邊個想繼續聽到引擎聲嘅請舉手！

唉！收到收到，其實大家都係被虐狂，好唔捨得令人暈眩的汽油味，仲有震耳欲聾的排氣聲，不過距離2035年已經時日無多，到時唔好話跑車，就算油電混合甚至插電式油電混合車都一樣要收工，大家真係要好好珍惜餘下日子。

真係冇彎轉？
意大利有關當局就在去年9月曾經跟歐盟委員會表態，希望意大利超跑可以獲得2035年之後的禁售豁免；而德國交通部部長 Volker Wissing 亦曾經開腔表示，希望2035年之後仍可售賣引擎車，事關佢認為人類未來唔可能只靠電動車，況且按照電動車現在的成長速度，根本趕唔切喺2035年完全取代燃料車。

假如有一日因為某種緣故大停電
其實 Volker Wissing 的講法唔是完全無道理，大吉利事講句，假如有一日因為某種緣故大停電，需要自己揸車出入的地方就會好大件事；情況就如電子貨幣一樣，如果完全取代實體現金的話，一旦大停電而導致系統失靈就會沒法進行交易，後果可以好嚴重，所以 Volker Wissing 建議使用合成燃料。

所謂合成燃料，可以是由煤炭、天然氣、油頁岩等呢類傳統燃料經過化學加工合成，又可以透過再生能源來提煉氫氣，再與空氣中的二氧化碳合成甲醇。

好處是可以繼續使用傳統引擎，而又能造到減少碳排放的效果，簡單啲講就係結合幾樣嘢再用複雜的化學程序製造出來的清潔燃料。保時捷近年亦跟 Siemens 合作研究 eFuels 的可行性，其他支持者還有 McLaren、Volkswagen 及 Audi 等。

不過並唔是所有傳統車廠都支持轉用合成燃料的，至少 Mercedes-Benz 的研發總監 Markus Schäfer 就反對呢個方案。佢認為，由於發展電動車已一段時間，而且成效唔錯，如果要從頭研究合成燃料的話，投入的成本未必可以達到預期效果，而就算日後真係成功研製出亁淨的燃料，相信都會被航空運輸業佔用大部分。

電動車係咪唯一的出路呢？
到底13年後係咪引擎車的末日？隨著歐盟汽車大國會員相繼提出反對，相信2035年禁售引擎車的計畫還存在一定的變數。當然，大家都唔想破壞環境，正如歐盟執委會主席 Ursula Leyen 所講：「希望喺唔傷害自然環境的前提下能夠兼顧經濟發展，留給下一代一個健康的地球」，但電動車係咪唯一的出路呢？當廢棄電池隨年增多，下一個問題又會唔會由空氣變成土地呢？