唔靚仔、唔流線又唔飛得，到底點解可以叫好又叫座？

有啲嘢，不一定要高大靚仔先得人鍾意的，好似歐陽震華咁，講型講靚仔，幾時論到佢；但你唔好理，大把曾經花樣年華當過女神的師奶們都勁like佢喎。

點解會咁？好簡單，發哥、劉華、張智霖當然個個鍾，但太「尖」了，尖到脫離現實；Bobby就不同了，雖然唔靚仔，但又未至於醜，還有點鄰居feel，關鍵係有齊中年男人的特徵，感覺真實啲，貼身啲。

重創日本中價巿場
車一樣，拉利林寶波子邊個唔想要，但太浮誇太離地了。揸Benz，曾經都是很多人的夢想，但自從抵食夾大件的B-Class出現之後，再不是遙不可及。入門版B 180不用30萬，而今次長測的facelift版B 200，1.6公升輸出156hp，講緊都係33萬有找，這個價，足以令很多中價日本車無啖好食。

不瘦身之謎
當A-Class都操到一身横練肌肉時，體型略胖的B-Class仍然堅持不修身，唔是懶，而是為了方便小朋友、老人家或大肚婆出入車廂；雖然犧牲了體態，但樣子卻生得像GLA，似個中年發福的靚仔。

大容積空間
置身後座，寬敞程度達中型房車級數，而行李艙亦有達488公升的置物空間，容積隨時勝過7人車；能夠兩者兼得，說明了後座空間並非藉由犧牲行李艙容積而得來；有需要時，再放平採用6/4式分割的後座椅，容積更可擴大至1,547公升，大到搬乜都得。

應用設備齊全
當然，唔是一味空間大就夠的，設備與用料一樣保持平治一貫水準。除了實用的儲物櫃及巨型天幕之外，facelift後的B-Class還配備8吋獨立顯示屏、12種顏色選擇的車廂氣氛燈及新款儀表板等；而安全配備方面，更追加了Attention Assist專注力輔助駕駛系統及泊車後視鏡頭，對駕乘人都非常體貼。

臨床耗油數值
除了視野廣闊之外，低耗油亦是B-Class的煞食之處。據廠方公布的資料顯示， 採用1.6公升渦輪增壓引擎配7G-DCT雙離合器波箱的B 200，平均耗油為5.4L/100km，不過在香港車多路窄的路面環境，相信較難實現。4天長測我以ECO駕駛模式作為主要測量標準，在星期五放工的繁忙時段，以平均時速20km行駛36公里路程，錄得每百公里最大耗油為13L；至於巿區加公路以平均時速66km行駛62公里路程，則錄得最低耗油為6.8L/100km，即平均每公里只需約$1.0。

舒適以外的彈指樂趣
大容積行李艙、寬敞的車廂空間、舒適的懸掛調校、操控容易、低耗油再加上相宜的車價，使B-Class成了新一代炙手可熱的家庭車。不過個人就不太喜歡近代平治車系所採用的「軚波」設計，假如開慣指揮燈設於軚盤右邊的日本車，當轉左線打燈時，很容易會錯撥波棍而把波檔轉入N波，雖然危險性不高，但突如其來的動力折斷，可能會弄得女駕駛人手忙腳亂。
放低晒老婆仔女之後，想一個人享受一刻駕駛樂趣，可把駕駛模式切换到sport，又或直接以手動軚盤撥片感受彈指之間的加減趣味，只要你期望不要太高，就會有意外驚喜。

2016 Mercedes-Benz B 200規格表
引擎：L4 DOHC 16V Turbo
容積：1,595c.c.
馬力：156hp@5,000rpm
扭力：250Nm@1,250-4,000rpm
傳動：前置引擎‧前輪驅動
波箱：7G-DCT雙離合半自動配軚盤+/-轉檔
0-100km/h：8.4秒
極速：220km/h
懸掛：(前)麥花臣/ (後)四連桿
制動：(前)通風碟/ (後)實心碟
輪圈：17吋合金
輪胎：225/45 R17
長x闊x高：4,393 x 1,786 x 1,557mm
軸距：2,699mm
車重：1,395kg
油耗：7.1-7.0L/ 100km (Urban)
廢排：129g/km
售價：$329,000