如果說 MC20 係令瑪莎拉蒂回歸光輝歷史之傑作，Grecale SUV 就要成為瑪莎拉蒂獲得利潤的麵包與牛油。

Photo by：Playful

MC20 係瑪莎拉蒂自從 MC12之後，相隔18年推出的另一架令人驚艷超級跑車；MC12是建基於法拉利 Enzo 發展而成，但 MC20 係一款由頭到尾都係瑪莎拉蒂自家研發的超級跑車，包括全新的底盤及瑪莎拉蒂設計的引擎，塑造了完全屬於瑪莎拉蒂的獨有性格。

First drive MC20的感覺係瞬間加速力非常凶狠，但係駕駛就相當輕鬆容易。值得一讚之處，新車係採用由廠方聯同賽車專家 Dallara 共同開發的碳纖維底盤，由底盤透過軚盤傳來的路面感非常強烈，轉向非常敏銳，排氣聲浪咄咄逼人，一切都係超級跑車必須要有的表現，而且售價只係由港幣$3,688,000起。

廠方宣稱 MC20 配備直接及間接噴注雙火花塞技術的3公升V6雙渦輪增壓引擎，係源自一級方程式技術發展而成，最大馬力630ps，0-100km/h少於2.9秒，0-200km/h亦只需8.8秒，加上車重在1500kg以下，所以只要右腳一畀油，加速感受非常凶狠，腎上腺素就立即會急升。

如果說 MC20 係令瑪莎拉蒂回歸光輝歷史之傑作，Grecale SUV 就要成為瑪莎拉蒂獲得利潤的麵包與牛油。我們對 Grecale 的初步駕乘感受，係偏向豪華舒適多於一味要跑得，車廂隔音非常好，後座空間亦相當闊落。

值得一讚係車廂造工及用料十分高級，車廂內的電子時鐘，則融合了經典的瑪莎拉蒂設計元素；真皮座椅及皮革內飾、軚盤以及非常有型的金屬換檔撥片，觸感都非常有質感而且實用而有氣派。

我們測試的係 Grecale Modena，售價由港幣$998,000起，配2公升直4渦輪增壓引擎阪輕混能系統，最大輸出330匹馬力，加速當然同 MC20 無得比，但反應都好靈敏，在香港路面上已經夠晒用。至於 0-100km/h 只需 3.8 秒的 Grecale Trofeo，就配輸出 530匹馬力及 620Nm 扭力的3公升 V6 雙渦輪增壓引擎，據了解最快在年中左右抵港。