除了充電之外，相信另一個使車主最關注的問題，就是電池的壽命。

「買番嚟唔使入油，初初梗過癮啦，到嚿電壞咗要換嗰陣，你就知味道了！」當你考慮緊想換部電動車時，可能都會聽過咁的忠告。咁到底電動車嚿電可以玩幾耐？筆者無電動車，答唔到你，只知鋰離子電池唔好用到咁盡先充電，充電亦盡量唔好100%，同埋最好少用快速充電，咁就會襟用啲。不過，最近 Tesla 就出咗一份有關電池壽命的調查報告，原來，鋰離子電池並無我哋想像中咁「短命」㗎！

報告顯示，Model S 及 Model X 喺行駛20萬英里之後，電池容量平均只係減少咗12%，即係表現仲可以保持88%。咁到底20萬英里係乜嘢概念？首先，換算番我哋慣常採用的單位，即係32萬公里；假設每日需要行60公里，全年365日無休，即係要行足14年半先，電量先至減弱12%，分分鐘部車攞去劏，嚿電都仲未打柴。

其實去年已經有一位叫 Christian 的 Tesla Model X 100D 車主，喺 YouTube 分享過佢嘅用車心得。座駕於2018年購入，有超過一半時間使用超級充電站來充電，所以對電池的傷害都幾大。不過，行駛超過20萬英里之後，電容量仲可以有 83.8kWh，跟原本的 93.7 kWh，只係輕微減弱咗9kWh。仲擔心緊電池壽命的你，唔知會唔會加強咗你的換車決心呢？！