係全台擁有最多充電樁的五星級酒店！
電動車的銷量一年比一年高攀，大家除了屋企添置一兩架來代步之外，有否諗過出外旅遊都揸電動車？ 咁唔駛入油、唔駛沿途搵油站又確係幾吸引嘅。 今次就介紹一間擁有全台最多電動車充電樁的酒店畀大家，而且佢地仲有租賃電動車服務，搭巴士/火車/飛機來到台東就可以輕鬆遊玩。
台東面向浩瀚太平洋，3500平方公里的土地上只係住緊20幾萬人，要遊玩台東無架車真係搞唔掂，而且呢度1年有10個月、日頭氣溫都輕易超過30度，雖然入夜就開始涼爽但唔通日日都晝伏夜出咩？有架車係方便好多。哈哈～ 台東的旅遊資源相當豐富，尤其生態方面，無論你想上山下海還是醉心飲食都一定滿足到 - 飲食方面有池上米、金針花、釋迦、酪梨（牛油果）、旗魚、原住民特色餐；上山賞金針花兼嘆大自然冷氣、在沙灘捉浪花蟹賞天空之鏡、在伯朗大道踩單車搵金城武+賞金黃稻田、到成功漁港睇漁獲拍賣、在太麻里尋覓櫻木花道、去天空之鏡打卡、仲有全台最靚海景公路。。。隨口都講到咁多樣，有無幾樣啱你心水？

台東娜路彎大酒店有近300間房，係台東一隻手數得晒嘅五星級酒店之一，距離機場同火車站都非常近，加上樓層多夠高，高層風景尤其正！ 呢度主打親子路線，房間寬敞光猛、裝修好溫馨。 寒暑假自然一房難求、長假期如端午節都要提早少少book房至得。 台東娜路彎大酒店擁有超大停車場， 更擁有多達60支電動車充電樁（仲持續增加中）， 其中8支係Tesla Super Charge、2支係Porsche高速充電樁。 酒店備有BYD電動車可供住客租用，費用每日只係1800台幣。 唔想揸車？酒店仲有單車同電動單車畀你揀，電動單車費用係3小時150台幣，單車係免費使用3小時。

P編覺得最特別嘅係佢地最近完成重新裝修的13樓，全層只得13間房，可以想像空間有幾闊落，仲間間都有超大無敵靚view露台，每間房再贈送當地製作的靚紅酒一支！ 唔怪之聽講啱啱裝修好已經招待咗兩轉國際汽車品牌的聚會，非常搶手：

既然主打親子，招呼小朋友的設施當然唔少得：除咗超靚泳池（要留意，泳池8am至開放）、泳池旁邊就係為大小朋友而設的室內玩水設施、另外仲設有室內機動遊戲專區畀小朋友放電，咁當然唔少得畀家長們relax吓嘅按摩池&溫泉池啦，台東的美人湯溫泉不可錯過，可以幫肌膚好好叉吓電。 室內另設有兒童遊戲區，旁邊放咗幾張按摩椅，畀家長睇住小朋友既同時都可以鬆吓筋骨，認真週到。

餐飲方面水準好高，尤其早餐。 行入自助式早餐餐廳，食物品種多到眼花撩亂！ 麵包粉麵類新鮮熱辣，比較特別既有東岸海鮮粥（近海漁穫新鮮煲粥自然鮮甜）、原住民野菜小米粥、池上腐乳、鬼頭刀魚鬆（豬肉鬆食得多，估唔到魚肉做嘅肉鬆都好好味）、卑南豬血湯、越南牛肉湯、深層海水養生豆花*，生果區色彩繽紛之外竟然有大大個原粒椰青！好奇究竟點食呢？有專人負責幫你開椰青？

* 深層海水手作養生豆花係以海洋深層水過濾濃縮製成鹽滷，保留豐富礦物質及微量元素，加上天然有機黃豆，令豆花唔單止口感滑嫩更充滿豐富礦物質，可以同時品嚐到山海之味。

P編覺得如果住呢度，除咗一定要出去享受吓藍天白雲超藍太平洋，都應該要留多D時間在酒店裡面享受上述咁多嘅酒店設施，尤其如果係帶長輩同小朋友出遊的話。 唔知大家點睇呢？ （以上呢兩張圖係酒店高層望出去的景色）