假如有一輛智能車，當你沒準時繳交貸款時就會自動關冷氣，甚至吼你瞓覺時半夜靜雞雞自己揸去禁區等人拖車，你會唔會買？

隨着人工智能及自動駕駛等技術的發展，到底會為人類的生活方式帶來何種翻天覆地的轉變？咁就要視乎法律及道德配唔配合到了，即係如果有一個喺法律及道德層面比較落後的國家掌握咗一啲高科技，咁樣唔單只會衍生好多社會問題，分分鐘仲會引發戰爭。

美國福特汽車喺2021年8月，曾經為一項汽車技術向美國專利及商標局 United States Patent and Trademark Office 提出專利申請，由於當時還在保密階段，所以未有對外公布有關的技術類別。正當大家還以為只涉及一般動力技術或操作系統的時候，美國汽車媒體《The Drive》最近就爆出這項非一般技術的內容。

該項名為 Systems and Methods to Repossess a Vehicle 的技術，主要是協助貸款機構來針對沒有按時繳交汽車貸款的車主，首先系統會透過暫停使用定位、定速、音響及冷暖氣來提醒車主；再唔還錢，系統就會發出令人煩擾的聲音，又或者在假日中「罷駛」；如果車主繼續無視警告，自動駕駛系統就會介入，自己開去會被拖車的禁區，甚至直接揸去有關的貸款公司或堆填區！

到底呢項技術會唔會成為現實？首先，車廠需要考慮這種協助貸款機構去針對無賴車主的系統，會否影響汽車銷量，尤其當這項技術擁有專利權，車主喺買車前就會考慮萬一系統或貸款機械出錯時所引起的尷尬情況，這些並非金錢可以補償；還有因部份系統失靈後而引發的意外、禁區泊車後的法律責任、座駕在緊急情況下不能開動所造成的損失等，呢啲都係牽涉不同程度的法律與保險問題。

睇嚟福特汽車唔似咁笨，咁到底背後的真正目的係乜？唔知 Chat GPT 有無答案呢？