由四家英國公司聯手炮製，全電動開篷 roadster 造型嘅 Aura Concept 在英國設計及製造，續航力 640 公里。

Roadster小型兩座位開篷跑車可謂係英國汽車工業嘅icon，而呢個電動roadster項目，係由英國政府零排放車輛辦公室透過Niche Vehicle Network資助，旨在支持英國汽車行業從內燃機過渡到電氣化，項目由四家英國公司一齊聯手創作。

當中由 Astheimer Design 負責嘅外形，看似非常簡單，其實係應用咗 Computational Fluid Dynamics (計算流體動力學)創建，線條非常簡約而符合低風阻設計，其中包括被遮蓋嘅後輪，同埋大型後擴散器，全部都有助達到聲稱嘅640公里續航力。

車身由環保嘅天然複合纖維及編織物製成，比同類金屬產品輕得多， 材料由英國專家 BAMD Composites 設計及製作。除此之外，內飾亦採用可循環再造嘅皮革。

Aura 嘅電池設置及管理軟件，由 Potenza Engineering 提供，動力系統包括兩個 44kWh 電池，合共輸出 88kWh 功率， 一個安裝在車頭，另一個安裝在地台下，確保可維持中性嘅重量平衡，提供出色嘅操控性能。

由數碼產品專家 Conjure 設計嘅娛樂資訊系統，亦係首次採用 Android 汽車操作系統嘅英國汽車，駕駛儀表係好大膽咁安裝在軚盤中心位置嘅設計，並且聲稱識得在扭動軚盤時自動調節水平，主要提供關於駕駛嘅信息，包括天氣及行駛里程等等。

中控台就採用番稍為傳統嘅設計，配 10 英寸輕觸式屏幕，識得在駕駛時計算及尋找最方便嘅中途充電站。 系統仲識得向駕駛人提供點樣在行程中做到最長續航力嘅分析，並聲稱可提供極為精確嘅續航里程讀數，而且係精確到 0.5% 以內，目的係減少駕駛人對現時電動車嘅續航里程計算普遍都唔可靠嘅焦慮。