系統及Porsche Traction Management (PTM)循跡管理系統等，加埋Sport Chrono Package，更可使0-100km/h加速再快多0.2秒。

跑味滲漏
以保時捷一貫作風，渦輪增壓原屬Turbo系列獨有，但自從第二代Cayenne開始，象徵自然吸氣中最高級別的GTS系列，便開始陸續换上渦輪增壓引擎，至於未來的Turbo系列有無可能被换上另一個名稱，暫時未知，但唔排除有咁嘅可能。

3.0公升V6雙渦輪增壓引擎，是Volkswagen專為Macan而獨立開發，所以唔好以為佢係Audi SQ5那副3.0公升V6機械增壓。經過重新調校之後，馬力比Macan S多出20hp，就算選用Comfort mode，都可以感受到那種不屬於普遍SUV的跑味。

迅雷變調
公路穩，山路表現都唔弱；按下Sport plus，軚盤、引擎、波箱、懸掛立即變調，車高被調低15mm，過彎再sharp啲，抗側能力再高啲，波箱反應再快啲；踩上2,800rpm，有聲勢有實際，是我最愛的轉數範圍。在四驅系統襄助之下，踩油出彎時間可以略為提前；提速出彎，感覺不到後輪被頭轆分薄動力之後出現的生硬步姿，動力分配比例明顯以後輪為主，保留了點點駕駛趣味，唔錯。

放鬆需時
縱然駕駛人可使用軚盤撥片進行轉波，但工程師並沒因此而忽略波棍的操作，左前臂可以剛好依在整個中央控制台上，當需要進行較大的扭軚動作時，手踭亦不會碰到座椅腰翼位置，這種完全符合人體工程學的設計，好多跑車都欠缺這份心思。

駛回公路，由Sport plus轉回Comfort，系統沒有一下子變奏，需要約15秒後才會完全放鬆過來，這種調校手法跟由Comfort轉到Sport plus的即時反應完全不同，是否工程師為GTS作出的刻意調校？廠方沒有特別注釋，但這種脾性，正正是屬於GTS。

2016 Porsche Macan GTS 規格表
引擎：V6 DOHC 24V Twin Turbo
容積：2,997c.c.
馬力：360hp@6,000rpm
扭力：500Nm@1,650-4,000rpm
傳動：前置引擎/四輪驅動
波箱：7前速雙離合自動配軚盤+/-轉檔
0-100km/h：5.2秒
極速：256km/h
懸掛：(前)雙搖臂/ (後)多連桿
制動：(前/後)通風碟
輪圈：21吋合金
輪胎：(前)265/40 R21 101Y (後)295/35 R21 103Y
長x闊x高：4,692 x 1,926 x 1,609mm
軸距：2,807mm
車重：1,895kg
油耗：8.8L/ 100km (Combined)
廢排：207g/km
售價：$985,000 up

試車報告：2016 Porsche Macan GTS