兩座加開篷，除了高性能之外，其實仲可以好hea的。

即係咁，車嘅嘢，唔一定只講性能的，起碼唔是個個一上車就帶住7分戰意3分激情，有啲人係會開得好hea，鍾意欣賞下公路嘅湖光山色，感受下唔同路面嘅風土人情；同意架，總之唔好霸住條快線咪得囉，你理得我吖！

做人同揀車其實差唔多，你唔鍾意嘅車，唔等於人哋揀佢就係錯，只是大家價值觀唔同。我識兩個堅有錢的朋友，隨時可以退休走去英國買幢古堡再請10個8個管家傭人幫佢打理家頭細務，總之唔係揾五六萬一個月揸架N手老林以唔識中文為榮就以為自己係上等人嗰種，其中一個，兩公婆就係揸架二手smart仔，話貪佢慳油易泊位又唔阻人。當然，以佢份身家，揸部Pagani Huayra BC招搖過市都仲得，有人會覺得佢孤寒，但其實兩公婆食個lunch閒閒地都一兩千，只是用車態度唔同。

十二秒見天空
第三代smart fortwo，承繼前兩代的作風，擺到明唔玩主流巿場；至於今次推出的cabrio共分為passion、prime及proxy三個版本，passion雖然比硬頂賣貴近5萬，但仍然是巿場最便宜的開篷車。趣緻與 tridion的造型，使fortwo的配色可以撞到七彩都無問題。織布軟篷的面積比上一代增加了4%，並以三層物料縫製而成，達到更佳的隔音及防污效果，原廠亦配備紅、藍、黑三色選擇。cabrio採用了drop-top設計，敞開軟篷之後，車頂兩則支架可以自由選擇保留或拆除，行李艙門亦設有專用收納箱；裝拆唔難，女士都可以輕易應付，只是萬一遇上「失魂雨」，就未必能即時關篷擋雨。

膠櫳更顯個性
內櫳用料與設計，基本上跟硬頂fortwo及forfour沒分別，膠得嚟很有自我個性。揸上手，軚盤波棍的質感一樣好膠，但亦因為呢份膠感而使人覺得開朗率直，這亦是smart的特別之處，其他車未必膠得起。

同一副自然吸氣
開篷版跟早前測試的硬頂版採用同一副動力及傳動機器，輸出完全一樣。靈活輕巧，窄路掉頭或泊車是其強項，雖然車身輕盈，但要佢跑快啲，就算hold住地板油一段時間，亦未必有你想要的效果；看其平均耗油4.3L/100km，講到尾，smart始終以低耗油為大前提。

打風都唔驚
對於這類短軸距又車身輕，突如其來的側風，小啲駕駛經驗真係會嚇到鼻哥窿都無肉；記得當年長測第一代fortwo，駛到青馬大橋時一陣強風突然從左側吹來，車身隨即晃動及輕微偏離航線，好彩右線沒車，否則就算自己唔驚都會嚇親人。
今代就好好多，把Crosswind Assist側風穩定輔助系統列入標準配備，再配合ESP電子車身穩定系統、ASR牽引力控制系統、Lane Keeping Assist車道偏離警示系統、抵禦正面撞擊能媲美S-Class的底盤及8安全氣袋，唔好睇佢外表玩玩下，安全設備分分鐘拍得住很多貴價房車。

炎夏有啲嘢
fortwo除了慳油靈活，後置引擎亦是一大特色；不過由於引擎設於行李艙下只一板之隔的位置，炎夏，當啟動engine start/stop功能遇上塞車，引擎處於静止狀態時，冷氣系統便會自動關閉來減低電池負荷，這時熱氣就會由行李艙湧入車廂，唔想背脊出汗，唯一辦法就係關閉 start/stop功能，讓冷氣系統保持「清醒」。

優點
・慳油
・有個性
・操控靈活敏捷

缺點
・載運空間不足

2016 smart fortwo Cabrio 規格表
引擎形式：L3 DOHC 12V
汽缸容積：999c.c.
最大馬力：71hp@6,000rpm
最大扭力：91Nm@2,850rpm
傳動形式：後置引擎/後輪驅動
傳動系統：6前速雙離合器自動配+/-轉檔
0-100km/h：15.1秒
極速：151km/h
懸掛系統：(前) 麥花臣/ (後)扭力桿
制動系統：(前/後)通風碟
輪圈：15吋合金
輪胎：(前)165/65 R15 (後)185/60 R15
長x闊x高：2,695 x 1,663 x 1,555 mm
軸距：1,873mm
車重：935kg
油耗：4.3 L/100km
廢排：94g/km
售價：$219,000 up