電動車安排在珠海賽道測試，大概係因為比亞迪宣稱全新Seal電動車，係針對運動性能而開發，所以在珠海賽道邀請亞太區及香港傳媒試車。

Photo by：Playful

測試車係配前後摩打的Seal AWD全時四驅版，至於雙摩打電動機組總輸出390kW(約530ps馬力)，峰值扭力有670Nm，0-100km/h需時3.8秒，按WLTC計算續航力有520公里。單睇數據，性能及加速都相當標青，在賽道上激劈表現又如何？

老實講，十幾年前試過初代比亞迪e6電動車，評價係廉價電動腳車，有得揀唔會揀佢。但係今次測試Seal AWD，表現真係要刮目相看。

首先係操控的確有動感，車身剛性亦非常穩固，配合前雙搖臂後多連桿懸掛，轉向反應敏銳，軚感也相當明確，高速劈彎時車身body-roll也抑制得很好。

在賽道上，全時四驅加埋iTAC扭力分布系統，令車身在急彎有更穩定表現，而且可以感覺到前後車輪的咬地表現及變化。試過在出彎時太快踩電門加速而甩尾，但又很容易就扭軚修正，可見底盤反應非常靈敏。

最大馬力有530匹的Seal AWD，加速快得嚟又唔會好大頓挫，主要係電門的加速係偏向線性，除咗起電一剎那會有強烈推背感之外，但整體加速好線性，似乎係想追求在動感與舒適之間的平衡。

在另一方面，制動反應雖然係好靈敏，但電機的regen動力回收，亦好接近電油車的收油反應，同樣非常線性，可減少不必要的頓挫感，就算係初接觸Seal，操控亦非常輕鬆容易。

Seal採用與 Atto 3 及 Dolphin 相同的 e-Platform 3.0電動車底盤，不過就率先用咗廠方稱為cell-to-body的全新電池安裝方式，廠方強調這種將多片電池(廠方稱為刀片電池)直接結合而置於底盤的結構方式， 除了有低重心的優點，又有鞏固車架作用，亦因為多片電池的結構，而增加車身的抗扭曲剛度；並且因為電池只高11cm，令車身地台可以更薄，從而令Seal 的外形線條可以更低矮而不會影響乘坐空間。

值得一提之處，車廂的設計相當人性化，經常會觸摸的地方採用了柔軟的觸感材料，至於好多電動車都將大部分控制按鈕電子化，操作幾乎與智能手機看齊，而Seal就依然保留多功能軚盤上的按鈕，同時亦保留中控台的波檔及行車模式等按鈕，對留戀傳統按鈕的用家會是一項優點，不過對追求新科技新事物的用家，就會嫌保守。

得益於電動底盤的平坦地台，加上有2,920mm的長軸距車身，後座空間十分寬敞，而前後排座椅也是柔軟梳化的設計，駕乘感覺相當舒服。至於有12個喇叭的Dynaudio音響系統，效果只算是中規中矩。

初試評價
在賽道試車，可以體驗到Seal的車身剛性相當穩固。在珠海賽道主看台大直路，可輕易加速到180km/h以上，而廠方為了維持續航力不會因太高速而衰減，也設定最高限速在190km/h。在賽道上，Seal AWD的動感表現令人相當滿意，由於係純電動，冇咗引擎及波箱的技術限制，性能及操控完全拍得住歐洲電動車對手，設備及內飾亦相當討好。至於在普通路面的行車表現，就要留待在香港路上試車後再評論。

優點
・車廂設計人性化
・設備及內飾亦相當討好
・操控敏銳

缺點
・行李艙容量一般
・音響不夠強勁

2023 BYD Seal AWD 規格表
摩打形式：(前軸)籠式三相異步摩打，(後軸)恆磁同步摩打
電池容量：82.56kWh
最大馬力：(前軸摩打)160kW，(後軸摩打)230kW
綜合最大馬力：530ps(390kW)
峰值扭力：(前軸摩打)310Nm，(後軸摩打)360Nm
綜合峰值扭力：670Nm
續航距離：520km (WLTC)
傳動形式：四輪驅動
傳動系統：單速直接驅動
0-100km/h：3.8秒
極速：190km/h
懸掛系統：(前)雙搖臂/ (後)多連桿
制動系統：(前)鑽孔通風碟/(後)通風碟
輪圈：19吋合金
輪胎：(前/後) 235/45 R19 Continental EcoContact 6Q
長x闊x高：4,800 x 1,875 x 1,460mm
軸距：2,920mm
車重：2,185kg
售價：HK$327,000 (one-for-one replacement scheme)