去年推出的 296 GTB,唔夠一年,法拉利工程師就成功改建成開篷版的 296 GTS,唔只靚到暈,性能仲無乜受加磅影響。
很少聽到女性會話鍾意開篷車的,鬼咩,人哋 set 靚個頭,化行粧,畀啲風兜口兜面吹埋嚟喎,就算天生有齊瓜子臉天鵝頸直角肩蝴蝶背九頭身陶瓷肌警鐘胸A4腰馬甲線蜜桃臀漫畫腳都補唔番啦!所以同女性約會真係唔好以為開住篷可以冧到女呀!死罪嚟㗎!
不過呢,如果係呢部法拉利就唔同玩法了,起碼我攞住呢幅相,問10個女性全部都話ok喎唔介意喎。點解?因為收視率高囉。咁吹亂咗個頭咪仲多人睇到?係㗎,好矛盾㗎,常理同邏輯對女性一向都不適用。
或者可以咁樣理解,巿區慢慢行,停下燈位,咪開篷囉;上到高速公路或者入隧道,就一定記住要閂篷,反正這部 296 GTS 只要時速唔超過45公里,就可以喺14秒內完成,都好方便吖。
296 GTS 這個名,代表用了2.9公升V6引擎的 Gran Turismo Spider,去年已推出了硬頂的 GTB,兩者同樣配備雙渦輪增壓及電動摩打,8 前速 F1 雙離合器半自動波箱,總輸出都係 830ps。雖然 GTS 比 GTB 重70kg,但0-100km/h的加速未受影響,仲可以keep到2.9秒,在 Fiorano 測試賽道中跑一圈,GTS 只以0.8秒落後。
296 GTS 採用折疊式硬頂敞篷,開篷後會收進引擎艙內;為了 keep 住俊朗外型,由 Flavio Manzoni 領導下的 Ferrari Styling Centre 特別為 GTS 製作了全新的頂篷罩,除了確保引擎艙的散熱效能及整體美感。
一如法拉利 SF90 Stradale,新車同樣可選配 Assetto Fiorano 配置,其中包括輕量化部件和空氣動力學改裝部件,旨在賽道駕駛時可以達到巔峰性能體驗的需求。
上一篇
下一篇