四十年前一群熱愛MG嘅車迷，成立 MG Car Club of Hong Kong，今年慶祝車會成立四十周年。

車聚係近年香港車迷非常流行嘅活動，回首四十年前，雖然係香港經濟起飛嘅黃金年代，有車階級亦越來越多，但車聚幾乎只有外籍車迷參與，而成立至今已四十年嘅 The MG Car Club of Hong Kong，歷史與1980年成立嘅 Classic Car Club of Hong Kong 不相伯仲，亦為香港車壇留下不少老爺車歷史印記。

今年四十周年慶祝活動在淺水灣酒店舉行，當晚最搶眼一定係1950年MG TD，連小朋友都好興奮要跳上車揸下狀態如新嘅老爺車；除此之外，仲有相當罕有嘅 MGB GT V8，至於另外兩部七十年代在香港相當流行嘅 MGB 開篷跑車，都令人勾起不少美好時光嘅回憶。

有興趣收藏MG老爺車嘅朋友，不妨聯絡 The MG Car Club of Hong Kong ，車會通常在每個月第一個星期三有傾偈吹水活動，每個月又會有遊車河兼BBQ車聚，都係保持人同車都身心健康嘅好習慣，鍾意MG嘅朋友又點可以錯過。