為了降低電動車的生產成本，最近陸續有車廠表示有意轉用 LFP 電池。到底 LFP 係乜東東？點解可以降低成本？有乜嘢車用緊？鋰電池和鋰離子電池是咪同一樣嘢？邊款電池襟玩啲？電動車係咪堅環保？

要解答上述問題真係唔容易，並非三言兩語能夠說過清楚，所以首先等我戴番頂頭盔先。由於問題好重學術味，以下解說將會盡量避重就輕，希望一連四輯唔會悶親大家。

燃料車與電動車之別
首先介紹一下燃料車及電動車的特性。
燃料車會因為添加燃料後，使車重增加，但性能就不會隨住燃料耗用而改變。電動車就剛好相反，充電後不會使車重增加，不過性能就會因為電量逐漸下降而遞減，換句話，爆炸力會急劇下滑。電動車的電池，跟燃料車的油缸一樣，都是放喺車底，不過電池放得更低，再準確啲講，係整塊放在「地台」下，而且重量動輒數百kg，佔整體車重約15至40%，所以一般都會比燃料車略重。

電動車電池的分類
至於現在使用喺電動車的電池，主要分為 NMC (鎳錳鈷)、NCA (鎳鈷鋁) 及 LFP (磷酸鐵) 三種，NMC 佔整體巿場使用率70%，NCA 佔25%，LFP 佔5%。汽車巿場專業調查機構 LMC Automotive，喺2022年初就公布咗一份有關未來電動車電池使用比率的研究報告，預測到了2028年，全球電動車正極化學材料電池使用能量數據會由2020年的 127GWh 飆升至 1.24TWh，增幅高達9.8倍；此外，各類電池的使用率亦將會有輕微變化，NMC 佔65%，LFP 佔10%，而 NCA 就將會由 LNMO (鋰鎳錳氧) 及 NMCA (鎳錳鈷鋁) 取代。

稀有金屬有價有巿
有冇畀啲化學元素搞到神經衰弱食慾不振四肢無力頭暈身㷫沾寒沾凍夜啼驚叫呢？
言歸正傳，點解 NCA 會被淘汰，而 LFP 的重要性會提高咗？這個是跟使用的物料有關。到目前為止，鋰離子電池主要由鋰、鎳、錳、鈷、鋁等多種金屬材料以三種組合形式製成，當中以「鈷」的價格最貴，每噸大約8~9.8萬美元，而較便宜的鎳，每噸價格亦高達2.6萬美元。(待續)